រាជធានីភ្នំពេញ ៖ មហាជននានាកំពុងងឿងឆ្ងល់ថា បើការប្រកួតកីឡាអុកចត្រង្គលែងមានហើយក្នុងព្រឹត្តិការសង្ក្រាន្តដែលធ្លាប់ធ្វើនៅខេត្តសៀមរាប តើកីឡាមួយនេះនឹងអាចបន្តសកម្មភាពឬមានការរីកចម្រើនទេ ក្នុងពេលដែលអ្នកខ្លាំងខាងអុកចត្រង្គក៏មិនសូវផុលផុសក្នុងទីផ្សារប្រកួតប្រជែងដែរនោះ ។
កីឡាករ ឈាវ បូរ៉ា ដែលល្បីឈ្មោះផ្នែកអុកចក្រត្រង្គឬអុកខ្មែរ បន្ទាប់ពីដណ្ដើមបានពានជាប់ៗគ្នាកាលពីច្រើនឆ្នាំមុន ក្នុងព្រឹត្តិការណ៍សង្ក្រាន្តសៀមរាបនោះអះអាងថា រូបគេនៅតែមមាញឹកក្នុងការរំលេចសកម្មភាពមិនខុសពីមុននោះទេ ដែលសកម្មភាពបង្ហាត់បង្រៀនក្មេងៗ និងអ្នកចង់ប្រកួតអុកនៅក្នុងសាលា និងក្នុងហាងកាហ្វេរបស់គេគឺនៅតែមាន ។ រូបគេនឹងបន្ត សម្រេចបំណងទទួលបានការបណ្ដុះបណ្ដាលផ្នែកអុកអន្តរជាតិនៅក្រៅប្រទេសឲ្យខាងតែបាន និងកំពុងស្វះស្វែងរកលទ្ធភាពបានចេញទៅសិក្សា ។
ឈាវ បូរ៉ា និយាយថា ការបញ្ចប់ព្រឹត្តិការណ៍សង្ក្រាន្ត ដែលធ្លាប់ជួយឲ្យកីឡាអុកចត្រង្គទទួលបានការគាំទ្រ ពិតជាធ្វើឲ្យប៉ះពាល់ដល់កីឡាករផ្នែកនេះ ជាពិសេសនៅពេលការប្រកួតជាទ្រង់ទ្រាយធំត្រូវបិទ គឺច្បាស់ណាស់ថាកីឡាករមួយចំនួននឹងចាប់ផ្ដើមលាឈប់។ ប៉ុន្តែ ដ្បិតថាគ្មានសកម្មភាពសង្ក្រាន្តបែបនេះក្តី ក៏សកម្មភាពប្រកួតជាលក្ខណៈសហព័ន្ធនៅតែមាន ។ ទាំងអ្នកហាត់រៀននិងកីឡាករ នៅតែប្រមូលផ្ដុំគ្នាលេងអុកកម្សាន្តបង្កើនសមត្ថភាពដដែលទេ ដោយគ្រាន់តែមិនមានការប្រកួតជាទ្រង់ទ្រាយធំ គឺអ្នកខ្លាំងជាច្រើននាក់មិនមានឱកាសបញ្ចេញថ្វីដៃ ។
ស្ដេចអុក២ជំនាន់ និងជាអគ្គលេខាធិការសហព័ន្ធអុកចត្រង្គកម្ពុជារូបនេះ បន្តថា អ្នកខ្លះថាអុកចាប់ផ្ដើមស្ងាត់សកម្មភាព ហើយទាំងរូបគេនិងកីឡាករខ្លះបោះបង់ចោល ។ ប៉ុន្តែសម្រាប់រូបគេគឺនៅតែដដែល និងកាន់តែចង់សម្រេចមហិច្ឆតាក្លាយជាអ្នកលេងអុកអន្តរជាតិឲ្យបានទៀតផង ។
ឈាវ បូរ៉ា ពន្យល់ថា អុកចិននិងអុកអន្តរជាតិ មានលក្ខណៈខុសគ្នាឆ្ងាយពីអុកចត្រង្គរបស់ខ្មែរយើងតាំងពីរបៀបលេង និងចំណុចពិសេសជាច្រើនទៀត ដែលធ្វើឲ្យអុកទាំង២មិនអាចច្រឡំគ្នាបានទេ បើទោះជាមានឈ្មោះថាអុកដូចគ្នាក្ដី ។ អ៊ីចឹងហើយ ទើបនៅប្រទេសកម្ពុជា បានបែងចែកកីឡាអុកជាពីរគឺ អុកចត្រង្គនិងអុកអន្តរជាតិ ប៉ុន្តែកីឡាអុកអន្តរជាតិនៅកម្ពុជាមិនសូវដើរទេ ដោយសារតែកីឡាករភាគច្រើននិយមលេងតែអុកខ្មែរ ហើយសម្រាប់ការប្រកួតក្នុងស្រុកក៏មិនសូវមានការប្រកួតអុកអន្តរជាតិដែរ ។
ចំណែកគ្រូបង្វឹកផ្នែកអុកអន្តរជាតិ ក៏មិនមានអ្នកជំនាញពិតប្រាកដមកបណ្ដុះកូនខ្មែរដែលចង់ចេះនោះដែរ ទើបធ្វើឲ្យសូម្បីតែរូបគេដែលចង់ចេះផ្នែកអុកអន្តរជាតិនេះ មិនមានជម្រើសក្រៅពីលេងតាមយូធូប ប្រសិនបើចង់ចេះស្ទាត់។ រូបគេចង់ឲ្យប្រទេសកម្ពុជាមានការរីកចម្រើនលើកីឡាអុកអន្តរជាតិឲ្យច្រើនជាង ឬស្មើនឹងអុកចត្រង្គ ដោយសាររូបគេយល់ថា បើកម្ពុជាមានតែអុកចត្រង្គរីកចម្រើន ហើយចូលមិនចុះនឹងអុកអន្តរជាតិ គឺមិនខុសពីល្បីតែក្នុងអណ្ដូង តែលទ្ធផលចុងក្រោយមិនអាចបោះជំហានស្មើមុខស្មើមាត់លើឆាកអន្តរជាតិឡើយ។
ឈាវ បូរ៉ា និយាយថា កីឡាអុកចត្រង្គមានការរីកចម្រើនក្នុងប៉ុន្មានឆ្នាំចុងក្រោយនេះ ហើយ រូបគេបើកសាលាបណ្ដុះបណ្ដាលក៏មានអ្នករៀនច្រើនដែរ ប៉ុន្តែនៅពេលមានការអញ្ជើញតំណាងកម្ពុជាឲ្យចេញប្រកួតកីឡាអុកអន្តរជាតិជាមួយនឹងបណ្ដាប្រទេសផ្សេងៗ គឺកម្ពុជានៅតែទៅមិនរួច ។
រូបគេចង់បង្វឹកខ្លួនឯងឲ្យចេះលេងអុកអន្តរជាតិនាពេលខាងមុខ ប៉ុន្តែមកទល់ពេលនេះអុកអន្តរជាតិអត់មានអ្នកបង្រៀននៅក្នុងប្រទេសកម្ពុជាទាល់តែសោះ គឺមានតែនៅក្រៅស្រុក ។ ហេតុនេះហើយ ទើបរូបគេមានបំណងស្នើឲ្យគណៈកម្មាធិការជាតិអូឡាំពិកកម្ពុជា ប្រើយុទ្ធសាស្ត្របែបណាដើម្បីឲ្យកម្ពុជាមានគ្រូបង្វឹកផ្នែកកីឡាអុកអន្តរជាតិ ដើម្បីជាប្រយោជន៍ដល់កីឡាករអុកចត្រង្គ ។
ឈាវ បូរ៉ា ប្រកាសថា បើមានគ្រូបង្វឹក រូបគេនឹងស្ម័គ្រចិត្តទៅសិក្សាមុនគេ ដើម្បីឈ្វេងយល់ឲ្យស៊ីជម្រៅ ។ រូបគេចង់ឲ្យកីឡាអុកអន្តរជាតិមានរូបភាពទូលំទូលាយនៅក្នុងប្រទេស ហើយបើបានទទួលការជ្រោមជ្រែងឲ្យចេញទៅហាត់រៀននៅក្រៅប្រទេស នោះរូបគេនឹងសិក្សាជំនាញនោះឲ្យបានស្ទាត់ដូចការចង់បាន គឺនឹងប្រឹងប្រែងឲ្យអស់ពីសមត្ថភាព ។ រូបគេចង់ក្លាយជាអ្នកជំនាញផ្នែកអុកអន្តរជាតិ បើទោះជាបច្ចុប្បន្នគឺជាអគ្គលេខាធិការសហព័ន្ធអុកចត្រង្គដែលមិនអាចទៅធ្វើជាកីឡាករអុកអន្តរជាតិ នៅក្នុងសហព័ន្ធផ្សេងក្តី ។
ឈាវ បូរ៉ា និយាយទៀតថា រូបគេចង់ចេះជំនាញនេះឲ្យស្ទាត់ ដើម្បីទុកគ្រាន់បង្ហាត់សិស្សផង ឬអាចវិវត្តន៍ខ្លួនឲ្យក្លាយជាកីឡាករអុកអន្តរជាតិផងនៅពេលណាមួយ ដោយសារមានបំណងធំមួយ គឺចង់ឈ្នះពានក្នុងនាមជាម្ចាស់ជើងឯកអុកអន្តរជាតិមួយទៀត បន្ទាប់ពីបានក្លាយជាម្ចាស់ពានជើងឯកអុកចត្រង្គច្រើនដងមកហើយ ។
នៅក្នុងកាលៈទេសៈដែលកម្ពុជាមិនទាន់មានអ្នកបង្វឹកក្នុងស្រុក រូបគេនៅតែបន្តរៀនលេងអុកអន្តរជាតិតាមបណ្ដាញយូធូប ហើយបើរៀនបានស្ទាត់ជំនាញដូចការចង់បាន នឹងសាកល្បងចូលប្រកួតក្នុងកម្មវិធីណាមួយឲ្យខាងតែបាន។ ប្រសិនបើការប្រកួតមានលទ្ធផលល្អ នោះរូបគេនឹងងាកមកបើកបង្រៀនអុកអន្តរជាតិនេះមួយទៀត ដើម្បីចែករំលែកចំណេះដឹង និងដើម្បីរូបគេទទួលបានកេរ្តិ៍ឈ្មោះល្បីលើផ្នែកនេះបន្ថែមទៀត ៕ (កែសម្រួលដោយ ៖ បុប្ផា)
ចែករំលែកព័តមាននេះ