នៅប្រទេសបារ៉ែនប៉ូលិសជាច្រើនរយនាក់បានបំបែកពួកបាតុករកាលពីព្រឹកថ្ងៃទី១៦ មីនា នៅទីលាន PERLE កណ្តាលរាជធានីម៉ាណាម៉ាក្រោយការវាយលុកមួយមក។
តង់ជាច្រើនដែលពួកបាតុករបោះសំរាប់ជ្រកនាពេលយប់ត្រូវបានដុតកំទេច ហើយមានពពកផ្សែងខ្មៅហុយចេញពីលើតំបន់នោះ។ លើកមកកាន់ទីនោះដោយជិះរថក្រោះ រថយន្តយោធា និងរថយន្តបឺស ប៉ូលិសប្រឆាំងកុប្បកម្មបានបាញ់ឧស្ម័នបង្ហូរទឹកភ្នែករួចលុកសំដៅទីលានបាញ់កាំភ្លើងលើពួកបាតុករដែលបោះជំរំនៅទីនោះចាប់តាំងពីថ្ងៃទី១៩ កុម្ភៈ មក ដើម្បីទាមទារឱ្យមានការកែទម្រង់។
នាពេលយប់ពួកមេដឹកនាំស៊ីអ៊ីតបារ៉ែនបានអំពាវនាវដល់សហគមន៍អន្តរជាតិ និងពិភពអ៊ិស្លាមឱ្យធ្វើអន្តរាគមន៍ដើម្បីចៀសវាងការ
សំលាប់រង្គាលក្នុងព្រះរាជាណាចក្រនេះដែលព្រះមហាក្សត្រប្រកាសអាសន្នក្រោយការលើកមកដល់នៃកងទ័ពរបស់បណ្តាប្រទេសនៅជាប់ឈូងសមុទ្រពែរ្ស៍ដើម្បីជួយទប់ទល់នឹងបាតុកម្ម។ បាតុករម្នាក់បានត្រូវស្លាប់កាលពីយប់ថ្ងៃទី១៥ មីនា ក្នុងការប៉ះទង្គិចគ្នាជាមួយកងកម្លាំងសន្តិសុខក្នុងភូមិស៊ីអ៊ីត ស៊ីត្រាស្ថិតនៅចំងាយ៥គីឡូម៉ែត្រភាគខាងត្បូងក្រុងម៉ាណាម៉ា។ មនុស្សជាង២០០នាក់បានត្រូវរបួសដោយគ្រាប់កាំភ្លើង ហើយមនុស្ស២០០នាក់ទៀតរងការប៉ះពាល់ដោយឧស្ម័នបង្ហូរទឹកភ្នែកបញ្ជូនមកមន្ទីរពេទ្យ៕
ចែករំលែកព័តមាននេះ