ស្រុកព្រៃនប់ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់បានប្រើអំពើហិង្សាវាយទាត់ធាក់ទៅលើក្មេងតូចដែលត្រូវជាកូនចុង បណ្តាលឱ្យរងរបួសពេញដងខ្លួន បង្កឱ្យមានការភ្ញាក់ផ្អើលកាលពីម៉ោង៤ទៀបភ្លឺ ថ្ងៃទី០៨ ខែកញ្ញា ឆ្នាំ២០១៩ ស្ថិតនៅភូមិបត់គគីរ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។
បើតាមនគរបាលបានឱ្យដឹងថា បុរសជាឪពុកចុងខាងលើត្រូវបានឃាត់ខ្លួនភ្លាមនោះ ឈ្មោះ អ៊ូម ពៅ អាយុ៤៦ឆ្នាំ មុខរបរមិនពិតប្រាកដ បានប្រើហិង្សាវាយទាត់ធាក់ទៅលើក្មេងតូចដែលត្រូវជាកូនចុង រស់នៅភូមិបត់គគីរ ឃុំអូរឧកញ៉ាហេង ស្រុកព្រៃនប់ ចំណែកក្មេងប្រុសរងគ្រោះឈ្មោះ ពៅ ដំ អាយុ៣ឆ្នាំ បណ្តាលឱ្យរងរបួសពេញដងខ្លួន ។
នគរបាលបញ្ជាក់ថា មុនពេលកើតហេតុ ជនសង្ស័យជាឪពុកចុងរូបនេះ បានប្រើអំបោសធ្វើជារំពាត់ ប្រើដៃ និងជើង វាយផង ទាត់ធាក់ផង ទៅលើកូនចុងខ្លួនឯង បណ្តាលឱ្យក្មេងប្រុសរងគ្រោះរងរបួសពេញដងខ្លួនតែម្តង។
បើតាមស្ត្រីជាម្តាយក្មេងតូចខាងលើបានអះអាងថា មូលហេតុដែលបង្កឱ្យកើតមានហិង្សាខាងលើនេះ ដោយសារបុរសជាឪពុកចុងរូបនេះ ស្រវឹងស្រា ហើយរករឿងវាយរូបគាត់ជាប្រពន្ធមិនបាន ទើបបានទៅវាយកូនចុងតែម្តង។
ក្រោយពេលកើតហេតុ បច្ចុប្បន្ននេះនគរបាលបានឃាត់ខ្លួនជនសង្ស័យខាងលើ ដើម្បីចាត់ការតាមនីតិវិធីហើយ។ (កែសម្រួលដោយ ៖ បុប្ផា)
ចែករំលែកព័តមាននេះ