រាជធានីភ្នំពេញ ៖ តំណាងសហជីពលោក ប៉ាវ ស៊ីណា បានអះអាងថា ក្រុមសហជីពនឹងខិតខំធ្វើការពន្លឿនការចរចាប្រាក់ឈ្នួលអប្បរមាកម្មករសម្រាប់ឆ្នាំ២០២០ ឲ្យបានចប់មុនការគ្រោងទុក ព្រោះថ្ងៃបុណ្យភ្ជុំបិណ្ឌកាន់តែខិតមកដល់ ។ ការបញ្ជាក់របស់មេសហជីពរូបនេះ បន្ទាប់ពីលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានបញ្ជាក់ កាលពីពេលចាប់ផ្តើមចរចាប្រាក់ឈ្នួលថា នឹងលទ្ធផលប្រាក់ឈ្នួលកម្មករសម្រាប់ឆ្នាំ២០២០នឹងដឹងនៅមុនថ្ងៃភ្ជុំបិណ្ឌ ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានឲ្យកោះសន្តិភាពដឹងនៅថ្ងៃទី៩ ខែកញ្ញានេះថា គិតចាប់ពីផ្តើមចរចាប្រាក់ឈ្នួលកម្មករសម្រាប់វិស័យកាត់ដេរសម្លៀកបំពាក់ និង ស្បែកជើងមកដល់ថ្ងៃទី៩ កញ្ញានេះ គឺជាភាគីនិយោជិក ភាគីសហជីព និងតំណាងរាជរដ្ឋាភិ បាលជជែកគ្នាមានចំនួន៣លើកហើយ។ លោកបន្តថា ភាគីសហជីពបានឯកភាពយកតួលេខ១៩៩ដុល្លារ គឺជាលេខរួមដាក់ចរចាគ្នា ចំណែកភាគីនិយោជកបានតម្លើងតួលេខពីមុន១៨២ដុល្លារ ពេលនេះកើនដល់១៨៤ដុល្លារ ។
ភាគីទាំងអស់ និងបន្តប្រជុំនៅថ្ងៃទី១២ ខែកញ្ញាខាងមុខនេះបន្តទៀត ។ សម្រាប់ការខ្វែងគំនិតគ្នាក្នុងការចរចាត្រូវលោក ប៉ាវ ស៊ីណា បញ្ជាក់ថា ៖«ធម្មតាហើយស្នើសុំ១៩៩ដុល្លារ គេឲ្យតែ២ដុល្លារ គឺ១៨៤ដុល្លារ គឺយើងនៅមានគំនៀបច្រើន គឺរហូតដល់១៥ដុល្លារ អីញ្ចឹងយើងនៅចរចាគ្នាបន្តទៀត» ។ លោកបន្តថា ការចរចាគ្នានៅថ្ងៃទី១២ កញ្ញាខាងមុខនេះក៏ជាមិនមែនជាថ្ងៃចុងក្រោយនៃការចរចារឿងប្រាក់ឈ្នួលកម្មករសម្រាប់ឆ្នាំ២០២០នេះដែរ គឺគម្រោងនឹងបញ្ចប់នៅថ្ងៃទី២៥ ខែកញ្ញា ប៉ុន្តែភាគីសហជីពនឹងខិតខំធ្វើយ៉ាងណាឲ្យចប់មុនថ្ងៃកំណត់ ព្រោះបុណ្យភ្ជុំបិណ្ឌកាន់តែខិតជិតមកដល់ ។
ជាមួយគ្នានោះដែរ លោកឲ្យដឹងថា ការចរាចរមិនត្រូវតួលេខគ្នាត្រូវភាគីនិយោជកបានលើកចំណុចពីភាគមិនច្បាស់លាស់ការអនុគ្រោះពន្ធ (EBA) និងលើកពីការប្រកួតប្រជែងគ្នារវាងបណ្តាប្រទេសនៅជុំវិញប្រទេសកម្ពុជា ដោយថា បណ្តាប្រទេសទាំងនោះប្រាក់ឈ្នួលកម្មករមានចំនួនតិចជាងកម្ពុជា ហើយកម្ពុជាមានចំនួនកើនឡើងខ្ពស់ ។
សម្រាប់ការចរចាប្រាក់ឈ្នូលកម្មករ ឆ្នាំ២០២០នេះ ត្រូវបានលោក ប៉ាវ ស៊ីណា អះអាងថា មិនមានភាពល្អប្រសើរជាងឆ្នាំ២០១៩នោះទេ ដោយសារនៅមានភាពតានតឹងទាក់ទង និងការអនុគ្រោះពន្ធការនាំចេញទៅទីផ្សារក្រៅប្រទេស ដែលជារនាំងក្នុងការចរចាប្រាក់ឈ្នួលនេះផងដែរ ។ លោកគូសបញ្ជាក់ថា ៖«អីញ្ចឹងលទ្ធភាពនៃការឡើងប្រាក់ឈ្នួលឆ្នាំ២០២០នេះមិនអាចខ្ពស់ជាងឆ្នាំមុននោះទេ ។
យើងមិនអាចព្យាករណ៍បានទេចំពោះតួលេខពិតប្រាកដព្រោះថា យើងនៅចរចាគ្នាបន្ថែមទៀត ។ យើងចរចាចុងក្រោយ គឺនៅបោះឆ្នោត ដើម្បីយកសម្លេងរួមមួយ» ។ យ៉ាងណាក្តីលោកប៉ាវ ស៊ីណា ក៏បានសម្តែងការព្រួយបារម្ភចំពោះថ្ងៃបោះឆ្នោតសម្រេចតួលេខមួយពិតប្រាកដ ព្រោះថា តំណាងសហជីព គឺមានលោក សោម អូន ជាអនុប្រធានក្រុមប្រឹក្សាជាតិប្រាក់ឈ្នួលអប្បរមាលើកទី៣ ។ តែអនុប្រធានគ្មានសិទ្ធិសម្រេចចំនួនប៉ុន្មានទេ ប៉ុន្តែវាអាស្រ័យលើការបោះឆ្នោតរបស់សហជីពយ៉ាងណាក្តីនៅក្នុងក្រុមប្រឹក្សាជាតិប្រាក់ឈ្នួលអប្បរមាភាគច្រើន សុទ្ធតែសហជីពដែលគាំទ្ររាជរដ្ឋាភិបាលទាំងអស់ ។
គួរឮកថា ក្រសួងការងារបានកំណត់ប្រាក់ឈ្នួលឲ្យកម្មករសម្រាប់ឆ្នាំ២០១៩ គឺ១៧៧ដុល្លារ ហើយសម្តេចតេជោ ហ៊ុន ហ៊ុន សែន យកថវិកាជាតិបន្ថែមទៀត៥ដុល្លារទៀត ។ ដូច្នេះប្រាក់ឈ្នួលកម្មករសម្រាប់ឆ្នាំ២០១៩ គឺ១៨២ដុល្លារ និងត្រូវបើកជា២ដងក្នុងមួយខែ ។ ប្រាក់ឈ្នួលអប្បបរមាក្នុងឆ្នាំ២០១៨នេះ គឺ១៧០ដុល្លារក្នុងមួយខែ ៕ កែសម្រួលដោយ ៖ សុឃាក់
ចែករំលែកព័តមាននេះ