បុរសជនជាតិវៀតណាមម្នាក់គ្រោងរៀបការជាមួយគូដណ្តឹងរបស់គាត់នៅខែក្រោយ ប៉ុន្តែដោយសារតែនាងបានស្លាប់ពេលជួបគ្រោះថ្នាក់ចរាចរណ៍បានបង្ខំឱ្យគាត់រៀបចំពិធីដ៏ខូចចិត្តមួយនៅថ្ងៃបុណ្យសពរបស់នាង ។ យោងតាមសារព័ត៌មាន Nguoi Dua Tin តាមរយៈ World of…
បុរសជនជាតិវៀតណាមម្នាក់គ្រោងរៀបការជាមួយគូដណ្តឹងរបស់គាត់នៅខែក្រោយ ប៉ុន្តែដោយសារតែនាងបានស្លាប់ពេលជួបគ្រោះថ្នាក់ចរាចរណ៍បានបង្ខំឱ្យគាត់រៀបចំពិធីដ៏ខូចចិត្តមួយនៅថ្ងៃបុណ្យសពរបស់នាង ។
យោងតាមសារព័ត៌មាន Nguoi Dua Tin តាមរយៈ World of Buzz បានឱ្យដឹងថា លោក Dang Thien An និងគូដណ្តឹងរបស់គាត់ដែលមានអាយុ២៥ឆ្នាំ បានទៅធ្វើការនៅប្រទេសជប៉ុន ហើយបានរៀបចំផែនការរៀបអាពាហ៍ពិពាហ៍រួចហើយ គឺនៅថ្ងៃទី២៩ ខែកញ្ញា ។ ហើយស្ត្រីជាគូដណ្តឹងបានសម្រេចចិត្តត្រឡប់ទៅផ្ទះនៅប្រទេសវៀតណាមវិញ ដើម្បីរៀបចំឱ្យមានពិធីមង្គលការរបស់ពួកគេ ។
កាលពីថ្ងៃទី២៥ ខែសីហានេះ នៅពេលដែលនាងកំពុងតែជិះម៉ូតូ ស្រាប់តែប្រទះឃើញគ្រលុកដ៏ធំមួយដែលមានទឹកដក់នៅលើផ្លូវ Cu Chi ក្នុងទីក្រុងហូជីមិញ ប្រទេសវៀតណាម ។ នាងបានព្យាយាមចាប់ហ្វ្រាំង និងគេចចេញពីគ្រលុកនោះ ប៉ុន្តែស្រាប់តែមានរថយន្តបើកពីមុខបានបុកម៉ូតូដែលនាងកំពុងជិះ ។ ក្រុមគ្រួសាររបស់ស្ត្រីរងគ្រោះត្រូវបានគេជូនដំណឹងភ្លាមៗ តែជាអកុសលនាងបានស្លាប់នៅកន្លែងកើតហេតុទៅហើយ ។
លោក Dang បន្ទាប់ពីគាត់បានឃើញវីដេអូផ្សាយផ្ទាល់ពីអ្វីដែលបានកើតឡើង ដោយគាត់កត់សម្គាល់ឃើញថា រាងកាយមើលទៅស្រដៀងនឹងគូដណ្តឹងរបស់លោកនោះ គឺភ្លាមៗនោះលោកបានសួរទៅកាន់អ្នកដែលបានចុះផ្សាយព័ត៌មានបន្ថែមទាក់ទងនឹងគ្រោះថ្នាក់នេះ ។ បន្ទាប់ពីការសង្ស័យរបស់គាត់ត្រូវបានបញ្ជាក់លោក Dang បានកក់ជើងហោះហើរត្រឡប់ទៅប្រទេសវៀតណាមភ្លាមៗហើយបានប្រកាសនៅលើហ្វេសប៊ុករបស់លោកដោយមានន័យថា «ពិធីមង្គលការនឹងធ្វើឡើងនៅម៉ោង១០យប់នេះជំនួសវិញ ។ សង្ឃឹមថាអ្នកទាំងអស់គ្នាអាចទុកពេលខ្លះសម្រាប់ពិធីមង្គលការរបស់យើង មុនពេលខ្ញុំលាប្រពន្ធខ្ញុំ» ។
មានមនុស្សជាច្រើនត្រូវបានគេរាយការណ៍ថា បានចូលរួមរំលែកទុក្ខនៅលើផ្ទាំងរូបភាពដែលត្រូវបាន Post ខណៈពេលដែលក្រុមគ្រួសារ និងមិត្តភក្តិបានជួបជុំគ្នាសម្រាប់ពិធីខូចចិត្តនេះ ។
ពេលលុតជង្គង់នៅពីមុខមឈូសរបស់នាងលោក Dang បានយកភួងផ្កា និងប្រអប់គ្រឿងអលង្ការមួយដែលមានចិញ្ចៀនរៀបការរបស់ពួកគេ ។ លោកបាននិយាយថា ដំបូងឡើយខ្ញុំមានគម្រោងច្រៀងជូនអ្នកក្នុងពិធីមង្គលការរបស់យើង ប៉ុន្តែខ្ញុំអាចច្រៀងបានតែពេលនេះប៉ុណ្ណោះ ។ ខ្ញុំចង់រៀបចំពិធីមង្គលការជាមួយអ្នកឥឡូវនេះ ។
លោក Dang បាននិយាយថា «ភរិយារបស់ខ្ញុំ គឺជាមនុស្សល្អបំផុតដែលខ្ញុំធ្លាប់បានជួបហើយខ្ញុំនឹងព្យាយាមអស់ពីសមត្ថភាព ដើម្បីរស់នៅដោយគ្មាននាង»។ «នាងបានប្រាប់ខ្ញុំថា នាងស្រឡាញ់ខ្សែ.កតូចមួយ ប៉ុន្តែខ្ញុំដឹងថា នាងគ្រាន់តែនិយាយប៉ុណ្ណោះ ដោយសារតែនាងមិនចង់ឱ្យខ្ញុំខ្ជះខ្ជាយលុយលើនាង ។ ខ្ញុំតែងតែខិតខំផ្តល់ឱ្យនាងនូវអ្វីគ្រប់យ៉ាងដែលនាងចង់បានហើយខ្ញុំនឹងបន្តធ្វើ ។ Dang បាននិយាយដូច្នេះនៅពេលគាត់ដាក់ខ្សែ.ក ដែលគាត់បានទិញនៅក្បែររូបថតរបស់គូដណ្តឹង ។ លោកបន្តថា មិនអីទេអ្នកទៅឋានសួគ៌ជាមុន ហើយរង់ចាំខ្ញុំ ខ្ញុំនឹងទៅជាក្រោយ ៕ កែសម្រួលដោយ ៖ សុឃាក់
ប្រភព៖ Nextshark
ចែករំលែកព័តមាននេះ