រាជធានីភ្នំពេញ ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានសម្តែងក្តីសង្ឃឹមលើអភិបាលថ្មី ខេត្តព្រះសីហនុនឹងស្តារខេត្តព្រះសីហនុឲ្យល្បីឡើងវិញ ដោយមិនដូចការលើកឡើងរបស់ជនមួយចំនួនឡើយ ។ លោករដ្ឋមន្ត្រីបានសរសេរលើបណ្តាញសង្គម នៅថ្ងៃទី៨ កញ្ញានេះថា « មកដល់ទីក្រុងកំពង់សោមជាងកន្លះថ្ងៃក្រៅពីបន្ទប់សណ្ឋាគារ (ហើយ មានច្រើន ណាស់ មិនដូចអ្នកខ្លះស្រែកថា គ្មាននោះទេ ) ខ្ញុំរកកន្លែងណាមួយ ដើម្បីខ្ញុំប្រើគុណនាម «ស្អាត »មិនបាន ។
លោកបន្តថា អាចមានអ្នករិះគន់ថា ខ្ញុំមកតែមួយភ្លែតម៉េចហ៊ាននិយាយបែបនេះ តែសូមទុកខ្ញុំជាទេសចរមកពីឆ្ងាយម្នាក់ចុះ ។ លោកបញ្ជាក់ថា ៖« សង្ឃឹម អភិបាលខេត្តថ្មី មានចង្កឹះទិព្វដូច Harry Potter ជួយលើកសម្រស់ទីក្រុងកំពង់សោមយើងឡើងវិញ ហើយអ្នកកំពង់សោមក៏ត្រូវតែជួយលោកផងដែរ » ។
សូមជម្រាបថា ការលើកឡើងរបស់លោករដ្ឋមន្ត្រីបន្ទាប់ពីលោកគួច ចំរើន ត្រូវបានរាជរដ្ឋាបាលបានតែងតាំងជាអភិបាលខេត្តព្រះសីហនុ ខណៈលោកជាអតីតអភិបាលខេត្តកំពង់ចាម ។ លោកត្រូវបានប្រជាជននៅខេត្តកំពង់ចាមបានសារទយ៉ាងខ្លាំង ចំពោះការដឹកនាំមានការអភិវឌ្ឍន៍ ។
លោក គួច ចំរើន ត្រូវបានរាជរដ្ឋាភិបាលដាក់ឲ្យកាន់តំណែងខេត្តព្រះសីហនុ បន្ទាប់ពីមានករណីបាក់រលំអគារ៧ជាន់នៅខេត្តព្រះសីហនុ ក្រោមការដឹកនាំរបស់លោក យន្ត មីន ។ មកកាន់ខេត្តព្រះសីហនុលោក គួច ចំរើន ត្រូវបានសង្កេតឃើញថា បានធ្វើការអភិវឌ្ឍន៍យ៉ាងខ្លាំង ក្នុងនោះលោកបានស្តារប្រឡាយ លូ ជួសជុលធ្វើផ្លូវ និងសម្រេចវាយកម្ទេចអគារមួយចំនួនដែលធ្វើការសាងសង់មិនត្រឹមត្រូវលក្ខខណ្ឌបច្ចេកទេសជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ