រាជធានីភ្នំពេញ ៖ សហគមន៍អឺរ៉ុប (EU) នឹងមិនបោះបង់ចោលប្រជាពលរដ្ឋខ្មែរ១៦លាននាក់តាមរយៈការផ្តាច់អនុគ្រោះពន្ធ ការនាំចូលទំនិញពីប្រទេសកម្ពុជានោះទេ ។ នេះបើតាមលោកព្រាប កុល នាយកប្រតិបត្តិអង្គការតម្លាភាពកម្ពុជា ។
លោកព្រាប កុល នាយកប្រតិបត្តិអង្គការតម្លាភាពកម្ពុជាបានឲ្យដឹងនៅថ្ងៃទី១៦ ខែកញ្ញាថាទោះបីជាទំនាក់ទំនងអន្តរជាតិ និងការទូត រវាងរដ្ឋាភិបាលកម្ពុជា និងសហគមន៍អឺរ៉ុបកំពុងមានអរីយ៍ភាព ឬភាពល្វីងជូចត់ដោយសារតែស្ថានការណ៍នយោបាយ ២ឆ្នាំចុងក្រោយនេះក្តីក៏ខ្ញុំនៅតែអាចធ្វើឲ្យមានសំណើច និងស្នាមញញឹមនៅពេលខ្ញុំជួបពិភាក្សាជាមួយមន្ត្រីជាន់ខ្ពស់ រដ្ឋាភិបាល និងអ្នកការទូតនៃបណ្តាប្រទេសនៅទ្វីបអឺរ៉ុបបានដែរ ។ លោកបន្តថា មូលហេតុ គឺដោយសារខ្ញុំជាមនុស្សមានសុទិដ្ឋិនិយម (optimism) និងមានក្តីសង្ឃឹមថា ពលរដ្ឋខ្មែរ ជាពិសេសអ្នកជំនាន់ក្រោយនឹងមិនបណ្តោយឲ្យស្ថានការណ៍ប្រជាធិបតេយ្យនៅបែបនេះរហូតឡើយ ហើយខ្ញុំបានបង្ហាញហេតុផល និងទទូចឲ្យមានការយល់ស្រប និងឯកភាពថា សហគមន៍អឺរ៉ុបនឹងមិនបោះបង់ពលរដ្ឋខ្មែរ ១៦លាននាក់ចោលឡើយ ហើយផ្ទុយទៅវិញសហគមន៍អឺរ៉ុបនឹងនៅជាមួយពលរដ្ឋខ្មែរផ្តល់កម្លាំងចិត្ត និងចូលរួមគាំទ្រដល់ពលរដ្ឋខ្មែរឲ្យបន្តដំណើរនៃការតស៊ូដើម្បីបុព្វហេតុប្រជាធិបតេយ្យ និងសិទ្ធិមនុស្សបន្តទៀត ។
អង្គការតម្លាភាពកម្ពុជាលើកឡើងបែបនេះ ក្រោយពី EU បានចាប់ផ្តើមនីតិវិធីជាផ្លូវការផ្អាកជាបណ្តោះអាសន្នប្រព័ន្ធអនុគ្រោះពន្ធលើមុខទំនិញគ្រប់ប្រភេទលើកលែងតែអាវុធ (EBA) កាលពីថ្ងៃទី១៣ កុម្ភៈមុននឹងអាចឈានទៅរកការព្យួរនៅខែកុម្ភៈ ឆ្នាំ២០២០ ។ ក្នុងរយៈពេល១២ខែនេះ មានការបែងចែកដំណាក់កាលត្រួតពិនិត្យយ៉ាងហ្មត់ចត់រយៈពេល៦ខែ (គិតចាប់ផ្តើមពីខែកុម្ភៈ ឆ្នាំ២០១៩ តទៅរហូតដល់ខែកក្កដា ២០១៩) ។ ត្រូវសរសេររបាយការណ៍ និងប្រមូលភស្តុតាង ៣ខែ (ខែសីហា រហូតដល់ខែតុលា ២០១៩) ។ ទទួលយកការបកស្រាយ និងឆ្លើយតបពីរាជរដ្ឋាភិបាលកម្ពុជាក្នុងរយៈពេល១ខែ (ខែវិច្ឆិកា ដល់ខែធ្នូ ២០១៩) ៕ កែសម្រួលដោយ ៖ សុឃាក់
ចែករំលែកព័តមាននេះ