លទ្ធផលចង់អន្តរាគមន៍ដោះលែងមិនបានគំរាម…ស្នងការនគរបាលដកចង្កូម
- ភ្នំពេញ
រាជធានីភ្នំពេញ ៖ លោកវរសេនីយ៍ទោ ចាន់ ពៅ អធិការរងនគរបាលខណ្ឌឫស្សីកែវ បានត្រូវលោកឧត្តម សេនីយ៍ឯក ស ថេត…
រាជធានីភ្នំពេញ ៖ លោកវរសេនីយ៍ទោ ចាន់ ពៅ អធិការរងនគរបាលខណ្ឌឫស្សីកែវ បានត្រូវលោកឧត្តម សេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញកោះហៅទៅសាកសួរនិងសម្រេចផ្អាកការងារជាបណ្តោះអាសន្ន កាលពីរសៀលថ្ងៃទី៤ ខែកញ្ញា បន្ទាប់ពីបានគំរាមសម្លាប់លោកអនុសេនីយ៍ឯក លី រ៉ូហ្សាត នាយផ្នែកនគរបាលចរាចរណ៍ខណ្ឌឫស្សីកែវតាមទូរស័ព្ទ ហើយ សំឡេងគំរាមយ៉ាងកោងកាចនោះបានបែកធ្លាយតាមបណ្តាញសង្គមហ្វេសប៊ុក ។ ការគំរាមនេះ ត្រូវគេដឹងថា ដោយសារតែខឹងលោក លី រ៉ូហ្សាត មិនដោះលែងបុរសម្នាក់ដែលបើកបរក្នុងភាពស្រវឹង ។
តាមព័ត៌មានបានឱ្យដឹងថា ការគំរាមនោះ គឺកាលពីយប់ថ្ងៃទី២ ខែកញ្ញា ដោយសារតែលោកវរសេនីយ៍ទោ ចាន់ ពៅ អធិការរងទទួលបន្ទុកសេនាធិការ បានទូរស័ព្ទទៅអន្តរាគមន៍សុំឱ្យដោះលែងបុរសម្នាក់ដែលត្រូវឃាត់ខ្លួនដោយសារមានជាតិស្រវឹង តែត្រូវលោក លី រ៉ូហ្សាត នាយផ្នែកចរាចរណ៍និយាយថា គាត់គ្មានសិទ្ធិដោះលែងទេ ព្រោះត្រឹមតែជានាយផ្នែក ។
តាមព័ត៌មានឱ្យដឹងទៀតថា នៅយប់ថ្ងៃទី២ ខែកញ្ញានោះ កម្លាំងនគរបាលខណ្ឌឫស្សីកែវ បានដាក់គោល ដៅត្រួតពិនិត្យអាវុធជាតិផ្ទុះនិងជាតិអាល់កុល នៅតាមផ្លូវជាតិលេខ៥ មុខវិទ្យាល័យឫស្សីកែវ ក្នុងសង្កាត់ឫស្សីកែវ ។ ក្នុងការត្រួតពិនិត្យនោះ ក៏មានការចូលរួមពីលោកស្នងការរង និងលោកអធិការខណ្ឌផងដែរ ។ នៅក្នុងការត្រួតពិនិត្យនេះ សមត្ថកិច្ចចម្រុះបានឲ្យផ្លុំដើម្បីពិនិត្យជាតិអាល់កុល និងបានឃាត់ខ្លួន មនុស្ស៣នាក់ ដែលបើកបរមានជាតិអាល់កុល បញ្ជូនទៅស្នងការដ្ឋានដើម្បីធ្វើការពិន័យទៅតាមច្បាប់ ។
ខណៈនោះ លោកវរសេនីយ៍ទោ ចាន់ ពៅ អធិការរងនគរបាលខណ្ឌទទួលបន្ទុកសេនាធិការបានទូរស័ព្ទទៅអន្តរាគមន៍សុំឱ្យដោះលែងបុរសម្នាក់ដែលខ្លួនស្គាល់ តែត្រូវបានលោក លី រ៉ូហ្សាត នាយផ្នែកចរាចរណ៍និយាយថា គាត់គ្មានសិទ្ធិដោះ លែងទេ ព្រោះត្រឹមតែជានាយផ្នែក ។ តាមព័ត៌មានឱ្យដឹងទៀតថា នៅយប់នោះ លោក ចាន់ ពៅ ក៏បានទូរស័ព្ទទៅអធិការរងទទួលផែនចរាចរណ៍ដែរតែពុំលើក ជាហេតុធ្វើឱ្យលោកអធិការរងដែលមានចរិតកាចនោះ បានឆាតជាសារសំឡេងធ្ងន់ៗគំរាមសម្លាប់នាយផ្នែកចរាចរណ៍តែម្តង ។
តាមសារសំឡេងគំរាមនោះ មានខ្លឹមសារថា «ឥឡូវអ្ហែងថ្លើមធំដល់ប៉ុណ្ណឹង អ្ហែងធ្វើនឹងឈ្នះអញអត់ ឥឡូវគេដោះលែងបាត់ អ្ហែងកុំស្មាន អ្ហែងកូនចៅអញកុំចង់មកច្រឡោត» ។ នៅក្នុងសារសំឡេងនោះក៏បានឱ្យដឹងទៀតថា «អ្ហែងនិយាយមិញពាក្យឈ្លើយណាស់ ម៉ាជីវិតនេះអ្ហែងបានត្រឹមប៉ុណ្ណឹង អត់មានឱ្យតទៅ
ទៀត អ្ហែងកុំចង់ខ្លាំង ងាប់ចោលប្រពន្ធចោលកូន អ្ហែងនៅតែប៉ុណ្ណឹងមួយជីវិត ឬអាចចុះជាងហ្នឹងទៀត»។
បន្ទាប់ពីមានការគំរាមកំហែង នៅព្រឹកថ្ងៃទី៣ ខែកញ្ញា លោកអធិការនគរបាលខណ្ឌឫស្សីកែវ ក៏បានហៅអ្នកទាំង២មកសម្របសម្រួលនិងត្រូវរ៉ូវគ្នាហើយ ស្រាប់តែសារសំឡេងគំរាមសម្លាប់នោះបានបែកធ្លាយចេញមកក្រៅ និងបានបង្ហោះតាមបណ្តាញសង្គម ជាហេតុធ្វើឱ្យមហាជនក៏ដូចជាកងកម្លាំងនគរបាលមានការភ្ញាក់ផ្អើលនិងថ្កោលទោស ចំពោះទង្វើរបស់អធិការរងជាមេដ៏មានអំណាចរូបនោះ ហើយត្រូវបានលោកស្នងការហៅទៅសាកសួរនិងដុសក្អែលតែម្តង ។
គួរបញ្ជាក់ថា លោកវរសេនីយ៍ទោ ចាន់ ពៅ ធ្លាប់មានរឿងភ្ជង់និងគំរាមសម្លាប់មន្ត្រីនគរបាលថ្នាក់ក្រោមចំនួន២នាក់មកហើយ គឺកូនឧត្តមសេនីយ៍ទោម្នាក់ និងឈ្មោះ ង៉ូយ ផល្លី ហើយនេះជាលើកទី៣ ហើយចេះតែបានសុខស្រួលទៅ ។ ទាក់ទងនឹងការគំរាមកំហែងនេះ កោះសន្តិភាពបានទាក់ទងតាមទូរស័ព្ទទៅអធិការរងរូបនោះដែរ តែទូរស័ព្ទជាប់រវល់រហូត ៕
ចែករំលែកព័តមាននេះ