ជំងឺក្រពះកើតឡើងពីការបរិភោគអាហារមិនទៀងទាត់ពេលវេលា រួមផ្សំការទទួលទានគ្រឿងស្រវឹង និងបារីផង ។ លោកអ្នកខ្លះឲ្យតែមានអាការៈចុកឆ្អល់នៅបរិវេណចុងដង្ហើមតែងយល់ថាខ្លួនកើតមានជំងឺក្រពះឬក៏រលាកក្រពះហើយមានក្តីបារម្ភយ៉ាងខ្លាំងអំពីបញ្ហាសុខភាពរបស់ខ្លូនរហូតសម្រាន្តមិនលក់ដោយសារជំងឺធ្វើទុក្ខនៅពេលយប់ ។
ទាក់ទិនបញ្ហានេះលោកវេជ្ជបណ្ឌិតអ៊ុង ចក្រាវុធ ប្រធានផ្នែកជំងឺថ្លើម ក្រពះ ពោះវៀន និងជំងឺឫសដូងបាត នៃមន្ទីរពេទ្យកាល់ម៉ែត បានប្រាប់កោះសន្តិភាពឱ្យដឹងថា ជំងឺរលាកក្រពះទាមទារច្រឹបយកសាច់ក្រពះទៅវិភាគ ទើបដឹងច្បាស់ពីព្រោះជំងឺរលាកក្រពះមួយចំនួនធំមិនមានរោគសញ្ញានោះទេ ។ ជាទូទៅអ្នកជំងឺម្នាក់តែងតែនិយាយថា គាត់មានជំងឺរលាកក្រពះនេះគ្រាន់តែជាពាក្យខាងក្រៅដែលប្រជាជនតែងហៅប៉ុណ្ណោះអ្វីដែលពិតប្រាកដនោះគឺមានតែច្រឹបយកសាច់ក្រពះទៅពិនិត្យប៉ុណ្ណោះទើបដឹងច្បាស់ ។
មនុស្សភាគច្រើនឲ្យតែមានអាការៈចុកឆ្អល់ឬផ្សាក្រហាយនៅបរិវេណចុងដង្កើមពេលទទួលទានអាហារទៅឆាប់ឆ្អែត ឬក៏មានអារម្មណ៍ថា ក្រពះមិនសូវរំលាយអាហារបានល្អ ជួនកាលមានភើចង្អោរនោះពួកគាត់ក៏សន្និដ្ឋានថា ខ្លួនកើតជំងឺរលាកក្រពះ ។ រោគសញ្ញាទាំងនេះមិនអាចចាត់ទុកថាជាជំងឺរលាកក្រពះមួយរយភាគរយនោះបានទេ ព្រោះអាការៈទាំងនេះអាចបណ្តាលមកពីជំងឺផ្សេងទៀតដូចជា ដំបៅក្រពះ ទឹកអាស៊ីតច្រាល ខ្សោយក្រពះ មហារីកក្រពះ ។ ដូច្នេះដើម្បីឱ្យដឹងច្បាស់គឺត្រូវទៅជួបជាមួយគ្រូពេទ្យដើម្បីពិនិត្យនិងព្យាបាល ហើយកាលណាលោកអ្នកមិនបានធ្វើការព្យាបាលឱ្យបានត្រឹមត្រូវទេមិនអាចជាសះស្បើយបានឡើយព្រោះការប្រើប្រាស់ថ្នាំដោយមិនមានវេជ្ជបញ្ជា អាចធ្វើឱ្យជំងឺអន់ថយមួយរយៈប៉ុន្តែកាលណាអស់មួយជាតិថ្នាំជំងឺនេះនឹងរើបឡើងវិញជាមិនខាន ។
លោកវេជ្ជបណ្ឌិតបានបញ្ជាក់ថា ដូចដែលលោកអ្នកបានជ្រាបរួចមកហើយថា អ្នកជំងឺដែលមានអាការៈដូចខាងលើនេះមិនអាចបញ្ជាក់បានថាជាជំងឺរលាកក្រពះមួយរយភាគរយនោះទេ ភាគច្រើនជាជំងឺខ្សោយក្រពះដែលមានរហូតដល់ទៅ៦០ភាគរយឯណោះ ចំពោះជំងឺរលាកក្រពះអាចមានប្រហែលជា២០ទៅ៣០ភាគរយប៉ុណ្ណោះ ចំណែកឯទឹកអាស៊ីតច្រាលក៏អាចមានច្រើនដែរគ្រាន់តែមិនច្រើនដូចជំងឺខ្សោយក្រពះ ។ ដូច្នេះប្រសិនបើលោកអ្នកកើតមានអាការៈដូចខាងលើត្រូវប្រញាប់មកពិភាក្សាជាមួយគ្រូពេទ្យដើម្បីធ្វើរោគវិនិច្ឆ័យឲ្យបានច្បាស់លាស់ចៀសវាងទុកយូរបង្កទៅជាបញ្ហាធ្ងន់ធ្ងរពិបាកព្យាបាល ៕
ចែករំលែកព័តមាននេះ