រាជធានីភ្នំពេញ៖ ការធ្វើពាណិជ្ជកម្មទ្វេភាគីរវាងកម្ពុជា និងថៃ គិតត្រឹមរយៈពេល៦ខែដើមឆ្នាំ២០១៩នេះ មានទឹកប្រាក់សរុបប្រមាណជាង ៤.១៥៤លានដុល្លារអាមេរិក ពោលគឺមានការឡើងជាង៧% ប្រើប្រៀបធៀបនឹងឆ្នាំ២០១៨ ដែលមានត្រឹមតែ ៣.៨៧៥លានដុល្លារអាមេរិក ។ នេះបើយោងតាមរបាយការណ៍ដែលផ្តល់ដោយមន្ត្រីស្ថានទូតថៃប្រចាំនៅកម្ពុជា។
របាយការណ៍ដដែលបានគូសបញ្ជាក់ថា ក្នុងរយៈពេល៦ខែដើមឆ្នាំ២០១៩នេះ ថៃនាំចូលពីកម្ពុជាមានទឹកប្រាក់ជាង ៦៨៤លានដុល្លារអាមេរិកកើនឡើងរហូតដល់ជាង៥១% ខណៈថៃនាំចូលកាលពីឆ្នាំ២០១៨មានទំហំទឹកប្រាក់ជាង៤៥០លានដុល្លារអាមេរិកតែប៉ុណ្ណោះ។ ចំណែកថៃនាំចេញមកកម្ពុជាមានទឹកប្រាក់ជាង៣.៤៦៩,៦១លានដុល្លារអាមេរិកកើនឡើងតែ១,៣០% ខណៈនៅឆ្នាំ២០១៨មាន៣.៤២៥,២១លានដុល្លារអាមេរិក។
ប្រភពដដែលបានគូសបញ្ជាក់ថា កាលឆ្នាំ២០១៦ ទំហំពាណិជ្ជកម្មសរុបរវាងកម្ពុជានិងថៃ មានទឹកប្រាក់ ៥.៦០៩,៤៨លានដុល្លារអាមេរិកកើនតែ០,២១%, ឆ្នាំ២០១៧មាន ៦.១៨៨,៧៦លានដុល្លារអាមេរិកកើន១០,៣៣% និងឆ្នាំ២០១៨មាន៨.៣៨៧,៩៧លានដុល្លារអាមេរិកកើនឡើង៣៥,៥៤%។ ការធ្វើពាណិជ្ជកម្មរួមរវាងកម្ពុជា និងថៃនៅពេលកន្លងមកក៏ដូចជានៅពេលបច្ចុប្បន្ននេះកម្ពុជានាំចេញទៅប្រទេសថៃភាគច្រើនជាទំនិញកសិផល ហើយការនាំចេញកន្លងមកមានបញ្ហាមួយចំនួនតែមកដល់សព្វថ្ងៃនេះប្រទេសទាំងពីរបានបង្កើតក្រុមចាំជួយសម្របសម្រួលលើការនាំចេញ។
លោក ស៊ាង ថៃ មន្ត្រីអ្នកនាំពាក្យក្រសួងពាណិជ្ជកម្មមានប្រសាសន៍ឱ្យដឹងកាលពីថ្ងៃទី ៩ ខែកញ្ញាម្សិលមិញនេះថា «កន្លងទៅក្រសួងពាណិជ្ជកម្មកម្ពុជាតែងមានយន្តការមួយចំនួនដើម្បីឱ្យការនាំចេញមានកំណើនទៅប្រទេសថៃឱ្យមានភាពងាយស្រួល ហើយទំនិញដែលកម្ពុជានាំចេញទៅប្រទេសថៃភាគច្រើនជាកសិផល។ដូចនេះយើងខិតខំព្យាយាមចរចារជាមួយភាគីថៃ ធ្វើយ៉ាងណាឱ្យការនាំចេញកសិផលកម្ពុជាទៅប្រទេសថៃបានស្រួលជាងពេលកន្លងទៅ»។ លោកបានលើកឡើងថា កន្លងទៅពាក់ព័ន្ធរឿងពោត ថៃមានកូតាដល់កម្ពុជានិងប្រទេសផ្សេងទៀត។ យើងបានចរចារសម្របសម្រួលជាមួយថៃ(គេ)ថា អ្នកឯងដាក់កូតាទូទៅហើយប៉ុន្តែសម្រាប់កម្ពុជា ថៃជាមិត្តភក្តិ(ប្រទេសជិតខាងគ្នា)គួរមានវិធានការបន្ធូរបន្ថយដើម្បីឱ្យការនាំចេញទំនិញទៅប្រទេសថៃបានល្អប្រសើរជាងមុន។យើងបានចរចាគ្នា ហើយកន្លងទៅភាគីនៃប្រទេសទាំងពីរបានបង្កើតក្រុមដោះស្រាយមួយ បើមានបញ្ហាអ្វីមួយពាក់ព័ន្ធនឹងការនាំចេញមានការលំបាកណាមួយ ឱ្យមានការទាក់ទងគ្នាតាមអ្នកសម្របសម្រួល ហើយកន្លងមកយើងបានដោះស្រាយបញ្ហាដែលកើតឡើងបាន»។
លោក ស៊ាងថៃ បានបន្តទៀតថា «ការធ្វើពាណិជ្ជកម្មទ្វេភាគីរវាងកម្ពុជានិងថៃនៅគ្រាបន្ទាប់យើងសង្ឃឹមថានឹងបន្តមានការរីកចម្រើនថែមទៀត ព្រោះប្រទេសកម្ពុជា ថៃ ជាប្រទេសភូមិផងរបងជាមួយគ្នា ហើយរាជរដ្ឋាភិបាលមានទំនាក់ទំនងល្អនិងក្រសួងក៏ដូចជាវិស័យឯកជនក៏មានទំនាក់ទងល្អ។ដូច្នេះយើងសង្ឃឹមថាទំហំពាណិជ្ជកម្មរបស់យើងនឹងនៅមានស្ទុះកើនឡើងថែមទៀត»៕ កែសម្រួលដោយ ៖សុឃាក់
ចែករំលែកព័តមាននេះ