រាជធានីភ្នំពេញ ៖ សូមប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ ខណៈកម្ពុជានឹងភ្លៀងធ្លាក់ចាប់ពីថ្ងៃទី៩ ដល់ថ្ងៃទី១៥ ខែកញ្ញានេះ ។ នេះតាមការឲ្យដឹងក្រសួងធនធានទឹក និងឧតុនិយមចេញផ្សាយនៅថ្ងៃទី៩ ខែកញ្ញា ។
យោងតាមចេញសេចក្តីជូនដំណឹងស្តីពីបញ្ហាអាកាសធាតុរបស់ក្រសួងបានបញ្ជាក់ថា បន្ទាប់ពីធ្វើការសង្កេត ពិនិត្យ និងតាមដានជាប្រចាំនូវការវិវត្តនៃធាតុអាកាសទាំងក្នុងតំបន់ និងកម្ពុជា បង្ហាញឲ្យឃើញថា ចាប់ពីថ្ងៃទី៩-១១ ខែកញ្ញា កម្ពុជានឹងទទួលនូវឥទ្ធិពលនៃជ្រលងសម្ពាធទាប , ចាប់ពីថ្ងៃទី១២-១៥ ខែកញ្ញា កម្ពុជាទទួលនូវឥទ្ធិពលពីប្រព័ន្ធសម្ពាធទាប (ITCZ) ដែលអូសបន្លាយកាត់ពីលើប្រទេសថៃ ភាគខាងត្បូងប្រទេសឡាវ និងភាគកណ្តាលប្រទេសវៀតណាម និងឥទ្ធិពលនៃខ្យល់មូសុងនីរតីមធ្យម ។
ក្រសួងបន្តថា ស្ថានភាពបែបនេះធ្វើឲ្យចាប់ពីថ្ងៃទី៩-១១ ខែកញ្ញា បណ្តាខេត្ត និងរាជធានីនឹងមានភ្លៀងក្នុងកម្រិតពីតិចទៅបង្គួរក្នុងនោះអាចមានផ្នែកខ្លះនៃបណ្តាខេត្តជាប់ប្រទេសវៀតណាមដែលអាចមានភ្លៀងធ្លាក់ច្រើន ហើយចាប់ពីថ្ងៃទី១២-១៥ ខែកញ្ញា បណ្តាខេត្ត និងរាជធានីស្ទើរទូរទាំងប្រទេសនឹងអាចមានភ្លៀងធ្លាក់រាយប៉ាយក្នុងកម្រិតពីបង្គួរទៅច្រើន ។ ជាមួយគ្នានេះក្រសួងធនធានទឹកក៏សូមឲ្យប្រជាពលរដ្ឋបង្កើនការប្រុងប្រយ័ត្នខ្ពស់ចំពោះបាតុភូតផ្គរ រន្ទះ និងខ្យល់កន្ត្រាក់ដែលអាចកើតមានឡើងជាយថាហេតុផងដែរ ៕ កែសម្រួលដោយ ៖សុឃាក់
ចែករំលែកព័តមាននេះ