ខេត្តកណ្ដាល ៖ សេចក្តីរាយការណ៍បឋមបានឲ្យដឹងថា អ្នកនេសាទត្រីដោយប្រើឧបករណ៍ឆក់ម្នាក់បានបាត់បង់ជីវិតដោយចរន្តភ្លើងអាគុយឆក់ស្លាប់ នៅក្នុងទឹកទន្លេ កាលពីល្ងាចថ្ងៃទី៣១ ខែសីហា ត្រង់ចំណុចភូមិព្រែកតាប្រាក់ ឃុំតាលន់ស្រុកស្អាង ខេត្តកណ្ដាល ខណៈមេឃកំពុងមានភ្លៀង ។
សេចក្តីរាយការណ៍ជនរងគ្រោះឈ្មោះ មើ ម៉ៅ ភេទប្រុស អាយុ៤៩ឆ្នាំ មានទីលំនៅភូមិព្រែកតាប្រាក់ ឃុំតាលន់ ស្រុកស្អាង ខេត្តកណ្ដាល មុខរបរកសិករ និងនេសាទត្រី ។ ជនរងគ្រោះបន្សល់ទុកនៅ ១.អាគុយ៤០អំពែរ១គ្រឿង ពណ៌ស ២.អាំងវ័កទ័រ១គ្រឿង ៣.ដងសម្រាប់ឆក់ ១គូ ។
ដោយក្រុមគ្រួសារជនរងគ្រោះបានប្រាប់សមត្ថកិច្ចថា នៅថ្ងៃកើតហេតុជនរងគ្រោះបានចេញពីផ្ទះទៅរកឆក់ត្រីនៅតាមដងទន្លេបាសាក់ត្រើយខាងកើត ស្ថិតក្នុងភូមិព្រែកតាប្រាក់ឃុំតាលន់ ស្រុកស្អាង ខេត្តកណ្តាល ដែលមេឃកំពុងធ្លាក់ភ្លៀង ។ លុះដល់ម៉ោង៣និង៣០នាទី រសៀលមានបុរសខ្មែរឥស្លាមបានចុះរាយមងចាប់ត្រីក្នុងទន្លេនោះដែរ ហើយក៏បានប្រទះឃើញសពជនរងគ្រាះស្លាប់ក្នុងទឹកទន្លេ បុរសឥស្លាមក៏បានស្រង់សាកសពឡើងលើគោក និងបានប្រាប់អ្នកភូមិ ។
រហូតដល់ម៉ោងជិត៥ល្ងាចដំណឹងនេះបានដឹងដល់ក្រុមគ្រួសារជនរងគ្រោះគេក៏នាំគ្នាទៅមើលឃើញជនរងគ្រោះដេកស្លាប់ក្នុងទឹក ដោយមានឧបករណ៍ឆក់ត្រីស្ពាយជាប់ និងខ្លួនទៀតផង ។
ក្រោយពេលទទួលបានព័ត៌មាននោះភ្លាម កម្លាំងសមត្ថកិច្ចជំនាញគ្រប់ជាន់ថ្នាក់បានចុះទៅពិនិត្យ និងបានសន្និដ្ឋានថា ជនរងគ្រោះពិតជាបាត់បង់ជីវិតដោយមូលហេតុឧបករណ៍ឆក់ត្រី ឆក់ខ្លួនស្លាប់ ខណៈឆ្លងចរន្តនៅពេលមេឃកំពុងមានភ្លៀង ។ សពពិនិត្យរួចត្រូវបានប្រគល់ទៅក្រុមគ្រួសារ ដើម្បីយកទៅធ្វើបុណ្យតាមប្រពៃណី ៕ កែសម្រួលដោយ ៖ សុឃាក់
ចែករំលែកព័តមាននេះ