រាជធានីភ្នំពេញ ៖ រដ្ឋមន្ត្រីក្រសួងសាធារណការ និងដឹកជញ្ជូនបានឲ្យដឹងថា ក្រសួងបានគ្រោងដាក់ជញ្ជីងសម្រាប់ថ្លឹងរថយន្តដែលបើកមកពីប្រទេសវៀតណាមបន្ថែម នៅតាមផ្លូវជាតិលេខ២១ ដើម្បីថ្លឹងរថយន្តដែលដឹកលើសទម្ងន់ពីប្រទេសវៀតណាម ។
លោកស៊ុនចាន់ ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូនបានលើកឡើងក្នុងកិច្ចប្រជុំបូកសរុបលទ្ធផលការងារអនុវត្តច្បាប់ចរាចរណ៍ផ្លូវគោកប្រចាំខែកក្កដា កាលពីរសៀល ថ្ងៃទី៤ កញ្ញា នៅទីស្តីការក្រសួងបានថា នៅផ្លូវជាតិលេខ២១ មានម៉ាស៊ីនថ្លឹងរយថន្ត តែមួយប៉ុណ្ណោះបើយើងចុះពីភ្នំពេញនៅកន្លែងថ្លឹងរថយន្តនៅខាងស្តាំដៃ ។ លោកបន្តថា បើរថយន្តមកពីប្រទេសវៀតណាមវិញ មិនទាន់មានម៉ាស៊ីនសម្រាប់ថ្លឹងនោះទេ អីញ្ចឹងត្រូវឆ្លងកាត់ផ្លូវម្ខាង ដើម្បីថ្លឹងដែលជាមានការពិបាកព្រោះផ្លូវជាតិលេខ២១ មានទំហំតូច ។
លោករដ្ឋមន្ត្រីបញ្ជាក់ថា ៖«យើងមានការលំបាកដោយសារផ្លូវតូចផងខ្ញុំក៏បានស្នើសុំក្រុមហ៊ុន មួយ ដើម្បីដាក់ថ្លឹងតែម្តង ។ អីញ្ចឹងពេលបើកឡានកាត់ដឹងគីឡូតែម្តង ។ ក្រុមហ៊ុនឯកភាពដាក់ទាំងកាមេរ៉ា និងជញ្ជីងអីញ្ចឹងយើងដាក់សាងនៅផ្លូវជាតិលេខ២១សិន» ។ ជាមួយគ្នានោះដែរលោករដ្ឋមន្ត្រីក៏បានលើកឡើងថា ក្នុងកិច្ចប្រជុំឆមាសជាមួយសម្តេចក្រឡាហោម ស ខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃថា រាល់ការធ្វើផ្លូវត្រូវបង្កប់កាមេរ៉ានៅលើផ្លូវទាំងអស់ ។ លោករដ្ឋមន្ត្រីឲ្យដឹងថា ផ្លុវមានកាមេរ៉ា និងកញ្ចក់មានផ្លូវជាតិលេខ៣ ផ្លូវលេខ៤១ ផ្លូវ៣៣ ។
លោករដ្ឋមន្ត្រីក៏បានលើកឡើងថា ផ្លូវជាតិលេខ១ មិនទាន់មានការដាក់កាមេរ៉ា ហើយផ្លូវជាតិលេខ៥ ដែលជាផ្លូវសំខាន់ក៏មិនទាន់មានដែរ ប៉ុន្តែក្រសួងនឹងស្នើសុំដាក់កាមេរ៉ានៅលើកំណាត់ផ្លូវជាតិនេះដែរ ដោយស្នើសុំជំនួយពីភាគជប៉ុន ។
ដោយផ្លូវជាតិលេខ២១ ត្រូវសាងសង់រួចហើយ ប៉ុន្តែសាងសង់មិនទាន់បានប៉ុន្មានផងផ្លូវនេះបានរងការខូចខាតនៅតំបន់មួយចំនួន ។ ក្រុមវិស្វករផ្លូវថ្នល់បានកំពុងជួសជុលនៅចំណុចខាងខូចផងដែរ ។ ប៉ុន្តែបើតាមការសង្កេតផ្លូវលេខ២១នេះ មិនធ្វើតាមស្តង់នោះទេ ព្រោះថា ផ្លូវមិនបានប៉ុន្មានឆ្នាំផងមានចំណុចមួយខូច ។ ផ្លូវជាតិលេខ២១ ត្រូវបានគេមើលថាជាផ្លូវសកម្មភាពព្រោះថា ផ្លូវនេះមានរយថន្តធំៗបានដឹកសម្ភារមកពីប្រទេសវៀតណាម ដែលរថយន្តខ្លះបានដឹកលើសទម្ងន់នៃការកំណត់ ។ ភាគច្រើនរថយន្តដឹកពីប្រទេសវៀតណាមមក ព្រោះថា ផ្លូវមួយចំហៀងគេឃើញមានសភាពខូតជាច្រើនកន្លែង ពោលផ្លូវដែលរថយន្តបើកពីខាងប្រទេសវៀតណាមមកកាន់ភ្នំពេញតែម្តង ។
សូមជម្រាបថា នៅក្នុងខែកក្កដាកន្លងមកនេះអ្នកគ្រោះថ្នាក់ចរាចរណ៍ចំនួន៣៣៦លើក បណ្តាលឱ្យស្លាប់ចំនួន១៤១នាក់ និងរបួសចំនួន ៥៩៨នាក់ (របួសធ្ងន់ ៣៤៥នាក់)។ កន្លែងមានអ្នកស្លាប់ច្រើននៅរាជធានីភ្នំពេញចំនួន២៩នាក់ ខេត្តព្រះសីហនុចំនួន១៥នាក់ និងខេត្តកំពង់ស្ពឺចំនួន១៣នាក់ ៕ កែសម្រួលដោយ ៖ សុឃាក់
ចែករំលែកព័តមាននេះ