ខេត្តកណ្តាល៖ គ្រោះធម្មជាតិបាក់ច្រាំងទន្លេមេគង្គក្រោមត្រង់ចំណុចឃុំព្រែកទន្លាប់ ឃុំព្រែកដាច់ និងឃុំខ្ពបអាទាវ ស្រុកលើកដែក ខេត្តកណ្តាល បានធ្វើអោយប្រជាពលរដ្ឋបង្ខំចិត្តរុះរើ និងរុញផ្ទះទៅរកកន្លែងសុវត្ថិភាពស្នាក់នៅបណ្តោះអាសន្នជាបន្តបន្ទាប់ចំនួនជាង១០ខ្នងទៀតហើយ សម្រាប់ឆ្នាំ២០១៩នេះ ខណៈផ្ទះប្រជាពលរដ្ឋជាច្រើនខ្នងទៀតកំពុងរងការគំរាមកំហែង។
បើតាមការលើកឡើងរបស់ប្រជាពលរដ្ឋរងគ្រោះបានអោយដឹងថា កាលពីមុនដីរបស់ពួកគាត់ម្នាក់ៗមានពី៨០ទៅជាង១០០ម៉ែត្រឯណោះ ប៉ុន្តែរយៈពេល៥ទៅ៦ឆ្នាំនេះកន្លងមកនេះ គ្រោះធម្មជាតិបានលេបត្របាក់មួយឆ្នាំបន្តិចៗធ្វើអោយប្រជាពលរដ្ឋរាប់រយគ្រួសារបង្ខំចិត្តរុះរើផ្ទះចាកចេញ ។
ប្រជាពលរដ្ឋដែលរងគ្រោះបានបន្តថា ដោយប្រជាពលរដ្ឋខ្លះទៅស្នាក់នៅលើដីកម្មសិទ្ធិខ្លួនឯងនៅកន្លែងផ្សេង និងខ្លះទៀតរត់ទៅសូមដីបងប្អូន ឬដីសាលារៀន, ដីវត្ត, ដីប្រឡាយសាធារណៈដើម្បីសង់ជំរកស្នាក់នៅជាបណ្តោះអាសន្ន ខណៈមិនទាន់មានអាជ្ញាធរជួយដោះស្រាយជូនផង ស្រាប់តែក្នុងឆ្នាំ២០១៩នេះ គ្រោះបាក់ច្រាំងទន្លេត្រង់ចំណុចឃុំខ្ពបអាទាវម្តងបានបាក់ម្តងបន្តិចៗអស់ប្រហែលប្រវែង២០ម៉ែត្រគុណនឹងជាង២០០ម៉ែត្រទៀត ធ្វើអោយផ្ទះប្រជាពលរដ្ធជិត២០ខ្នងត្រូវបង្ខំចិត្តរុះរើ និងរុញទៅរកកន្លែងសុវត្ថិភាពផងដែរ។
ប្រជាពលរដ្ឋដែលរងគ្រោះបានបន្តទៀតថា ចំពោះការរុះរើនិងរុញផ្ទះចេញនេះ ពួកគាត់បានចំណាយប្រាក់ផ្ទាល់ខ្លួនម្នាក់ៗអស់រាប់ពាន់ដុល្លារ រួមទាំងថ្លៃឈ្នួលជាង ស្របពេលដែលពួកគាត់កំពុងតែជួបការខ្វះខាតយ៉ាងខ្លាំងផងនោះ។
ប្រជាពលរដ្ឋរងគ្រោះបញ្ជាក់បន្ថែមថា កន្លងមកបញ្ហាខាងលើនេះក៏មានអាជ្ញាធរស្រុក និងកាកបាទក្រហមយកចិត្តទុកដាក់ចុះមកណែនាំអោយប្រជាពលរដ្ឋមានការប្រុងប្រយ័ត្ននិងផ្តល់អំណោយជាគ្រឿងឧបភោគ បរិភោគ និងថវិកាមួយចំនួនជួយរំលែកទុក្ខលំបាករបស់ពួកគាត់ដែរ តែវាមិនគ្រប់គ្រាន់ឡើយ គ្រាន់ជួយសម្រាលឱ្យរួចផុតការលំបាកបានមួយគ្រាៗប៉ុណ្ណោះ។ បើគ្រោះបាក់ច្រាំងទន្លេនៅតែបន្តបាក់ជារៀងរាល់ឆ្នាំបែបនេះ តើអោយរំពឹងអ្វីទៀត បើដីចំការជាក្តីសង្ឃឹមរបស់ពួកគាត់បានបាក់ចូលទៅក្នុងបាតទន្លេអស់គ្មានសល់បែបនេះ តើបានដីមកពីណាសម្រាប់បង្កបង្កើនផលចិញ្ចឹមជីវិតជាបន្តទៀតនោះ។
ប្រជាពលរដ្ឋខាងលើសូមសំណូមពរដល់ប្រមុខរាជរដ្ឋាភិបាលដែលមានសម្តេចតេជោ ហ៊ុន សែន ជាប្រមុខដឹកនាំ មេត្តាជួយអោយមន្ត្រីជំនាញចុះមកសិក្សាដើម្បីទប់ច្រាំងទន្លេកុំអោយបាក់ជាបន្តទៀត បើមិនដូច្នោះទេ ឆ្នាំក្រោយៗអាចនឹងបាក់រាលដាលដល់ផ្លូវវាងដែលកំពុងស្ថាបនាមិនទាន់រួចរាល់ផងនោះ ។
គួរបញ្ជាក់ថា សម្រាប់ឆ្នាំ២០១៩នេះនៅចំណុចឃុំព្រែកទន្លាប់ និងឃុំព្រែកដាច់ ពុំមានប្រជាពលរដ្ឋរុះរើផ្ទះចេញឡើយ គ្រាន់តែរងគ្រោះបាក់ដីច្រាំងទន្លេបន្តិចបន្តួចប៉ុណ្ណោះ។ប៉ុន្តែក្នុងឃុំទាំង៣ខាងលើ នៅមានផ្ទះប្រជាពលរដ្ឋជាច្រើនខ្នងទៀតកំពុងរងការគំរាមកំហែងពីគ្រោះបាក់ច្រាំងទន្លេនេះផងដែរ។
ពាក់ព័ន្ធបញ្ហាគ្រោះបាក់ច្រាំងទន្លេមេគង្គក្រោមនេះ លោកចាប ច័ន្ទវិទ្យា អភិបាលនៃគណៈអភិបាលស្រុកលើកដែកបានឱ្យដឹងថា កន្លងមក លោកនិងក្រុមការងារតែងតែចុះទៅពិនិត្យមើលនិងបានណែនាំអោយប្រជាពលរដ្ឋមានការប្រុងប្រយ័ត្ន ព្រមទាំងជំរុញអោយអាជ្ញាធរមានសមត្ថកិច្ចត្រូវត្រៀមលក្ខណៈជួយសង្គ្រោះប្រជាពលរដ្ធជាប្រចាំ។
លោកអភិបាលស្រុកលើកដែកបានបន្តថា ឆ្លើយតបទៅនឹងការស្នើសុំរបស់ប្រជាពលរដ្ធជួសជុលធ្វើច្រាំងទន្លេនោះ ឥឡូវនេះខាងរដ្ឋបាលខេត្តបានធ្វើរបាយការណ៍មួយស្នើសុំទៅសម្តេចក្រឡាហោម ស ខេង ឧបនាយករដ្ធមន្ត្រី រដ្ធមន្ត្រីក្រសួងមហាផ្ទៃ ដើម្បីធ្វើការងារនេះ ក្រុមការងារដឹកនាំដោយលោកឡាំ ជា រដ្ធលេខាធិការក្រសួងមហាផ្ទៃនិងជាប្រធានក្រុមការងារគ្រប់គ្រងគ្រោះមហន្តរាយ និងបាក់ច្រាំងទន្លេ បានប្រគល់តួនាទីភារកិច្ចអោយរដ្ធបាលស្រុកសិក្សាវាយតម្លៃផលប៉ះពាល់ចាប់តាំងពីរយៈពេលនៃការបាក់ច្រាំងទន្លេឆ្នាំ២០១៣រហូតមកដល់ឆ្នាំ២០១៩នេះ និងធ្វើរបាយការណ៍ជាលាយលក្ខណ៍អក្សរ ដើម្បីក្រសួងមហាផ្ទៃធ្វើបទអន្តរាគមន៍ជូនដល់ក្រសួងពាក់ព័ន្ធអោយមានវិធានការនិងការកសាងច្រាំងទន្លេដែលបានបាក់នេះ៕ (កែសម្រួលដោយ ៖ ធីតា)
ចែករំលែកព័តមាននេះ