រាជធានីភ្នំពេញ៖ កំណើននៃវិនិយោគិនចិននៅកម្ពុជានៅតែជាប្រធានបទក្ដៅ សម្រាប់ពលរដ្ឋកម្ពុជាជជែកវែកញែកពីការវិនិយោគរបស់ពួកគេលើទឹកដីកម្ពុជាទាំងវិស័យសំណង់ អចលទ្រព្យ និងផលិតផលជលផលជាដើម ដោយសារតែចិន គឺជាអ្នកវិនិយោគធំទាំងនៅភ្នំពេញ និងបណ្ដាខេត្តមួយចំនួន ជាក់ស្ដែងការវិនិយោគធំៗទាំងសណ្ឋាគារ កាស៊ីណូ…
រាជធានីភ្នំពេញ៖ កំណើននៃវិនិយោគិនចិននៅកម្ពុជានៅតែជាប្រធានបទក្ដៅ សម្រាប់ពលរដ្ឋកម្ពុជាជជែកវែកញែកពីការវិនិយោគរបស់ពួកគេលើទឹកដីកម្ពុជាទាំងវិស័យសំណង់ អចលទ្រព្យ និងផលិតផលជលផលជាដើម ដោយសារតែចិន គឺជាអ្នកវិនិយោគធំទាំងនៅភ្នំពេញ និងបណ្ដាខេត្តមួយចំនួន ជាក់ស្ដែងការវិនិយោគធំៗទាំងសណ្ឋាគារ កាស៊ីណូ នៅខេត្តព្រះសីហនុ កំពុងកាន់កាប់ដោយវិនិយោគិនចិន ហើយភ្នំពេញក៏ការវិនិយោគធំៗគឺគ្រប់គ្រងដោយជនជាតិចិនដែរ ។ ទន្ទឹមនឹងមុខជំនួញនិងការវិនិយោគធំៗកំពុងក្តោបក្នុងដៃរបស់វិនិយោគិនចិន ឈ្មួញចិនខ្លះ ក៏បាននាំចូលបង្កងពីប្រទេសមកផ្គត់ផ្គង់តាមភោជនីយដ្ឋានរបស់ចិននៅក្រុងភ្នំពេញផងដែរ ។
ដោយឡែកខេត្តកំពត ក៏មិនរំលងពីវិនិយោគិនចិននោះទេ ព្រោះទឹកដីខេត្តមាត់សមុទ្រមួយនេះ ក៏មានជនជាតិចិនជាច្រើនកំពុងបាញ់ឆ្ពោះការវិនិយោគរបស់ខ្លួនទៅកាន់តំបន់ដ៏ស្រស់ស្អាតមួយនេះ។ ជាក់ស្ដែងក្រុមហ៊ុនវិនិយោគិនចិនមួយ បាននិងកំពុងសិក្សាពីការវិនិយោគលើការចិញ្ចឹមបង្គានៅក្នុងខេត្តកំពត ដោយបានបោះទុនប្រមាណ ១លានដុល្លារក្នុងការដកបទពិសោធន៍ ។ នេះបើយយោងតាមព័ត៌មានពីក្រសួងកសិកម្ម រុក្ខាប្រមាញ់ និងនេសាទ ។
ប្រភពខាងលើបានដកស្រង់សម្ដីលោក សុប សារាប៊ុទ្ទី ប្រធានបច្ចេកទេសនៃក្រុមហ៊ុន ហ្គ្រេនហុងយាន អេឃ្វើខលឈ័រ ខេមបូឌា បាននិយាយថាបច្ចុប្បន្ន ក្នុងកសិដ្ឋានបានយកបច្ចេកវិទ្យាពីប្រទេសចិន ក្នុងការសាងសង់ ការចិញ្ចឹម ផ្ដល់ចំណី ការគ្រប់គ្រង ប្រើប្រាស់ទឹក និងសម្អាតទឹក មកអនុវត្តន៍ហើយ ។ លោក សុប សារាប៊ុទ្ទី បានបន្តថា «យើងមានអាងចំនួន៣៤អាងហើយ ក្នុងនោះ យើងចិញ្ចឹមរយៈ៣ខែយើងអាចទទួលបានបង្គាលក់លើទីផ្សារហើយ ។ ស្ដង់ដារបង្គាលក់លើទីផ្សារគឺប្រមាណពី៣០ទៅ ៣៥ក្បាលនឹងគ្រប់១គីឡូក្រាមនិងទទួលបានតម្លៃពី៤ពាន់ទៅ៥ពាន់រៀល ក្នុងមួយគីឡូក្រាម » ។ លោកបានបន្តថា រហូតមកដល់ពេលនេះ ក្រុមហ៊ុនបានចំណាយប្រាក់ប្រមាណ១លានដុល្លារអាមេរិកហើយក្នុងការអនុវត្តន៍គម្រោង និងត្រូវបន្ថែមទុនក្នុងការពង្រីកអាងចិញ្ចឹមបន្ថែម ។ បច្ចុប្បន្ន ក្រុមហ៊ុនបានពង្រីកអាងបានចំនួន៣២រោងហើយនៅលើទំហំផ្ទៃដីប្រមាណ៣២ហិចតា ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍នៅក្នុងពេលបំពេញទស្សនកិច្ចកសិដ្ឋានចិញ្ចឹមបង្គារបស់ចិននៅខេត្តកំពតនេះថា ការវិនិយោគលើការចិញ្ចឹមបង្គានេះ គឺជាការឆ្លើយតបនឹងទៅចក្ខុវិស័យរបស់រាជរដ្ឋាភិបាល ដែលជំរុញការអភិវឌ្ឍវិស័យវារីវប្បកម្មនៅក្នុងស្រុក ដើម្បីកាត់បន្ថយការនាំចូលផលិតផលជលផល ពីក្រៅប្រទេសមកកាន់កម្ពុជា ។ នេះ គឺជាការឆ្លើយតបមួយទៅនឹងតម្រូវការទីផ្សារផលិតផលជលផលក្នុងស្រុក ហើយក្នុងនាមអាជ្ញាធរសូមលើកទឹកចិត្តដល់ក្រុមហ៊ុន បន្តដាក់ទុនវិនិយោគបន្ថែមទៀត ក្នុងវិស័យវារីវប្បកម្ម នៅកម្ពុជាដើម្បីជំរុញកំណើនសេដ្ឋកិច្ចក្នុងស្រុករបស់កម្ពុជា ។
លោករដ្ឋមន្ត្រីបានបន្តថា ការចូលរួមពីវិស័យឯកជនក្នុងការវិនិយោគនេះ ពិតជាបានចូលរួមចំណែកបង្កើតការងារជូនប្រជាពលរដ្ឋនៅមូលដ្ឋាន បង្កើនចំណូលក្នុងគ្រួសារ និងកាត់បន្ថយភាពក្រីក្រ ពិសេសចូលរួមអនុវត្តគោនយោបាយ និងផែនការអភិវឌ្ឍវិស័យកសិកម្ម ស្របតាមអភិក្រម «រដ្ឋ ឯកជន ដៃគូអភិវឌ្ឍ និងសហគមន៍កសិកម្ម»។ លោក វេង សាខុន បានបញ្ជាក់ថា ចាប់តាំងពីរាជរដ្ឋាភិបាលកម្ពុជា បានអនុវត្តន៍នូវគម្រោងអភិវឌ្ឍន៍វិស័យវារីវប្បកម្មមក ឃើញថាវិស័យន មានការរីកលូតលាស់គួរអោយកត់សម្គាល់ ហើយការនាំចូលផលិតផលវារីវប្បកម្មពីខាងក្រៅប្រទេសក៏បានកាត់បន្ថយច្រើន ជាពិសេសផលិតផលទឹកសាប ដូច្នេះតាមរយៈគម្រោងវិនិយោគបន្តបន្ទាប់ទៀតរបស់ ក្រុមហ៊ុនចិនមួយនេះរំពឹងថានឹងអាចកាត់បន្ថយបាននូវការនាំចូលពីខាងក្រៅបានច្រើនថែមទៀត។
សូមរំលឹកផងដែរថា ដោយសារតែមានការវិនិយោគពីជនជាតិចិននៅខេត្តកំពត ទីតាំងផលិតអំបិលខេត្តកំពត កំពុងត្រូវបានផ្លាស់ប្តូរពីការផលិតអំបិលទៅប្រកបអាជីវកម្មផ្សេងៗហើយ ជាក់ស្ដែងបើតាមលោក ប៊ុន បារាំង ប្រធានសមាគមអ្នកផលិតអំបិលខេត្តកំពត បាននិយាយថា ពលរដ្ឋដែលជាអ្នកផលិតអំបិល កាលពីមុននោះ បានផ្លាស់ប្តូរអាជីវកម្មរបស់ខ្លួនហើយ ហើយមួយចំនួនក៏បានលក់ដីស្រែអំបិលនោះផងដែរ ។ យើងក៏មិនដឹងថា ពួកគាត់លក់អោយអ្នកណាដែរ ។ យ៉ាងណាក៏ដោយគេសង្ស័យថា ពលរដ្ឋផលិតអំបិលទាំងនោះ អាចលក់ទៅអោយវិនិយោគិនចិនវិនិយោគអ្វីផ្សេង ។
ចំណែកនៅរាជធានីភ្នំពេញវិញ ឈ្មួញជនជាតិចិនមួយរូបដែលបដិសេធមិនបញ្ចេញឈ្មោះតែអាចនិយាយភាសាខ្មែរបានខ្លះៗបានឲ្យដឹងថាខ្លួនបាននាំចូលបង្កងចិន មកផ្គត់ផ្គង់តាមភោជនីយដ្ឋានរបស់ចិនជាច្រើនកន្លែងនៅក្រុងភ្នំពេញ ។ «ជាទូទៅ បង្កងនេះគឺនាំមកពីចិន ហើយយើងលក់បន្តទៅភោជនីយដ្ឋានរបស់ចិន ដែលគេត្រូវការ។ ជាទូទៅ ខ្ញុំលក់មួយកេះ គឺមានទម្ងន់ ២០ គីឡួក្រាមក្នុងតម្លៃ ១៨ដុល្លារក្នុងមួយគីឡួក្រាម អញ្ចឹងភោជនីយដ្ឋានខ្លះគេយកមួយកេះមានបង្កងសរុបទម្ងន់២០គីឡូក្រាម» ។
នេះជាការបញ្ជាក់អះអាងរបស់ឈ្មួញជនជាតិចិនមួយរូប ។ បុរសជនជាតិចិនខាងលើទើបនាំចូលបង្កងពីចិន មកលក់នៅក្រុងភ្នំពេញបានរយៈពេលជិត ១ ឆ្នាំហើយ ដោយបង្កងទាំងនោះរៀបចំដាក់ក្នុងកេះស្នោរនិងដឹកជញ្ជួនពីប្រទេសចិនរៀងរាល់៣ ទៅ ៤ ថ្ងៃម្តងទើបខ្លួនឡើងទៅយកនៅព្រលានយន្តហោះ ៕ កែសម្រួលដោយ ៖ សុឃាក់
ចែករំលែកព័តមាននេះ