រាជធានីភ្នំពេញ ៖ រថយន្តដឹកទូកុងតឺន័រ១គ្រឿងបានបើកបរក្នុងល្បឿនយ៉ាងលឿនហើយគេមិនដឹងថាអ្នកបើកបរស្រវឹង ឬងងុយដេកនោះទេ ពេលបត់ចូលរោងចក្រមួយកន្លែង ស្រាប់តែរេចង្កូតជ្រុលហោះរំលងប្រឡាយ បន្ទាប់មកបណ្ដាលឲ្យក្រឡាប់ដោយកន្ទុយកុងតឺន័រធ្លាក់ចូលក្នុងប្រឡាយទឹកស្អុយ ចំណែកឯក្បាលរថយន្តក្រឡាប់ដេកស្ដូកនៅលើមាត់ប្រឡាយតែម្ដង ប៉ុន្តែសំណាងល្អមិនបានបណ្ដាលឲ្យអ្នកបើកបរឬអ្នកដំណើរណាម្នាក់រងគ្រោះថ្នាក់ឡើយ ព្រោះពេលហេតុការណ៍នេះកើតឡើងពុំមានមនុស្សឆ្លងកាត់នោះទេ។
ហេតុការណ៍ខាងលើនេះបានកើតឡើងកាលពីវេលាម៉ោង៥ព្រឹកថ្ងៃទី៣ ខែកញ្ញា ឆ្នាំ២០១៩ នៅតាមបណ្ដោយផ្លូវជាតិលេខ៤ ត្រង់ចំណុចភូមិអូរដឹម សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
រថយន្តដឹកទូកុងតឺន័មួយគ្រឿងខាងលើនេះម៉ាកហុីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ ៣E-៧៩៧០ បើកបរដោយបុរសម្នាក់មិនស្គាល់អត្តសញ្ញាណ ។
តាមប្រភពពីអ្នកឃើញហេតុការណ៍បានឱ្យដឹងថា នៅវេលាម៉ោង៥ព្រឹកថ្ងៃកើតហេតុ ពួកគាត់បានឃើញរថយន្តកុងតឺន័រ១គ្រឿងខាងលើនេះធ្វើដំណើរក្នុងល្បឿនលឿន និងក្នុងទិសដៅពីលិចទៅកើតគឺពីខេត្តព្រះសីហនុចូលមកភ្នំពេញ ។ លុះពេលមកដល់ត្រង់ចំណុចកើតហេតុ ក៏បត់បំរុងចូលរោងចក្រមួយកន្លែងនៅជិតនោះ ហើយគេមិនដឹងថា អ្នកបើកបរងងុយដេក ឬសល់ជាតិស្រវឹងក្នុងខ្លួនកាលពីយប់នោះទេ ស្រាប់តែរេចង្កូតជ្រុលហោះរំលងប្រឡាយ បណ្ដាលឲ្យកន្ទុយរ៉ឺម៉កដែលមានដឹកទូកុងតឺន័រធ្លាក់ចូលក្នុងប្រឡាយទឹកស្អុយ ចំណែកឯក្បាលរថយន្តបានក្រឡាប់ដេកផ្អៀងនៅលើមាត់ប្រឡាយ។
តាមប្រភពដដែលបានបន្តថា ខណៈនោះពួកគាត់ស្មានថាអ្នកបើកបរស្លាប់បាត់ទៅហើយ ខំនាំគ្នារត់ទៅមើល លុះពេលទៅដល់ឃើញអ្នកបើកបរមិនមានរងគ្រោះថ្នាក់នោះទេ ហើយនៅពេលមានគ្រោះថ្នាក់នេះកើតឡើងចំពេលស្ងាត់បន្តិច ដោយពុំមានអ្នកដំណើរឆ្លងកាត់ ទើបគ្មានគ្រោះថ្នាក់ដល់អ្នកដទៃឡើយ។
ក្រោយពេលកើតហេតុ អ្នកបើកបរបានលូនចេញពីក្នុងរថយន្ត រួចដើរទៅបាត់ ហើយដោយសារតែគ្មានគ្រោះថ្នាក់ដល់អ្នកដទៃ និងមិនរងការខូចខាតដល់ទ្រព្យសម្បត្តិរដ្ឋនោះ ទើបនគរបាលមិនបាននាំយករថយន្តទៅរក្សាទុកនោះទេ គឺបានប្រគល់ឲ្យម្ចាស់ស្ទូចនាំយករថយន្តកុងតឺន័រទៅធ្វើការជួសជុលដោយខ្លួនឯង៕ (កែសម្រួលដោយ ៖ ធីតា)
ចែករំលែកព័តមាននេះ