ខេត្តកំពង់ធំ ៖ បុរសចំណាស់២នាក់នាំគ្នាចងមីក្រូដើម្បីចាក់រៃអង្គាសបច្ច័យយកមកជួសជុលផ្លូវ ស្រាប់តែប៉ះចំខ្សែភ្លើងស្រាត បណ្តាលឱ្យឆក់ស្លាប់ម្នាក់ ចំណែកម្នាក់ទៀតរងរបួសធ្ងន់ ។ នាំគ្នាចងមីក្រូ ស្រាប់តែជួបគ្រោះអកុសល ស្លាប់ម្នាក់ សង្គ្រោះបន្ទាន់ម្នាក់
ហេតុការណ៍ខាងលើនេះបង្កឱ្យមានការភ្ញាក់ផ្អើលកាលពីវេលាម៉ោង១០និង៣០នាទីព្រឹកថ្ងៃទី១០ ខែកញ្ញា ឆ្នាំ២០១៩ នៅចំណុចផ្ទះឈ្មោះ អេប ភ័ន ភេទប្រុស អាយុ៦១ឆ្នាំ ស្ថិតនៅក្នុងភូមិក្រវ៉ា ឃុំក្រវ៉ា ស្រុកបារាយណ៍ ខេត្តកំពង់ធំ ។
ជនរងគ្រោះទាំង២នាក់ខាងលើ ក្នុងនោះម្នាក់ឈ្មោះ ហេង ប៊ុណ្ណា ភេទប្រុស អាយុ៦៥ឆ្នាំ បានស្លាប់ ចំណែកម្នាក់ទៀតឈ្មោះសួន មេត ភេទប្រុស អាយុ៦៣ឆ្នាំ បានរងរបួសធ្ងន់ ។ ជនរងគ្រោះទាំង២នាក់រស់ នៅភូមិកើតហេតុខាងលើ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ ជនរងគ្រោះទាំងពីរនាក់ខាងលើបានចងមីក្រូដើម្បីចាក់រៃអង្គាសបច្ច័យយកមកធ្វើការជួសជុលផ្លូវ តែជាអកុសលខណៈពេលដែលជនរងគ្រោះចងមីក្រូរួច រៀបចំលើកបញ្ឈរទៅហើយ ស្រាប់តែប៉ះចំខ្សែភ្លើងស្រាត បណ្តាលអោយឆក់ស្លាប់ម្នាក់ ចំណែកម្នាក់ទៀតរងរបួសធ្ងន់ត្រូវបានប្រជាពលរដ្ឋនាំគ្នាសែងយកទៅកប់ដីខ្សាច់ ដើម្បីជួយសង្គ្រោះ។
បន្ទាប់ពីទទួលបានព័ត៌មានខាងលើភ្លាម សមត្ថកិច្ចជំនាញនគរបាលស្រុកបារាយណ៍សហការជាមួយប៉ុស្តិ៍នគរបាលរដ្ឋបាលក្រវ៉ា និងអាជ្ញាធរមូលដ្ឋានចុះមកពិនិត្យកន្លែងកើតហេតុបានសន្ឋិដ្ឋានថា បុរសរងគ្រោះទាំង២នាក់ខាងលើពិតជាត្រូវចរន្តអគ្គិសនីឆក់ បណ្តាលឱ្យស្លាប់ម្នាក់ និងរបួសធ្ងន់ម្នាក់ប្រាកដមែន ។
ក្រោយពីពិនិត្យរួច សមត្ថកិច្ចបានប្រគល់សពឱ្យក្រុមគ្រួសារដើម្បីយកទៅចាត់ចែងធ្វើបុណ្យតាមប្រពៃណី ចំណែកអ្នករងរបួសធ្ងន់ម្នាក់ទៀតត្រូវបានបញ្ចូនទៅមន្ទីរពេទ្យដើម្បីជួយសង្គ្រោះបន្ទាន់ផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ