សហរដ្ឋអាមេរិក ៖ មនុស្សយ៉ាងតិច៥នាក់បានត្រូវស្លាប់ និង២១នាក់ទៀតរងរបួសដោយសារការបាញ់ប្រហារមិនរើសមុខរបស់ខ្មាន់កាំភ្លើងម្នាក់លើបណ្ដារថយន្ត ក្នុងទីក្រុងODESSAភាគខាងត្បូងសហរដ្ឋអាមេរិកមុនពេលខ្មាន់កាំភ្លើងនោះ ត្រូវប៉ូលិសបាញ់សម្លាប់កាលពីថ្ងៃទី៣១សីហា។
អ្នកនាំពាក្យម្នាក់របស់ប៉ូលិសក្រុងODESSAរដ្ឋតិចសាស់ ថ្លែងទៅកាន់ក្រុមអ្នកកាសែតថា យើងមានអ្នករបួស២១នាក់ដោយគ្រាប់កាំភ្លើង ហើយមនុស្សយ៉ាងតិច៥នាក់ស្លាប់ក្នុងដំណាក់កាលនេះ។ ចំណែកអភិបាលក្រុងMIDLANDជាប់ជិតខាងគ្នា ថ្លែងតាមFOX NEWSថា ប៉ូលិស៣នាក់ស្ថិតក្នុងចំណោមអ្នករបួស។
ការបាញ់ប្រហារថ្មីនោះកើតមានមិនដល់១ខែផង បន្ទាប់ពីខ្មាន់កាំភ្លើងម្នាក់បាញ់សម្លាប់មនុស្ស២២នាក់ ក្នុងទីក្រុងមួយទៀតនៃរដ្ឋតិចសាស់គឺទីក្រុងEL PASOចម្ងាយប្រមាណជា៥០០គីឡូម៉ែត្រខាងលិចក្រុងODESSA។
ការបាញ់ប្រហារកើតមានពេលរថយន្តល្បាតមួយរបស់ប៉ូលិសប៉ុនប៉ងបញ្ឈប់រថយន្តមួយគ្រឿង នៅតាមផ្លូវថ្នល់មួយរវាងក្រុងODESSAនិងក្រុងMIDLANDជិតខាង តែអ្នកបើកបានតម្រង់កាំភ្លើងតាមកញ្ចក់បង្អួចរថយន្ត ហើយបាញ់ជាច្រើនគ្រាប់មកលើកងល្បាតរបស់ប៉ូលិស។
ដំបូងប៉ូលិសម្នាក់រងរបួស ហើយខ្មាន់កាំភ្លើងអាចរត់គេចតែបន្ដបាញ់ប្រហារមិនរើសមុខ លើបណ្ដាជនស្លូតត្រង់ពិសេសបាញ់លើរថយន្តច្រើនគ្រឿង។ ខ្មាន់កាំភ្លើងបន្ទាប់មកត្រូវស្លាប់ក្នុងការបាញ់តតាំងគ្នាជាមួយប៉ូលិស។ មូលហេតុនៃការបាញ់ប្រហារនោះ នៅមិនទាន់ដឹងនៅឡើយ៕ កែសម្រួលដោយ ៖សុឃាក់
ចែករំលែកព័តមាននេះ