រាជធានីភ្នំពេញ ៖ បញ្ហាបាតុកម្មនៅទីក្រុងហុងកុងដែលបានអូសបន្លាញពេលជិត ៣ ខែកន្លងទៅនេះមិនត្រឹមតែធ្វើឲ្យពិភពលោកចាប់អារម្មណ៍និងមានការព្រួយបារម្មណ៍ពាក់ព័ន្ធនឹងបញ្ហាសន្តិសុខនិងសេដ្ឋកិច្ចប៉ុណ្ណោះទេ សម្រាប់កម្ពុជាវិញបាតុកម្មដែលប្រែក្លាយទៅជាកូដកម្មនិងកុបកម្មផងនោះ បាននឹងកំពុងតែប៉ះពាល់ដល់អ្នកប្រកបអាជីវកម្មមួយចំនួននៅកម្ពុជា ជាពិសេសអាជីវកម្មទំនិញតាមប្រព័ន្ធអនឡាញរបស់អាជីវករខ្មែរ និងហុងកុង ព្រោះការបញ្ជួនទំនិញមានការយឺតយ៉ាវ ។ ជាក់ស្ដែងទំនិញដែលអាជីវករកម្ពុជាកុម្មង់កាលពីមុន គឺយូរបំផុតត្រឹមតែ២សប្ដាហ៍នឹងទទួលបានទំនិញ តែពេលនេះការផ្ញើទំនិញពីហុងកុងមកកម្ពុជាបានអូសបន្លាយពេលយូរ ។
បើតាមអ្នកស្រី ទៀង អាជីវករកម្ពុជា ដែលនាំទំនិញពីហុងកុងមកលក់និងចែកចាយនៅក្នុងប្រទេសកម្ពុជា តាមរយៈអនឡាញបានឱ្យដឹងថា «ក្នុងរយៈពេលប៉ុន្មានសប្ដាហ៍មកនេះ ទំនិញដែលខ្ញុំកុម្មង់ពីហុងកុងមកកម្ពុជាហាក់មានការយឺតយ៉ាវជាងសព្វដង ហើយមានអតិថិជនខ្មែរខ្លះចាប់ផ្ដើមអន់ចិត្តឬខឹង ដោយសារតែទំនិញរបស់ខ្លួនកុម្មង់មិនបានមកដល់តាមពេលវេលាកំណត់ ដោយសារតែបញ្ហាមួយចំនួនដែលកើតមាននៅហុងកុង» ។ អ្នកស្រីបានបន្តថា ភាគីខាងយើង បានសាកសួរទៅភាគីហុងកុងថាតើហេតុអ្វីទើបទំនិញរបស់យើងមិនបានមកដល់កម្ពុជាតាមពេលវេលា តែភាគីហុងកុងមិនបានប្រាប់យើងថាមកពីបាតុកម្មនិងភាពហ្វឹកវរនៅហុងកុងឡើយ ។ ពួកគេប្រាប់ថា ដោយសារតែអាកាសធាតុមិនអំណោយផល ទើបធ្វើអោយកប៉ាល់ដឹកទំនិញត្រូវយឺតយ៉ាវ មិនមកដល់គោលដៅតាមពេលវេលា ។ មួយទៀតគេប្រាប់យើងថា ដោយសារតែច្រលំអីវ៉ាន់ ដោយអីវ៉ាន់ដែលត្រូវដឹកមកកម្ពុជា បែរជាដឹកទៅប្រទេសផ្សេងទៅវិញដូចជាដឹកទៅវៀតណាមជាដើម ទើបធ្វើឱ្យមានការយឺតយ៉ាវក្នុងការដឹកត្រលប់មកកម្ពុជាវិញ ។ តែយ៉ាងណាក៏ដោយ ជាការកត់សម្គាល់អីវ៉ាន់ចាប់ផ្ដើមមានបញ្ហាយឺតយ៉ាវ ចាប់តាំងពីលេចលឺព័ត៌មានភាពហ្វឹកវរនៅទីក្រុងហុងកុងម្ល៉េះ ។
ដោយឡែកកញ្ញា ចិន្តា ដែលជាអ្នកប្រកបមុខរបរលក់អនឡាញដែរនោះ ក៏បានអោយដឹងផងដែរថាដោយសារតែ ការកុម្មង់ទំនិញពីហុងកុងដោយ ផ្ទាល់ មានការយឺតយ៉ាវ ទើបកញ្ញាសម្រេចចិត្តកុម្មង់ទំនិញហុងកុង តាមរយៈក្រុមហ៊ុនវៀតណាមវិញ ។ កញ្ញាបានបន្តថា «វៀតណាមគេមានស្តុក ( ឃ្លាំងផ្ទុកទំនិញ ) ធំ ដូច្នេះ គេអាចទិញទំនិញពីហុងកុងម្ដងច្រើនបាន ហើយយកដាក់ក្នុងស្តុករបស់គេ រួចចែកចាយទៅដៃគូបន្តទៀត ដូចជាបញ្ជូនមកកម្ពុជា ជាដើម អញ្ចឹងហើយទើបការកុម្មង់ទំនិញពីវៀតណាមលឿនជាងពីហុងកុង » ។
អាជីវករម្ចាស់អាជីវកម្មអនឡាញរូបនេះបានបន្តថា ការកុម្មង់ទំនិញតាមរយៈវៀតណាមលឿនដូច្នេះ ទើបមិនធ្វើអោយអតិថិជនរបស់ខ្លួនអន់ចិត្តឡើយ ដូច្នេះ នៅតែអាចរក្សាម៉ូយបានដដែល តែបើកុម្មង់តាមហុងកុងផ្ទាល់ ទាល់តែកុម្មង់អោយច្រើនហើយយកមកទុកក្នុងស្តុកដោយខ្លួនឯង តែយើងមិនមានស្តុកធំសម្រាប់ផ្ទុកទេ អញ្ចឹងយើងអាចកុម្មង់ទំនិញម្ដងបន្តិចមកលក់ ។ កញ្ញានិយាយថា៖« យើងកុម្មងទំនិញ លុះត្រាតែមានការកុម្មង់ពីអតិថិជនទើបយើងកុម្មង់បន្ត យើងមិនអាចកុម្មង់ទំនិញរាប់តោនមកទុកបានទេ ព្រោះយើងអ្នករកស៊ីអនឡាញខ្នាតតូច មិនមានលទ្ធភាពអីសង់ឃ្លាំងធំៗ ដើម្បីស្តុកទំនិញបានទេ » ។ អាជីវករខ្លះទៀតបានអះអាងថា ដោយសារតែការយឺតយ៉ាវនៃការបញ្ជួនទំនិញពីហុងកុងមកកម្ពុជា ធ្វើឲ្យអតិថិជនមួយចំនួនបានលុបចោលការកម្មង់ ធ្វើឲ្យទំនិញដែលមកដល់កម្ពុជាយឺតយ៉ាវនោះ ពិបាកនឹងលក់ចេញ ឬត្រូវលក់ក្នុងតម្លៃខាត ។
«ភ្ញៀវខ្លះគាត់ចង់បានឥវ៉ា់ន់កម្មង់ត្រឹម ២ សប្តាហ៍ តែពេលនេះការបញ្ជួនឥវ៉ាន់ដូចជាខោអាវ កាបូប និងស្បែកជើងដែលមានលក្ខណៈជា Top Grade មានការយឺតយ៉ាវ អញ្ចឹងភ្ញៀវរបស់ខ្ញុំគាត់អន់ចិត្ត ហើយខ្លះមិនព្រមយកទំនិញពេលទំនិញមកយឺតពេល»។ នេះជាការលើកឡើងរបស់អ្នកស្រី ផា ភួង ដែលជាអាជីវករលក់ខោអាវ និងកាបូប យកពីហុងកុង ជាង ៥ ឆ្នាំកន្លងមកនេះ ។ អ្នកស្រីបានបន្តថាទំនិញបញ្ជួនពីហុងកុងមកកម្ពុជាពីមុនយូរបំផុតត្រឹម ២ សប្តាហ៍ តែឥវ៉ាន់ចុងក្រោយដែលអ្នកស្រីកម្មង់តាំងពីចុងខែ ៦ មកដល់ពេលនេះគឺមិនទាន់មកដល់កម្ពុជានោះទេ ។ អ្នកស្រីបញ្ជាក់ «ការពិតទៅ តិចឬច្រើន គឺការធ្វើបាតុកម្មនៅហុងកុងពិតជាប៉ះពាល់ដល់ពួកខ្ញុំអ្នករកស៊ីពិតមែន ព្រោះរយៈពេលនៃការមកដល់នៃទំនិញពីហុងកុងមកដល់ភ្នំ
ពេញឥឡូវនេះ គឺយូរជាងមុនខ្លាំង អញ្ចឹងខ្ញុំក៏បាត់ម៉ូយមួយចំនួនដែរ ដោយសារតែមិនមានឥវ៉ាន់ជូនភ្ញៀវតាមការកំណត់» ។
សូមបញ្ជាក់ថា ហុងកុងនៅរយៈពេលប្រមាណជិត៣ខែនេះ បាតុកម្មប្រឆាំងនឹងរដ្ឋាភិបាលចិន បានកើតឡើងពេញទីក្រុងមួយនេះ ហើយបាតុករបានដើរស្រែកនៅតាមដងផ្លូវនានាក្នុងទីក្រុង ធ្វើឱ្យប៉ះពាល់ធ្ងន់ធ្ងរដល់សេដ្ឋកិច្ចទីក្រុងកោះមួយនេះ ។យ៉ាងណាមិញតាមប្រភពព័ត៌មានបរទេសបានសរសេរថា អាកាសយានដ្ឋានអន្តរជាតិហុងកុងក៏បានត្រូវផ្អាកដោយពេលផងដែរ ដោយសារតែមានការប៉ះទង្គិចរវាងបាតុករនិងកំលាំងសមត្ថកិច្ចហុងកុង ។ ដោយឡែកអាកាសយានដ្ឋានអន្តរជាតិកម្ពុជា ក៏បានប្រកាសដល់អ្នកដំណើរឱ្យបើមើលព័ត៌មានជើងហោះហើរពីកម្ពុជាទៅក្រុងហុងកុងដែរ ព្រោះថាជើងហោះហើរមួយចំនួនមានការប៉ះពាល់ពីបាតុកម្មហិង្សារនៅហុងកុង ។
គួរបញ្ជាក់ផងដែរថា អាជីវកម្មលក់ទំនិញអនឡាញនៅកម្ពុជានាពេលបច្ចុប្បន្ននេះ ក៏ត្រូវបានមើលឃើញថាមានកំណើនឡើងគួរអោយកត់សម្គាល់ ហើយក្រសួងពាណិជ្ជកម្មក៏បានកំពុងអនុម័តច្បាប់ស្ដីពីអាជីវកម្មអនឡាញនេះដែរនៅកម្ពុជាដែរ ដើម្បីគ្រប់គ្រងនូវហានិភ័យមួយចំនួនដែលនឹងកើតឡើងពីការរកស៊ីមិនស្មោះត្រង់ចំពោះជនមួយចំនួន ៕ កែសម្រួលដោយ ៖ សុឃាក់
ចែករំលែកព័តមាននេះ