ខេត្តកំពត ៖ តាមសេចក្តីរាយការណ៍ឲ្យដឹងថា ករណីរំលោភសេពសន្ថវៈពីរករណីកើតឡើងខុសគ្នា ករណី
ទី១ កើតឡើងកាលពីវេលាម៉ោង៩ព្រឹកថ្ងៃទី១៣ កញ្ញា ដោយកម្លាំងសមត្តកិច្ចនគរបាលស្រុកអង្គរជ័យ ខេត្តកំពត បានឃាត់ខ្លួនជនសង្ស័យម្នាក់ឈ្មោះ ហួ ប៊ុល ភេទប្រុស អាយុ៣៣ឆ្នាំ រស់នៅភូមិមានជ័យ ឃុំគុស ស្រុកត្រាំកក់ ខេត្តតាកែវ ពីបទលួងលោមនារីអាយុ១៧ឆ្នាំ រំលោភបានសំរេច ត្រង់ភូមិត្រពាំងខ្យង ឃុំអង្គភ្នំតូច ស្រុកអង្គរជ័យ ។
ករណីនេះ ជនសង្ស័យបានសារភាពប្រាប់សមត្ថកិច្ចថា មុនកើតហេតុពួកគេទាំងពីរនាក់ ធ្លាប់បានទំនាក់ទំនងស្នេហាគ្នាតាមទូរស័ព្ទ ហើយខណៈពេលឪពុកម្តាយនាងមិននៅ ទើបខាងប្រុសឡើងទៅរំលោភខាងស្រីដល់លើផ្ទះ ។ ចម្លើយបន្តថា ពេលខ្លួនទៅដល់ផ្ទះ គឺជនរងគ្រោះជាអ្នកបើកទ្វារឱ្យ ទើបខ្លួនចូលទៅដេកជាមួយនាង និងបានធ្វើសកម្មភាពរួមភេទរហូតបានសម្រេចដោយជោគជ័យ ។ លុះពេលកំពុងប្រព្រឹត្តជាក់ស្តែង ម្តាយខាងស្រីមកទាន់ ទើបចាប់ជនសង្ស័យឲ្យសមត្តកិច្ច ចាត់ការតាមផ្លូវច្បាប់ ។
ករណីទី២ កើតឡើងវេលាម៉ោង១រសៀលថ្ងៃទី១៣ កញ្ញា កម្លាំងសមត្ថកិច្ចកិច្ចប៉ុស្តិ៍នគរបាលរដ្ឋបាលកណ្ដោលបានទទួលពាក្យបណ្តឹងពីឈ្មោះ លាង ស្រីមុំ ភេទស្រី អាយុ១៩ ឆ្នាំរស់នៅភូមិមានរិទ្ធ ឃុំកណ្ដោល ស្រុកទឹកឈូ ខេត្តកំពតថា បុរសម្នាក់ឈ្មោះ លីន ក្រេះ អាយុ២៨ឆ្នាំ បានប៉ុនប៉ងចាប់រំលោភសេពសន្ថវៈនាង នៅចំណុចប្រឡាយទឹកចិន ស្ថិតក្នុងភូមិទឹកក្រហម ឃុំកណ្ដោល ស្រុកទឹកឈូ ខេត្តកំពត ។
តាមពាក្យបណ្តឹងជនរងគ្រោះបញ្ជាក់ថា នៅវេលាម៉ោងខាងលើ នាងដែលជាជនរងគ្រោះបានជិះម៉ូតូម្នាក់ឯងតាមប្រឡាយទឹកចិនទៅដល់ចំណុចក្បែរផ្ទះពូលីក៏ឈប់ ។ ពេលនោះ ជនសង្ស័យឈ្មោះ លីន ក្រេះ បានជិះម៉ូតូដេញតាមនាងពីក្រោយ ហើយក៏បានឈប់នៅលើភ្លឺប្រឡាយក្បែរនាង ស្រាប់តែជនសង្ស័យបានស្ទុះទៅចាប់នាងផ្តួល ក្នុងគោលបំណងប៉ុនប៉ងរំលោភសេពសន្ថវៈ តែជនរងគ្រោះបានប្រវាយប្រតប់លើជនសង្ស័យវិញ និងបានរត់ចូលផ្ទះប្រជាពលរដ្ឋឲ្យគេជួយ ហើយជនសង្ស័យក៏បានរត់ឡើងជិះម៉ូតូគេចខ្លួនបាត់ ។ ក្រោយពីទទួលបានពាក្យបណ្តឹងរបស់ជនរងគ្រោះ សមត្តកិច្ច បានធ្វើការស្រាវជ្រាវតាមរកចាប់ខ្លួនជនសង្ស័យនាំមកចាត់ការតាមផ្លូវច្បាប់។ (សម្រួលដោយ៖ ស្រីណា)
ចែករំលែកព័តមាននេះ