រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ស្រវឹងស្រាបានបើករថយន្តឡិចស៊ិស RX330 មួយគ្រឿង ចូលទៅកន្លែហម៉ាស្សា រួចចេញមកវិញ ស្រាប់តែឡាំប៉ាថា ត្រូវគេបន្លំលួចដូរស្បែកជើងស្បែករបស់គាត់បង្កឱ្យមានការភ្ញាក់ផ្អើលឡើងកាលពីម៉ោង១និង៣០នាទីរំលងអធ្រាត្រឈានចូលថ្ងៃទី៦…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ស្រវឹងស្រាបានបើករថយន្តឡិចស៊ិស RX330 មួយគ្រឿង ចូលទៅកន្លែហម៉ាស្សា រួចចេញមកវិញ ស្រាប់តែឡាំប៉ាថា ត្រូវគេបន្លំលួចដូរស្បែកជើងស្បែករបស់គាត់បង្កឱ្យមានការភ្ញាក់ផ្អើលឡើងកាលពីម៉ោង១និង៣០នាទីរំលងអធ្រាត្រឈានចូលថ្ងៃទី៦ ខែកញ្ញា ឆ្នាំ២០១៩ នៅក្នុងផ្ទះយីហោ១៦៩ ម៉ាស្សា កោសជប់ តំលៃ៣ដុល្លារ ដែលស្ថិតនៅតាមបណ្តោយផ្លូវ២៧១ ក្នុងសង្កាត់ទំនប់ទឹក ខណ្ឌបឹងកេងកង ។
សេចក្តីរាយការណ៍បន្តថា បុរសដែលចោទថានារីម៉ាស្សាបន្លំដូរស្បែកជើង គឺមិនបានឱ្យស្គាល់អត្តសញ្ញាណនោះទេ គ្រាន់តែដឹងថា វ័យជាង៣០ឆ្នាំជិះរថយន្តម៉ាក ឡិចស៊ិស RX ៣៣០ពណ៌ប្រផេះ ពាក់ស្លាកលេខ ភ្នំពេញ 2AY 3569 ។
បើតាមប្រភពពីនារីៗបំរើការនៅកន្លែងហាងម៉ាស្សាកោសជប់បានឱ្យដឹងថា មុនកើតហេតុ គេបានឃើញបុរសខាងលើបើករថយន្តម៉ាកឡិចស៊ីស RX330 ពណ៌ប្រផេះ មួយគឿង មកឈប់នៅមុខហាងម៉ាស្សា ហើយក៏បានហៅនារីម្នាក់ឱ្យចូលទៅម៉ាស្សាឱ្យខ្លួន លុះដល់ពេលម៉ាស្សាចប់សព្វគ្រប់ បុរសរូបនោះចេញមកវិញមិនទាន់បានឱ្យថ្លៃសេវាផង ក៏ស្រាប់តែបុរសរូបនោះរករឿងថា មានអ្នកបន្លំដូរស្បែកជើងរបស់គាត់ ពេលរូបគាត់មកបានពាក់ ស្បែកជើងស៊ក ជាប្រភេទស្បែកតំលៃជិត១០០ដុល្លារ ហើយហេតុអ្វីបានឃើញស្បែកជើងជំពាមកញ្ចាស់មកវិញចឹង។
ប្រភពដដែលបន្តថា ក្នុងហេតុការណ៍នោះពួកគាត់ជានារីម៉ាស្សាទាំងអស់បាននាំគ្នាស្បថស្បែ ដោយនិយាយថា មិនបានយកស្បែកជើងគាត់នោះទេ ព្រោះថាជារឿងចម្លែកធ្លាប់តែលឺថា ចូលម៉ាស្សាបាត់លុយ បន្លំដូរលុយសែន តែបុរសរូបនេះ មកម៉ាស្សាបែរជាបាត់ស្បែកជើងទៅវិញ ។
ដោយឡែក ខាងបុរសដែលចូលទៅម៉ាស្សាបានអះអាងថា ពិតជាបាត់ស្បែកជើងត្រូវបានគេបន្លំដូរពិតប្រាកដមែន ពីព្រោះរូបគាត់មានឡាន មានមាសពាក់ រឿងអ្វីមកចង់ធ្វើស៊ីរឿង បាត់ស្បែកជើងប៉ុណ្ណឹងទៅវិញនោះ ។
ពាក់ព័ន្ធក្នុងហេតុការណ៍ខាងលើនេះ ភាគីទាំងសង្ខាងនៅតែរឹងទទឹង ប្រកែកគ្នាយកត្រូវរៀងៗខ្លួន រហូតផ្អើលដល់សមត្ថកិច្ចមូលដ្ឋានបានចុះទៅកន្លែងកើតហេតុ និងសាកសួរផងដែរ ។ បន្តិចក្រោយមក ភាគីខាងបុរសជាភ្ញៀវកើតទុក្ខមិនសុខចិត្ត គឺចង់ឱ្យសមត្ថកិច្ច ហៅមេការហាងម៉ាស្សាឱ្យទៅប៉ុស្តិ៍សមត្ថកិច្ច ដើម្បីដាក់ពាក្យបណ្តឹង ។ ប៉ុន្តែនៅពេលនោះសមត្ថកិច្ចដឹកមេការទៅប៉ុស្តិ៍ បែរជាមិនឃើញបុរសជាភ្ញៀវទៅនោះទេ មិនដឹងជាបើករថយន្តចេញទៅណាបាត់ ទាំងមិនទាន់បានឱ្យលុយថ្លៃសេវាម៉ាស្សាចំនួន៣ដុល្លារផង ។
ក្រោយពេលកើតហេតុ ស្ត្រីមេការ ក៏ត្រូវសមត្ថកិច្ចឱ្យត្រលប់ទៅផ្ទះធ្វើការរកស៊ីដូចធម្មតាវិញ ព្រោះដើមបណ្តឹងគេចខ្លួនបាត់ទៅហើយ ។ (កែសម្រួលដោយ ៖ បុប្ផា)
ចែករំលែកព័តមាននេះ