មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា (អង្គការសេដាក) បានធ្វើការណែនាំដល់ប្រជាកសិករថា ដើម្បីឱ្យស្រូវរបស់កសិករលូតលាស់បានល្អនាំមកនូវទិន្នផលខ្ពស់ សំណាបថ្លោសល្អជាកត្ដាសំខាន់មួយ ។ ដើម្បីឱ្យទទួលបានសំណាបថ្លោសល្អ មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា (សេដាក) សូមណែនាំឱ្យកសិករសាកល្បងអនុវត្ដ តាមបច្ចេកទេសទាំង៩ដូចខាងក្រោម ៖
១-រើសយកតែគ្រាប់ពេញសុទ្ធល្អទៅសាប ដោយរើសចេញនូវគ្រាប់ដែលមានពណ៌ និងរាងខុសធម្មតាចោល ។ កសិករអាចត្រូវចំណាយពេលច្រើនបន្ដិចមែនតែការប្រើពូជសុទ្ធល្អនាំឱ្យកសិករទទួលបានផលច្រើន ហើយលក់ស្រូវបានតំលៃថ្លៃទៀតផង ។
២-យកគ្រាប់ដែលរើសហើយទៅត្រាំ ជាមួយទឹកមានជាតិស្ដៅ (ទឹកដែលត្រាំជាមួយគ្រាប់សំបក ឬស្លឹកស្ដៅ) ដើម្បីជួយការពារគ្រាប់ពីការបំផ្លាញពីសត្វល្អិតផ្សេងៗ ។
៣-រៀបចំថ្នាលសំណាបគោក ដូចរងស្ពៃ ដើម្បីចៀសវាងកុំឱ្យសំណាបលិចទឹកដែលនាំឱ្យវាលូតរាងវែង (លូតតែកំពស់តែមិនសូវរីកទទឹង) ។
៤-ប្រើជីកំប៉ុស្ដ ឬដីមមោកព្រៃ (ដីស្រទាប់លើនៅក្នុងព្រៃ) ឬគុម្ពោតព្រៃឱ្យបានច្រើន ។ ជីកំប៉ុស្ដនាំឱ្យដីផុស ហើយសើមបានល្អ ដែលអំណោយផលដល់ការលូតលាស់របស់សំណាប ។
៥-សាបស្ដើងជាងធម្មតា ដើម្បីឱ្យដើមសំណាបនីមួយៗដុះរីកមាឌទទឹងបានល្អ (សំណាបថ្លោស) ។
៦-ក្រោយពេលសាបហើយគ្របដីដោយប្រើស្លឹកឈើ (ប្រើទាំងស្លឹកទាំងមែក) ហើយដកស្លឹកឈើចេញពេលសំណាបចាប់ផ្ដើមដុះ ។
៧-ដកសំណាបនៅកន្លែងចង្អៀតពេកចេញខ្លះ ។
៨-ស្រោចទឹកបន្ថែម ប្រៀបដូចជាស្រោចកូនស្ពៃក្នុងករណីអត់មានភ្លៀង ។ គេគួរលាយទឹកជាមួយទឹកនោមគោក្នុងបរិមាណ១:១០ (ទឹកនោមដែលទុកឱ្យកាច់បានជាង៧ថ្ងៃ) ដើម្បីជំរុញការលូតលាស់បន្ថែម ។
៨-នៅពេលដកសំណាបទៅស្ទូង ដកតែដើមសំណាបថ្លោសជាងគេទៅស្ទូងបានហើយ។
លោកបណ្ឌិត យ៉ង សាំងកុមារ ប្រធានអង្គការសេដាកមានប្រសាសន៍បញ្ជាក់បន្ថែមថា ក្នុងចំណោមបច្ចេកទេសទាំង៩ខាងលើនេះ កសិករអាចជ្រើសរើសមួយណាអនុវត្ដក៏បានដែរ តែការផ្ដុំចូលគ្នាបានច្រើនចំណុច នាំមកនូវផលល្អជាងការអនុវត្ដបានតិចចំណុច។ លោកបន្ដថា ទោះក្នុងករណីយ៉ាងណាក៏ដោយកសិករគួរអនុវត្ដឱ្យបាននូវចំណុចទី១និងទី៩ គឺរើសតែគ្រាប់ល្អទៅសាប និងសំណាបថ្លោសទៅស្ទូងដែលអាចទទួលបានផលល្អ ។ សំរាប់ព័ត៌មានបន្ថែមសូមធ្វើទំនាក់ទំនងលោកហ៊ីម ខទៀត ទូរស័ព្ទលេខ០១៦ ៥៧៥ ៧១៣ ៕
ចែករំលែកព័តមាននេះ