រាជធានីភ្នំពេញ ៖ ក្រសួងអប់រំ យុវជន និងកីឡា បានបញ្ចប់ការស្រង់បូកពិន្ទុដោយកុំព្យូទ័រ និងការផ្ទៀងផ្ទាត់ពិន្ទុប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)១០០%ហើយ ហើយគ្រោងនឹងប្រកាសលទ្ធ ផលមុនការគ្រោងទុក១ថ្ងៃគឺនៅថ្ងៃទី៩ ខែកញ្ញា…
រាជធានីភ្នំពេញ ៖ ក្រសួងអប់រំ យុវជន និងកីឡា បានបញ្ចប់ការស្រង់បូកពិន្ទុដោយកុំព្យូទ័រ និងការផ្ទៀងផ្ទាត់ពិន្ទុប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)១០០%ហើយ ហើយគ្រោងនឹងប្រកាសលទ្ធ ផលមុនការគ្រោងទុក១ថ្ងៃគឺនៅថ្ងៃទី៩ ខែកញ្ញា សម្រាប់មណ្ឌលរាជធានីភ្នំពេញ និងខេត្តកណ្តាល ។
លោក រស់ សុវាចា អ្នកនាំពាក្យក្រសួងអប់រំយុវជន និងកីឡា បានឲ្យកោះសន្តិភាពដឹងនៅថ្ងៃទី៨ ខែកញ្ញាថា គិតត្រឹមថ្ងៃទី៧ ខែកញ្ញា ឆ្នាំ២០១៩ ដំណើរការស្រង់បូកពិន្ទុដោយកុំព្យូទ័រ និងការពិនិត្យផ្ទៀងផ្ទាត់ពិន្ទុសម្រាប់ការប្រឡងសញ្ញាបត្រមធ្យមសិក្សាទុតិយភូមិ សម្រេចបាន១០០ភាគរយហើយ ។
លោកបន្តថា ក្រសួងអប់រំយុវជន និងកីឡា នឹងប្រកាសលទ្ធផលមុនការគ្រោងទុក គឺលទ្ធផលនឹងមានប្រកាសជូននៅថ្ងៃទី៩ ខែកញ្ញា សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្ដាល និងនៅថ្ងៃទី១០ ខែកញ្ញា សម្រាប់បណ្ដាខេត្តផ្សេងៗ ។លោកបានឲ្យដឹងទៀតថា លទ្ធផលក៏នឹងមានផ្សាយជូនតាមបណ្តាញសង្គមហ្វេសប៊ុកផ្លូវការរបស់ក្រសួងអប់រំ យុវជន និងកីឡាផងដែរ ។
ជាមួយគ្នានេះ ក្រសួងអប់រំ យុវជន និងកីឡា សូមគោរពថ្លែងអំណរគុណចំពោះកិច្ចសហការវិជ្ជមានពីគ្រប់ភាគីពាក់ព័ន្ធ ដែលបន្តគោរពគោលការណ៍ច្បាប់ យុត្តិធម៌ តម្លាភាព និងលទ្ធផលអាចទទួលយកបាន ក៏ដូចជាការចូលរួមគោរពបទប្បញ្ញត្តិ ដែលមានជាធរមាននានា ។
ទាក់ទងនឹងបេក្ខជនប្រឡងជាប់ប៉ុន្មានភាគរយ និងបេក្ខជនទទួលបាននិទេ្ទសល្អប៉ុន្មាននាក់ អ្នកនាំពាក្យក្រសួងអប់រំមិនទាន់បញ្ជាក់ឲ្យដឹងនោះទេ ។ លោកគ្រាន់តែលើកឡើងថា លទ្ធផលពេញលេញនឹងប្រកាសនៅពេលខាងមុខនេះ ។
សូមជម្រាបថា អត្រាកំណែវិញ្ញាសាប្រឡងសញ្ញាបត្រមធ្យមសិក្សាទុតិយភូមិ បានបញ្ចប់ កាលពីថ្ងៃទី២៨ ខែសីហា កន្លងមក ។ បេក្ខជនប្រឡងឆ្នាំ២០១៩មានចំនួន១១៧.០៤៣នាក់(ស្រី៦០.៤២៧នាក់) មាន២០២មណ្ឌល ចែកជាថ្នាក់វិទ្យាសាស្ត្រមានបេក្ខជនចំនួន៤៤.៦៩០នាក់ មាន៧៥មណ្ឌល និងថ្នាក់វិទ្យាសាស្ត្រសង្គមមានបេក្ខជនចំនួន៧២.៣៥៣នាក់ មាន១២៧មណ្ឌល ។បេក្ខជនអវត្តមានពេលប្រឡងមាន១.៨១៨នាក់ (ស្រី៦៩៦នាក់) ត្រូវជា១,៥៥% ។
គួររំឭកថា នៅឆ្នាំ២០១៨ បេក្ខជនប្រឡងជាប់បាក់ឌុបមានចំនួន៧៦.០៣៤នាក់ ត្រូវជា៦៧,០៧ភាគរយនៃបេក្ខជនចូលរួមប្រឡងសរុប១១៧.០៦១នាក់ ។ បេក្ខជនជាប់និទ្ទេស A មានចំនួន៤០៨នាក់ និទ្ទេស B ចំនួន២.២២២នាក់ និទ្ទេស C ចំនួន ៦.០៤១នាក់ និទ្ទេស D ចំនួន១៥.១៨០នាក់ និងនិទ្ទេស C ចំនួន ៥.២១៨៣នាក់ ៕
ចែករំលែកព័តមាននេះ