ខេត្តសៀមរាប ៖ សេចក្តីរាយការណ៍បឋមបានឲ្យដឹងថា នាថ្ងៃទី០៥ ខែកញ្ញានេះ គណ: បញ្ជាការឯកភាពសង្កាត់សៀមរាប ដែលដឹកនាំដោយលោក អ៊ូច សុខេន អនុប្រធានគណ:បញ្ជាការឯកភាពសង្កាត់ចុះទៅបង្ក្រាបបទល្មើសដោយដាក់មងចាប់សត្វគ្រប់ប្រភេទនៅតំបន់ភ្នំក្រោម ។
សេចក្តីរាយការណ៍បានបន្ត លោក អ៊ូច សុខេន បានឲ្យដឹងថា ក្នុងប្រតិបត្តិការចុះបង្ក្រាបនេះក្រុមការងារបានរុះរើទីតាំងដាក់មងចាប់សត្វស្លាបបានចំនួន០៩កន្លែង រឹបអូសយកឧបករណ៍ (មង) ចំនួន០៩ខ្សែ ស្មើនឹងប្រវែង៤៥០ម៉ែត្រ ហើយឧបករណ៍បង្កបទល្មើសទាំង អស់នេះត្រូវបានសមត្ថកិច្ចយកមកតម្កល់ទុកនៅសាលាសង្កាត់សៀមរាប ។
លោក អ៊ូច សុខេន បានឲ្យដឹងទៀតថា ក្នុងនាមអាជ្ញាធរខេត្តសូមអំពាវនាវដល់បងប្អូនប្រជាពលរដ្ឋទាំងអស់សូមបញ្ឈប់សកម្មភាពទាំងនេះកុំបន្តឲ្យកើតមានទៀត ហើយសូមនាំគ្នាងាកមកថែរក្សា និងអភិរក្សរបស់ដែលមានស្រាប់ទុកជាផលប្រយោជន៍រួម ហើយប្រសិនជាបងប្អូននៅតែបន្តការដាក់មង និងបំផ្លាញសត្វរបៀបនេះទៀត អាជ្ញធរមានសមត្ថ កិច្ច និងចាត់វិធានការទៅតាមផ្លូវច្បាប់ដោយពុំឱ្យជនណាម្នាក់រួចផុតឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ