រាជធានីភ្នំពេញ ៖ កាលពីថ្ងៃទី២៥ មីនា យុទ្ធនាការបករថយន្តបិទស្ទិកឃ័រកញ្ចក់ខ្មៅ នៅខណ្ឌសែនសុខ ដែលដឹកនាំដោយលោកជា ខេមា អភិបាលរងខណ្ឌ លោកជា វិបុល អធិការរងខណ្ឌ និងលោកមេបញ្ជាការរងកងរាជអាវុធហត្ថខណ្ឌបានចាប់ផ្តើមដាក់ប៉ុស្តិ៍ត្រួតពិនិត្យនៅចំណុចទល់មុខអង្គការកាកបាទក្រហមលើផ្លូវលេខ២៧១ ក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ។ គ្រាន់តែដាក់ប៉ុស្តិ៍ត្រួតពិនិត្យរថយន្តបិទកញ្ចក់ខ្មៅរយៈ ពេលជាង៣ម៉ោងប៉ុណ្ណោះ រថយន្តទំនើបៗចំនួន២០គ្រឿង ត្រូវបានសមត្ថកិច្ចបកកញ្ចក់ខ្មៅទាំងស្រុង ហើយធ្វើការផាកពិន័យចំនួន៥ម៉ឺនរៀលក្នុងមួយគ្រឿងថែមទៀតផង ។
ក្នុងយុទ្ធនាការបករថយន្តកញ្ចក់ខ្មៅនេះលោកជា ខេមា បានបញ្ជាឱ្យម្ចាស់រថយន្តដែលបិទកញ្ចក់ខ្មៅត្រូវបកដោយខ្លួនឯង ហើយសមត្ថកិច្ចជាអ្នកឈរមើល បន្ទាប់ពីបកកញ្ចក់ខ្មៅរួច រថយន្តត្រូវបានផាកពិន័យចំនួន៥ម៉ឺនរៀលថែមទៀត ។ ទោះបី ជាយ៉ាងណាប្រជាពលរដ្ឋដែលឈរមើលសកម្មភាពរបស់សមត្ថកិច្ចចាត់វិធានការបករថយន្តបិទកញ្ចក់ខ្មៅបានផ្តល់យោបល់ថា ការបករថយន្តកញ្ចក់ខ្មៅរបស់សមត្ថកិច្ចនិងការពិន័យប្រាក់៥ម៉ឺនរៀលនេះមិនទាន់គ្រប់គ្រាន់នោះទេ គួរតែឃាត់រថយន្តបិទកញ្ចក់ខ្មៅទាំងនេះ យកទៅរក្សាទុកនៅការិយាល័យប៉ូលិសឱ្យបានយូរបន្តិច ទើបរាងចាលខ្លះ ។
ប្រជាពលរដ្ឋបានបន្តថា រថយន្តបិទកញ្ចក់ខ្មៅហាក់ដូចជាកាន់តែកើនឡើងពេលបច្ចុប្បន្ន ហើយធ្វើចរាចរណ៍ពេញរាជធានីភ្នំពេញ បើទោះបីសមត្ថកិច្ចរឹតបណ្តឹងយ៉ាងណាក៏ដោយ ។ ចំណែករថយន្តមានស្លាកលេខខេមរភូមិន្ទមិនមែនពណ៌ត្រេអ៊ី និងរថយន្តពាក់ស្លាកលេខនគរបាលក៏មានចំនួនកើនឡើងមិនតិចដែរ មិនដឹងថា ជាស្លាកលេខសេះហោះ ឬយ៉ាងណានោះទេ ។ ចំពោះសមត្ថកិច្ចវិញ បានអះអាងថា យុទ្ធនាការបកកញ្ចក់ខ្មៅ គឺធ្វើដូចភ្លៀងរលឹម ៕
ចែករំលែកព័តមាននេះ