កាលពីថ្ងៃទី២៥ កុម្ភៈ រដ្ឋាភិបាលជប៉ុនបានផ្តល់ថវិកាសរុបចំនួន៣៧៨.៣៤២ដុល្លារអាមេរិក សម្រាប់គម្រោងចំនួន៤ ដើម្បីស្តារប្រព័ន្ធធារាសាស្ត្រតាមរយៈគ្រោងការណ៍សហប្រតិបត្តិការសេដ្ឋកិច្ចរបស់ជប៉ុននៃជំនួយឧបត្ថម្ភឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ (ជំនួយគូសាណូណ៌) ។ កិច្ចសន្យាផ្តល់ជំនួយទាំងនេះ ត្រូវបានចុះហត្ថលេខានៅស្ថានទូតជប៉ុនថ្ងៃនេះ ដោយលោក ម៉ាសាហ៊្វូមី គូរ៉ូគី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា និងអ្នកតំណាងស្ថាប័ន ទទួលជំនួយនីមួយៗដើម្បីអនុវត្តគម្រោងដូចខាងក្រោម ៖
- ១-គម្រោងស្តារប្រព័ន្ធស្រោចស្រពអូរអង្ក្រង ក្នុងខេត្តព្រៃវែង (៩៥.៦០៩ដុល្លារអាមេរិក) ស្ថាប័នទទួលជំនួយមន្ទីរធនធានទឹក និងឧតុនិយមខេត្តព្រៃវែង
ជាមួយថវិការនេះ ប្រព័ន្ធស្រោចស្រពអូរអង្ក្រង នឹងត្រូវធ្វើការស្តារឡើងវិញដោយមន្ទីរធនធានទឹក និងឧតុនិយមខេត្តព្រៃវែង ។ គម្រោងនេះរួមបញ្ចូលទាំងការស្តារសំណង់បញ្ចេញ-បញ្ចូលទឹក សំណង់ដោះទឹកប្រឡាយ និងទំនប់ប្រវែងជាង១.០០០ម៉ែត្រ ។ គេសង្ឃឹមថា គម្រោងនេះនឹងកាត់បន្ថយទឹកជំនន់ ដែលបណ្តាលឱ្យខូចខាតជាប្រចាំ ហើយនឹងផ្តល់ឱ្យមានភាពងាយស្រួលដល់ការប្រើប្រាស់ទឹកសម្រាប់ប្រជាកសិករជាង១.១០០នាក់ក្នុងតំបន់ជាមួយការគាំទ្របច្ចេកទេសពីមន្ទីរធនធានទឹក និងឧតុនិយមខេត្ត ប្រជាសហគមន៍ និងថែរក្សាប្រព័ន្ធស្រោចស្រពបានល្អប្រសើរ ។
- ២-គម្រោងស្តារប្រព័ន្ធស្រោចស្រពអូរដូង ក្នុងខេត្តកែប (៩៦.៣០៦ដុល្លារអាមេរិក) ស្តាប័នទទួលជំនួយមន្ទីរធនធានទឹក និងឧតុនិយមខេត្តកែប
ស្រដៀងគ្នាជាមួយគម្រោងខាងលើនេះដែរ ប្រព័ន្ធស្រោចស្រពអូរដួង នឹងត្រូវធ្វើការស្តារឡើងវិញដោយមន្ទីរធនធានទឹក និងឧតុនិយមខេត្តកែប ។ គម្រោងរួមបញ្ចូលទាំងការស្តារសំណង់ទ្វារទឹក សំណង់ដោះទឹក និងទំនប់ប្រវែងជាង៩០០ម៉ែត្រ ។ គេសង្ឃឹមថា គម្រោងនេះនឹងផ្តល់ឱ្យមានភាពងាយស្រួលដល់ការប្រើប្រាស់ទឹកសម្រាប់ដំណាំកសិកម្ម និងជួយសម្រួលដល់ការដឹកជញ្ជូនកសិផលដោយឆ្លងកាត់លើទំនប់សម្រាប់ប្រជាជនជាង១.៥០០នាក់ ក្នុងតំបន់ជាមួយការគាំទ្របច្ចេកទេសពីមន្ទីរធនធានទឹក និងឧតុនិយមខេត្ត ប្រជាសហគមន៍ និងថែរក្សាប្រព័ន្ធស្រោចស្រពឱ្យបានល្អប្រសើរ ។
- ៣-គម្រោងស្តារប្រព័ន្ធស្រោចស្រពអូរតាគី ក្នុងខេត្តបាត់ដំបង (៩២.៣៥០ដុល្លារអាមេរិក) ស្ថាប័នទទួលជំនួយ មន្ទីរធនធានទឹក និងឧតុនិយមខេត្តបាត់ដំបង
ដូចគ្នានេះដែរ ជប៉ុននឹងជួយដល់មន្ទីរធនធានទឹក និងឧតុនិយមខេត្តបាត់ដំបង ដើម្បីស្តារប្រព័ន្ធស្រោចស្រពអូរតាគីឡើងវិញ ។ តាមរយៈការស្តារប្រឡាយរងទី៣ ផ្លូវលំទៅកសិដ្ឋាន និងសំណង់ទ្វារទឹកដែលធ្វើឱ្យប្រជាកសិករប្រមាណជាង៧០០នាក់ នឹងអាចប្រើប្រាស់ទឹកសម្រាប់ស្រោចស្រពដំណាំកសិកម្ម ។ សមាជិកនៃគណៈកម្មាធិការអ្នកប្រើប្រាស់ទឹក និងថែទាំប្រព័ន្ធស្រោចស្រពនេះដោយមានជំនួយបច្ចេកទេសពីមន្ទីរធនធានទឹក និងឧតុនិយមខេត្ត ។
- ៤-គម្រោងស្តារប្រព័ន្ធស្រោចស្រពស្រែព្រះក្នុងខេត្តមណ្ឌលគិរី (៩៤.០៧៧ដុល្លារអាមេរិក) ស្ថាប័នទទួលជំនួយ មន្ទីរធនធានទឹក និងឧតុនិយមខេត្តមណ្ឌលគិរី
ដើម្បីឆ្លើយតបទៅនឹងកង្វះខាតទឹកដោយសារតែអាងមិនអាចផ្ទុកបាន ជប៉ុននឹងជួយដល់មន្ទីរធនធានទឹក និងឧតុនិយមខេត្តមណ្ឌលគិរី ដើម្បីស្តារប្រព័ន្ធស្រោចស្រពស្រែព្រះឡើងវិញផងដែរ ។ គម្រោងរួមបញ្ចូលទាំងការសាងសង់សំណង់ទ្វារទឹក សំណង់ដោះទឹក សំណង់បង្វៀរទឹក និងស្តារប្រឡាយមេដែលមានទំនប់ប្រវែងជាង៩០០ម៉ែត្រ ។ តាមរយៈគម្រោងនេះ ប្រជាកសិករជាង៥០០នាក់ នឹងអាចទទួលទឹកសម្រាប់ស្រោចស្រពដំណាំកសិកម្ម ។ សមាជិកនៃគណៈកម្មាធិការអ្នកប្រើប្រាស់ទឹក និងថែទាំប្រព័ន្ធស្រោចស្រពនេះដោយមានជំនួយបច្ចេកទេសពីមន្ទីរធនធានទឹក និងឧតុនិយមខេត្ត ។
ជំនួយគុសាណូណិរបស់ជប៉ុន បានចាប់ផ្តើមអនុវត្តនៅប្រទេសកម្ពុជាក្នុងឆ្នាំ១៩៩១ ដើម្បីជួយឧបត្ថម្ភដល់កិច្ចប្រឹងប្រែងអភិវឌ្ឍន៍ និងស្ថាបនាប្រទេសកម្ពុជាឡើងវិញនៅតាមថ្នាក់មូលដ្ឋាន ។ ជំនួយនេះមានគោលដៅគាំពារជនដែលងាយរងគ្រោះពីកត្តាផ្សេងៗដូចជា ភាពក្រីក្រ ភាពអកុសលផ្សេងៗ ដែលគំរាមកំហែងដោយផ្ទាល់ដល់ជីវភាពរស់នៅ ការចិញ្ចឹមជីវិត និងសេចក្តីថ្លៃថ្នូររបស់ពួកគេ ក៏ដូចជាជួយជំរុញនូវភាពម្ចាស់ការលើខ្លួនឯងរបស់ប្រជាសហគមន៍ ។ ចាប់តាំងពីឆ្នាំ១៩៩១ រដ្ឋាភិបាលជប៉ុនបានផ្តល់ថវិកាសរុបចំនួនជាង៤៦,៣លានដុល្លារអាមេរិក ដល់អាជ្ញាធរមូលដ្ឋាន និងអង្គការក្រៅរដ្ឋាភិបាលអនុវត្តគម្រោងចំនួន៤៤៨នៅទូទាំងប្រទេសកម្ពុជា ៕
ចែករំលែកព័តមាននេះ