ខេត្តកំពង់ចាម ៖ បើតាមនគរបាលបញ្ជាក់ថា បុរសមិនស្គាល់អត្តសញ្ញាណម្នាក់ដែលយកប្រអប់បាស់ទៅដាក់ក្នុងទូATMបង្កឱ្យមានការផ្អើលឆោឡោនេះ តាមការពិនិត្យគឺមុខសញ្ញាដដែល ដែលធ្លាប់យកវ៉ាលិស១ដាក់លុយដុល្លារសែនខ្មោចមកដាក់ក្នុងទូATM នៅកណ្តាលគេ ក្នុងចំណោមទូចំនួន៣ កាលពីកន្លងមក បង្កឲ្យភ្ញាក់ផ្អើលដល់សមត្ថកិច្ចនិងមន្ត្រី CMAC ចុះមកយកវ៉ាលីសនោះចេញ រួចបើកមើលយ៉ាងប្រុងប្រយ័ត្នទើបដឹងថា សុទ្ធតែដុល្លារសែនខ្មោច ។ នគរបាលសន្និដ្ឋានថា ជននេះជាមនុស្សមិនគ្រប់ទឹក ជននោះ គឺជាមនុស្សវិកលចរិត ។
ប្រអប់ខ្មៅតូចមួយត្រូវបានគេយកទៅដាក់ក្នុងទូអេធីអឹម (ATM) របស់គ្រឹះស្ថានមីក្រូហិរញ្ញវត្ថុហត្ថាកសិករលីមីតធីត នៅភូមិ១៥ សង្កាត់កំពង់ចាម ក្រុងកំពង់ចាម និងបង្កឲ្យមានការភ្ញាក់ផ្អើលភ័យស្លន់ស្លោរ ខណៈភ្លៀងកំពុងធ្លាក់ស្រិចៗ កាលពីវេលាម៉ោងប្រមាណ៣រសៀលថ្ងៃទី១៥ ខែកញ្ញា រហូតដល់នគរបាលប៉ុស្តិ៍និងនគរបាលក្រុងកំពង់ចាមជាច្រើននាក់ ទៅពិនិត្យវត្ថុនោះភ្លាមៗដែរ ព្រោះសង្ស័យជាគ្រឿងផ្ទុះដែលអាចបង្កគ្រោះថ្នាក់ ។
តាមមន្ត្រីនគរបាលមួយរូបឲ្យដឹងថា នារសៀលថ្ងៃនោះ គេឃើញបុរសម្នាក់ជិះកង់១គ្រឿងមកឈប់នៅមុខទូATMខាងលើ ហើយយកប្រអប់ដុំខ្មៅបួនជ្រុងមកតខ្សែរួចបើកទ្វារកញ្ចក់យកទៅដាក់ក្នុងទូ បន្ទាប់មកបានជិះកង់ចេញទៅទិសខាងត្បូងនិងបត់ចូលផ្សាររាត្រីដែលនៅក្បែរនោះ ។ ប្រភពដដែលបន្តថា សាក្សីម្នាក់ដែលបានឃើញសកម្មភាពរបស់បុរសនោះ បានរាយការណ៍ទៅលោកឧត្តមសេនីយ៍ត្រី ហេង វុទ្ធី ស្នងការរងនគរបាលខេត្ត ហើយក៏បានសុំគោលការណ៍ពីលោកស្នងការ ដោយចាត់ឲ្យនគរបាលប៉ុស្តិ៍កំពង់ចាម និងនគរបាលព្រហ្មទណ្ឌក្រុងកំពង់ចាម ទៅពិនិត្យមើលស្ថានភាពជាក់ស្តែង ។
ពេលនគរបាលប៉ុស្តិ៍ទៅដល់មុន បានបើកទ្វារកញ្ចក់ទូATM ចូលទៅមើលឃើញប្រអប់ពណ៌ខ្មៅបួនជ្រុង តែមិនហ៊ានកាន់យកចេញមកក្រៅទេ ព្រោះខ្លាចក្រែងមានបង្កប់គ្រឿងផ្ទុះជាសកម្មភាពភេវរកម្មណាមួយ ។ បន្ទាប់មក មាននគរបាលក្រុងមកដល់បានបើកទ្វារចូលទៅពិនិត្យមើល ឃើញមានខ្សែ ភ្លើងបៀបឌុយបញ្ចូលទូរស័ព្ទ និងប្រអប់ខ្មៅនោះ ក៏បានវាយតម្លៃថា ជាប្រអប់បាស់តូច (ឧបករណ៍បំពងសំឡេង) ក៏ដោះឌុយភ្លើងចេញរួចកាន់ចេញមកក្រៅទើបដឹងថា ជាប្រអប់បាស់តូចមួយមែន រួចយកទៅអធិការដ្ឋាននគរ បាលក្រុងកំពង់ចាម ។
បន្ទាប់មក នគរបាលបានតាមរកបុរសដែលជិះកង់មិនស្គាល់អត្តសញ្ញាណនោះនិងបានដឹងថា កង់ដែលបុរសនោះជិះមក គឺជាកង់របស់អ្នកលក់នៅផ្សាររាត្រី ។ បន្ទាប់ពីបានដាក់ប្រអប់ខ្មៅក្នុងទូ ATM រួចរាល់ហើយ ជននោះក៏បានជិះកង់យកទៅទុកឲ្យគេវិញ ហើយដើរគេចខ្លួនទៅផ្សារបឹងកុក ក្រុងកំពង់ចាមបាត់ទៅ ។ (សម្រួលដោយ៖ ស្រីណា)
ចែករំលែកព័តមាននេះ