រាជធានីភ្នំពេញ ៖ ការសាក់គឺសិល្បៈមួយដ៏ពេញនិយម តាំងពីយូរយាណាស់មកហើយ តាំងពីបុរាណកាលមក រហូតមកដល់បច្ចុប្បន្ន ប៉ុន្តែការសាក់នេះ បើសិនជាសម្រាប់មនុស្សប្រុស គឺមិនសូវជាមានការរិះគន់ប៉ុន្មាននោះទេ ក៏ប៉ុន្តែបើសិនជាមនុស្សស្រី គឺអាចរងការរិះគន់ពីសង្គម និងមនុស្សនៅជុំវិញខ្លួន ។
យុវតី ឈ្មោះរ៉េត ម៉ូលីកា អាយុ១៩ឆ្នាំ ជានិស្សិតនៃសាកលវិទ្យាល័យបញ្ញាសាស្ត្របានឱ្យដឹងថា នាងចូលចិត្តការសាក់នេះខ្លាំងណាស់ ព្រោះវាមានភាពស្រស់ស្អាត ហើយយើងក៏អាចសាក់ រូបភាពឬឈ្មោះទៅតាមចំណង់ចំណូលចិត្តរបស់ខ្លួន។
នាងបន្តទៀតថា ការសាក់នេះ ក្រុមគ្រួសាររបស់នាងក៏មិនបានហាមឃាត់អ្វីដែរ ប៉ុន្តែនៅតែមានមនុស្សមួយចំនួនសម្លឹងមើលនាង ដោយខ្សែភ្នែកមិនល្អ។
លោកស្រីរស់ សុភាពប្រធានអង្គការយេនឌ័រ និងអភិវឌ្ឍន៍ដើម្បីកម្ពុជា (GADC) បានបញ្ជាក់ថា មនុស្សស្រីដែលសាក់ពុំមានខុសអ្វីនោះទេ ប៉ុន្តែដោយសារកត្តាសង្គមនៅមានមនុស្សមួយចំនួននៅមានផ្នត់គំនិតទាប ។ ពួកគាត់គិតថា មនុស្សដែលសាក់គឺជាមនុស្សដែលធ្វើនូវរឿងមិនល្អ។
ពួកគាត់មិនព្រមបើកចិត្តទទួលយកអ្វីដែលល្អ និងការសម្រេចចិត្តរបស់បុគ្គលនោះទ្បើយ ហើយចំពោះមនុស្សស្រីគឺតែងតែត្រូវបុគ្គលទាំងនោះដាក់សម្ពាធ និងធ្វើការមាក់ងាយ ដោយលើកទ្បើងថា មនុស្សស្រីត្រូវតែធ្វើបែបនេះបែបនោះទៅតាមសង្គមកំណត់ ។ (សម្រួលដោយ៖ ស្រីណា)
ចែករំលែកព័តមាននេះ