ខេត្តស្ទឹងត្រែង ៖ សេចក្តីរាយការណ៍បឋមឱ្យដឹងថា កម្រិតទឹកនៅទន្លេទាំងបួនបានបន្តហក់ឡើងខ្ពស់ជាងការប្រកាសអាសន្ន ដែលជំរុញឱ្យប្រជាពលរដ្ឋនៅតាមដងទន្លេបង្កើនការប្រុងប្រយ័ត្ន ។ ស្របពេលដែលខេត្តស្ទឹងត្រែង ស្ថិតក្នុងស្ថានភាពអាកាសធាតុអួអាប់ ឯទឹកទន្លេបានហក់ឡើងជាបន្តបន្ទាប់នោះអាជ្ញាធរបានណែនាំទៅដល់ប្រជាពលរដ្ឋនៅក្នុងក្រុងស្ទឹងត្រែងក៏ដូចជាប្រជាពលរដ្ឋ ដែលមានលំនៅដ្ឋាននៅក្បែរដងទន្លេត្រូវមានការប្រុងប្រយ័ត្នចំពោះគ្រោះមហន្តរាយនៃជំនន់ទឹកភ្លៀងនេះ ។
នៅព្រឹកថ្ងៃទី០៤ កញ្ញា នេះ នៅភូមិមួយចំនួនក្នុងក្រុងស្ទឹងត្រែង ត្រូវបានជន់លិចជាបណ្តើរៗហើយ ប៉ុន្តែការខូចខាតនិងរងផលប៉ះពាល់លើផ្ទះសម្បែងរបស់ប្រជាពលរដ្ឋមានទំហំប៉ុន្មាននោះ គឺនៅមិនទាន់ដឹងនៅ ឡើយទេ ។
ក្នុងគ្រាទឹកទន្លេមេគង្គហក់ឡើង ដល់កម្រិត១០,៨២ម៉ែត្រ ខណៈប្រកាសអាសន្ននូវកម្ពស់ទឹក១០,៧០ម៉ែត្រនោះ អាជ្ញាធរខេត្តក៏បានអំពាវនាវឲ្យមានការប្រុងប្រយ័ត្នទាំងនៅក្នុងក្រុង និងនៅទីជនបទ គឺត្រូវត្រៀមលក្ខណៈឱ្យបានហ្មត់ចត់ ជាពិសេស សត្វពាហនៈ និងទ្រព្យសម្បត្តិមានតម្លៃជម្លៀសទៅកាន់ទីទួលមានសុវត្ថិភាព ដើម្បីបញ្ជៀសនូវរាល់គ្រោះថ្នាក់ផ្សេងៗ ដែលកើតឡើងជាយថាហេតុ ដោយប្រការណា មួយនោះ ។
លោក ប៉ាង ប៉េង ប្រធានមន្ទីរធនធានទឹកនិងឧតុនិយមខេត្តស្ទឹងត្រែងបានឱ្យដឹងថា ស្ថានភាពទឹកទន្លេមេ គង្គពីថ្ងៃនេះទៅ គឺហក់ឡើងជាបន្តបន្ទាប់ វានឹងអាចឡើងដល់ ឬលើសកម្រិតប្រកាសអាសន្ន រហូតដល់ថ្ងៃទី០៥ កញ្ញា ខាងមុខ ទឹកឡើងដល់១១ម៉ែត្រជាង ដូច្នេះ ការជូនដំណឹងទៅតាមស្រុក និងឃុំនោះ គឺខាងមន្ទីរបានជូនដំណឹងរួចរាល់អស់ហើយដើម្បីឲ្យមានការត្រៀម ក៏ដូចជាប្រុងប្រយ័ត្នកម្ពស់ទឹក នៅតាមដងទន្លេមេគង្គ ហើយការហក់ឡើងខ្លាំងនូវកម្ពស់ទឹកនេះ គឺដោយសារទទួលរងនូវព្យុះទី១៣ ឈ្មោះ លីងលីង បានជះឥទ្ធិពលមកលើប្រទេសកម្ពុជា ។
ខណៈព្យុះនេះកំពុងស្ថិតនៅសមុទ្រវៀតណាមត្បិតតែយើងរងនូវចំហាយរបស់ព្យុះនេះមែន តែតំបន់មេគង្គខាងលើបានរងសំពាធទាប បណ្តាលឲ្យលិចខ្លាំងក្នុងអាងមេគង្គ ទើបបន្តឲ្យទន្លេមេគង្គហក់ឡើងខ្ពស់ដល់កម្រិតប្រកាសអាសន្ន និងលើប្រកាសអាសន្ន។ (សម្រួលដោយ៖ ស្រីណា)
ចែករំលែកព័តមាននេះ