ខេត្តកំពង់ស្ពឺ ៖ បើតាមសេចក្តីរាយការណ៍បឋមបានឱ្យដឹងថា ពិតជានឹកស្មានមិនដល់សោះថា ហ្វូងសត្វទន្សោង១ហ្វូងបង្ហាញខ្លួននៅក្នុងព្រៃសហគមន៍មួយនាស្រុកថ្ពងនោះ គឺសហគមន៍ប្រាំបីមុម។ ការបង្ហាញខ្លួនរបស់ហ្វូងសត្វកម្រនេះ ត្រូវបានថ្នាក់ដឹកនាំ និងមន្ត្រីរាជការជុំវិញខេត្ត ព្រមទាំងមហាជនមានការចាប់អារម្មណ៍…
ខេត្តកំពង់ស្ពឺ ៖ បើតាមសេចក្តីរាយការណ៍បឋមបានឱ្យដឹងថា ពិតជានឹកស្មានមិនដល់សោះថា ហ្វូងសត្វទន្សោង១ហ្វូងបង្ហាញខ្លួននៅក្នុងព្រៃសហគមន៍មួយនាស្រុកថ្ពងនោះ គឺសហគមន៍ប្រាំបីមុម។ ការបង្ហាញខ្លួនរបស់ហ្វូងសត្វកម្រនេះ ត្រូវបានថ្នាក់ដឹកនាំ និងមន្ត្រីរាជការជុំវិញខេត្ត ព្រមទាំងមហាជនមានការចាប់អារម្មណ៍ និងសំដែងក្តីសោមនស្សយ៉ាងខ្លាំង។
បើតាមមន្ត្រីសាលាខេត្ត១រូបប្រាប់ថា «កាលពីរសៀលថ្ងៃទី១០ កញ្ញា លោក វ៉ី សំណាង អភិបាលនៃគណៈអភិបាលខេត្ត រួមជាមួយថ្នាក់ដឹកនាំជុំវិញខេត្តបានអញ្ជើញទស្សនាសត្វទន្សោងដ៏កម្រប្រមាណ៨០ក្បាលដែលកំពុងរស់នៅលើភ្នំព្រះពួយ ស្ថិតក្នុងភូមិត្រពាំងក្រើញ ឃុំប្រាំបីមុម ស្រុកថ្ពង »។ មន្ត្រីដដែលបន្តថា «ក្រោយពីឃើញបែបនេះហើយ ធ្វើឲ្យមន្ត្រី ក៏ដូចជាថ្នាក់ដឹកនាំខេត្តបង្ហាញអារម្មណ៍សប្បាយរីករាយ ព្រោះថាសត្វនេះគឺជាសត្វកម្រ »។
បើតាមលោកសឿន ឡាយ ប្រធានសហគមន៍ប្រាំបីមុមប្រាប់តាមទូរស័ព្ទនាព្រឹកថ្ងៃទី១៣កញ្ញានេះថា «កាលពីបង្កើតសហគមន៍ដំបូងនៅឆ្នាំ២០០៣ គឺមានតែ៣០ក្បាលទេ រហូត២០០៤ ក៏ឃើញមាន៤០ក្បាល លុះដល់បច្ចុប្បន្ននេះមានចំនួន៨០ក្បាលហើយ រស់នៅ៤ហ្វូងផ្សេងៗគ្នា។ លោករំលឹកថា «កាលពីបង្កើតដំបូងលោក និងសមាជិករបស់លោករស់នៅក្នុងព្រៃដើម្បីការពារសត្វទាំងនេះ គឺឯកាខ្លាំងណាស់ ព្រោះព្រៃមានទំហំដល់១២២១ហិកតាហ៊ុមព័ទ្ធជុំវិញដោយចំការអំពៅ»។
លោកគាវ លាងគា អភិបាលស្រុកថ្ពង បានប្រាប់ដែរថា «បន្ទាប់ពីមានសេចក្តីរាយការណ៍ពីខាងសហគមន៍អំពីវត្តមានរបស់ហ្វូងសត្វ ក៏ដូចជាការអំពាវនាវរកការឧបត្ថម្ភគាំទ្រ។ លោកវ៉ី សំណាង អភិបាលខេត្តក៏ឆ្លៀតពេលដ៏មមាញឹកពីការងារចុះមកពិនិត្យដោយនាំមកនូវការគ្រឿងឧបភោគបរិភោគមួយចំនួនមកជូនដល់សមាជិកស្ម័គ្រចិត្តក្នុងសហគមន៍ក្នុងម្នាក់ថវិកា១០ម៉នរៀល អង្ករ២៥គីឡូ សំលៀកបំពាក់១កំប្លេ មី១កេស ទឹកត្រីទឹកស៊ីអ៊ីវ១យួរផងដែរ»។
គួររំលឹកថា កាលពីអំឡុងឆ្នាំ២០១២ និង២០១៣ ហ្វូងសត្វទាំងនេះត្រូវបានក្រុមមនុស្សខិលខូចលួចមកយាយីជីវិតយ៉ាងខ្លាំង រហូតដល់ឆ្នាំ២០១៨ ខាងសមត្ថកិច្ចឃាត់ខ្លួនមេក្លោងម្នាកើបញ្ជូនទៅតុលាការ លុះចាប់តាំងពីពេលនោះមកគ្មានជនណាហ៊ានចូលមកបរបាញ់សត្វទាំងនេះទៀតឡើយ។ (កែសម្រួលដោយ ៖ បុប្ផា)
ចែករំលែកព័តមាននេះ