ខេត្តឧត្តរមានជ័យ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់បានដេកស្លាប់បាត់បង់ជីវិត ខណៈឱ្យតែបានផឹកស៊ីហើយ គឺដេកមិនហូបបាយ បណ្តាលឱ្យកើតខ្យល់គដេកស្លាប់តែម្តង បង្កឱ្យមានការភ្ញាក់ផ្អើលកាលពីម៉ោងប្រមាណ១១និង២០នាទីព្រឹក ថ្ងៃទី១៤ ខែកញ្ញា…
ខេត្តឧត្តរមានជ័យ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់បានដេកស្លាប់បាត់បង់ជីវិត ខណៈឱ្យតែបានផឹកស៊ីហើយ គឺដេកមិនហូបបាយ បណ្តាលឱ្យកើតខ្យល់គដេកស្លាប់តែម្តង បង្កឱ្យមានការភ្ញាក់ផ្អើលកាលពីម៉ោងប្រមាណ១១និង២០នាទីព្រឹក ថ្ងៃទី១៤ ខែកញ្ញា ឆ្នាំ២០១៩ ស្ថិតនៅចំណុចអូរពស់ព្រៃខាងកើត ក្នុងភូមិឈូកមាស សង្កាត់កូនគ្រៀល ក្រុងសំរោង។
សេចក្តីរាយការណ៍បន្តថា ជនរងគ្រោះខាងលើឈ្មោះ កែវ (មិនស្គាល់ត្រកូល) ភេទប្រុសអាយុ៣៥ឆ្នាំ មានស្រុកកំណើតឃុំដំដែក ស្រុកសូទ្រនិគម ខេត្តសៀមរាប ហើយជាអតីតទាហាន។
បើតាមសាក្សីនៅនិងកន្លែងកើតហេតុបានឱ្យដឹងថា បុរសរូបនេះ គេបានសង្កេតឃើញថា តែងតែអង្គុយផឹកស៊ីជារៀងរាល់ថ្ងៃយប់ ហើយឱ្យតែបានផឹកស៊ីស្រវឹងហើយ គឺមិនដែលឃើញហូបបាយនោះទេ លុះនៅថ្ងៃកើតហេតុនេះ គេឃើញជនរងគ្រោះដេកនៅលើរានហាលនៅមុខផ្ទះ ខណៈអ្នកជិតខាងបានដើរចូលទៅ ស្រាប់តែឃើញដេកស្លាប់បាត់ទៅហើយ ក៏រាយការណ៍ប្រាប់ដល់សមត្ថកិច្ចតែម្តង ។
បើតាមលោកមេប៉ុស្តិ៍រដ្ឋបាលឃុំកូនគ្រៀល បានឱ្យដឹងថា ជនរងគ្រោះជាមនុស្សរស់នៅឯកោ មិនមានប្រពន្ធកូននោះទេ ជនរងគ្រោះតែងតែរស់នៅហូបបាយវត្ត ហើយព្រះសង្ឃក៏បានកសាងខ្ទមឱ្យជនរងគ្រោះដេកស្នាក់នៅចាំថែរក្សាព្រៃសហគមន៍សង្ឃរុក្ខវ័នតែម្តង ខណៈនោះក៏មានអ្នកភូមិ ដោយពួកគេរស់នៅក្បែៗនោះជាអ្នកធ្វើចំការស្រែផងដែរ។
ប្រភពដដែលបានបន្តថា ក្រោយពីបានទទួលព័តមានថា មានមនុស្សដេកស្លាប់ សមត្ថកិច្ចបានចុះទៅពិនិត្យ និងធ្វើការស្រាវជ្រាវ ហើយបានសន្និដ្ឋានថា ជនរងគ្រោះបានផឹកស៊ីស្រវឹង ហើយមិនបានហូបបាយ ទើបបង្កឱ្យកើតខ្យល់គដេកស្លាប់បាត់បង់ជីវិតតែម្តង។ ខណៈពេលនេះ សពជនរងគ្រោះត្រូវបានសមត្ថកិច្ចប្រគល់ទៅឱ្យព្រះសង្ឃ រួមទាំងអ្នកភូមិចាត់ចែងធ្វើបុណ្យទៅតាមប្រពៃណីផងដែរ។ (កែសម្រួលដោយ ៖ បុប្ផា)
ចែករំលែកព័តមាននេះ