រាជធានីភ្នំពេញ ៖ តារាសម្តែង និងបង្ហាញម៉ូដនាង អ៊ឹង និមល បានប្រកាសជំហរទទួលយកការប្តឹងពីអ្នកសារ ព័ត៌មានមួយរូប ជុំវិញរឿងគ្រោះថ្នាក់ចរាចរណ៍ដោយអចេតនាមួយ ដែលបានកើតឡើងកាលពីរាត្រីឆ្លងចូលថ្ងៃទី២៨ ខែសីហា ឆ្នាំ២០១៩ នៅក្នុងបុរីមួយក្នុងរាជធានីភ្នំពេញ។
តារាសម្តែងរូបនេះបានអះអាងថា ខ្លួននឹងទទួលយកការប្តឹងពីអ្នកសារព័ត៌មានដែលជាជនរងគ្រោះដោយសាររថយន្តរបស់នាងបានប៉ះធ្វើឲ្យខូចខាតរបងផ្ទះរបស់គាត់ ក្រោយកើតមានឧប្បទ្ទវហេតុដោយអចេតនា ។
អ៊ឹង និមល បានអះអាងប្រាប់កោះសន្តិភាពថា ខ្ញុំនឹងម្ចាស់ឡាន គឺសម្រួលគ្នារួចហើយ តែនៅឡើយបងម្ចាស់របងគាត់យកលេខផ្ទះខ្ញុំមកផុស ទាំងខ្ញុំមិនទាន់បានថា មិនសងសំណងទៅគាត់ ។ នាងបញ្ជាក់ថា បើគាត់ប្ដឹងខ្ញុំ ខ្ញុំក៏ទទួល ព្រោះខ្ញុំក៏មិនដឹងថា គាត់ប្តឹងខ្ញុំពីបទអ្វី? ខ្ញុំស្វាគមន៍ជានិច្ចព្រោះខ្ញុំខុស ខ្ញុំក៏ទទួលសងតែគាត់ជាអ្នកយកលេខឡាន លេខផ្ទះរបស់ខ្ញុំមកផុសជាសាធារណៈ តើមានច្បាប់ដែរទេ? ដែលឡានបង្កហេតុ តែបែរជាយកលេខផ្ទះគេមកផុស ហើយបំភ្លើសថា បងប្រុសខ្ញុំប្រកែកមិនសងរបងគាត់ ។
ក្នុងនាមគាត់ជាអ្នកកាសែតមួយរូបដែរ ខ្ញុំអត់មានអីនិយាយទេ បើគាត់ចង់ប្តឹងខ្ញុំចាំគាត់ ។ ខ្ញុំដើរតាមគាត់ បើចប់ខ្ញុំក៏ចប់ តែបើគាត់មិនព្រមចប់ខ្ញុំក៏កំដរគាត់ ។
គួរំឭកថា តារាសម្តែង អ៊ឹង និមល បានបើករថយន្តម៉ាក Highlander របស់ខ្លួនពាក់ស្លាកលេខ 2AM.8395 ទៅបុករថយន្តរបស់អ្នកជិតខាងមួយគ្រឿងម៉ាក Pruise ពណ៌ទឹកប្រាក់ បណ្ដាលឲ្យខូចខាតកង់ខាងក្រោយផ្នែកខាងឆ្វេង ។ ឧប្បត្តិហេតុនោះ ក៏បានបណ្ដាលឲ្យខូចខាតដល់របងផ្ទះលោក ម៉ៃ ទិត្យថារ៉ា ដែលជាអ្នកសារព័ត៌មានមួយរូប ដែលនៅផ្ទះជាប់គ្នានឹងផ្ទះរបស់នាងផងដែរ ។
ក្រោយហេតុការណ៍ អ៊ឹង និមល បានអះអាងថា ហេតុការណ៍កើតឡើងដោយសារតែនាង ងោកមួយភាំង តែនាងបានទទួលស្គាល់កំហុស និងបានធ្វើការសុំទោសទៅដល់ម្ចាស់ទ្រព្យដែលរងការប៉ះទង្គិចនោះផងដែរ ។ ជាមួយគ្នានោះ នាងក៏ធានាចេញសំណងទៅលើការខូចខាតផងដែរ នៅក្នុងការជួបសម្រុះសម្រួលគ្នាភ្លាមៗ បន្ទាប់ពីកើតហេតុ ។ ប៉ុន្តែរំលងបានមួយថ្ងៃតារារូបនេះបានសម្រេចថា មិនសងលើការខូចខាតរបងផ្ទះរបស់អ្នកសារព័ត៌មានឡើយ ជាថ្នូរនឹងអ្វីដែលលោកបានយកលេខផ្ទះរបស់នាងទៅបង្ហោះដោយមិនមានការយល់ព្រមពីនាង ។
ទាក់ទងទៅនឹងការលើកឡើងខាងលើរបស់ អ៊ឹង និមល នាពេលនេះលោក ម៉ៃ ទិត្យថារ៉ា បានអះអាងប្រាប់បណ្តាញសារព័ត៌មានក្នុងស្រុកមួយថា លោកចង់ឲ្យច្បាប់ធ្វើការលើរឿងនេះ ដោយលោកលើកហេតុផលថា និមល បាននិយាយប៉ះពាល់ទៅដល់លោក ដល់អ្នកមានគុណរបស់លោក នៅក្នុងវីដេអូ Live របស់នាង ដោយមានប្រើដល់ទៅពាក្យ «អា» ថែមទៀត ។ ដូច្នេះហើយលោកស្នើឲ្យភាគីតារាស្រី ធ្វើវីដេអូសុំទោស ហើយលោកក៏នឹងរង់ចាំមើលទៀត ប្រសិនបើមានការចេញមកអធិប្បាយណាមួយដែលធ្វើប៉ះពាល់ដល់លោកថែមទៀត លោកនឹងធ្វើទៅតាមច្បាប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ