ខេត្តកំពង់ចាម ៖ លោកចៅក្រមស៊ើបសួរ តេង រតនា បានចេញដីកាឃុំខ្លួនកំលោះសក់ទង់ដែងម្នាក់ឈ្មោះអួ ពន្លក អាយុ១៩ឆ្នាំ រស់នៅភូមិវាល ឃុំពាមប្រធ្នោះ ស្រុកកោះសូទិន ចុះថ្ងៃទី២៥ មីនា ២០១១ ដោយចោទប្រកាន់ពីបទរំលោភសេពសន្ថវៈប្រព្រឹត្តលើនារីកម្មករលាងរថយន្តអាយុ២១ឆ្នាំ ស្នាក់នៅបណ្តោះអាសន្នក្នុងឃុំមេមត់ ស្រុកមេមត់ ។
ទាក់ទិននឹងករណីនេះ ត្រូវបានលោកវរសេនីយ៍ត្រី ឯម កុសល អធិការនគរបាលស្រុកមេមត់ ឲ្យដឹងថា នៅវេលាម៉ោង១២ថ្ងៃត្រង់ ថ្ងៃទី២៣ មីនា កំលាំងប៉ុស្តិ៍រដ្ឋបាលត្បូងវត្ត បានទទួលពាក្យបណ្តឹងពីនាង «ស.គ» អាយុ២១ឆ្នាំ ដែលមានទីលំនៅស្រុកពញាក្រែក បានប្តឹងចោទប្រកាន់ឈ្មោះពន្លក ជាកម្មករលាងរថយន្តនៅឃុំមេមត់ ស្រុកមេមត់ ថា បានចាប់រំលោភរូបនាងកាលពីវេលាម៉ោង៧យប់ ថ្ងៃទី២២ មីនា ២០១១ នៅក្នុងបន្ទប់ទឹកខាងក្រោមផ្ទះកន្លែងស៊ីឈ្មួលលាងរថយន្ត។ ក្រោយពីបានទទួលពាក្យបណ្តឹងនេះភ្លាម រូបលោកបានចាត់កំលាំងប៉ុស្តិ៍ និងជំនាញព្រហ្មទណ្ឌស្រុកឲ្យចុះទៅកាន់ផ្ទះបើកលាងរថយន្តនោះ ដើម្បីសួរនាំពីក្រុមកម្មករដែលកំពុងបម្រើការងារលាងរថយន្ត តែជនសង្ស័យបានប្រញាប់ប្រញាល់ឡើងជិះរថយន្តឈ្មួលចេញពីមេមត់មកកាន់លំនៅឋានរបស់ខ្លួននៅភូមិវាល ឃុំពាមប្រធ្នោះ ស្រុកកោះសូទិន បាត់ មុនពេលដែលនាងរងគ្រោះមកប្តឹងសមត្ថកិច្ច។ បន្ទាប់មកលោកក៏បានទូរស័ព្ទទៅកាន់លោកវរសេនីយ៍ត្រី ហ៊ាង ហ៊ត់ អធិការនគរបាលស្រុកត្បូងឃ្មុំ ព្រមទាំងកំលាំងការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្ត ដើម្បីជួយអន្តរាគមន៍តាមស្ទាក់ចាប់ជនសង្ស័យនៅឃុំជប់ ស្រុកត្បូងឃ្មុំ ។
ចំណែកនារីរងគ្រោះបានបំភ្លឺប្រាប់ថា នៅវេលាម៉ោង៧យប់ថ្ងៃទី២២ មីនា នោះ ក្រោយពីដាំបាយ និងស្ល រួចរាល់នាងក៏ដើរចូលទៅក្នុងបន្ទប់ដេកដែលស្រីៗកម្មករស្នាក់នៅ ដើម្បីផ្លាស់សម្លៀកបំពាក់ចូលទៅក្នុងបន្ទប់ទឹក ព្រមទាំងបានបូមទឹកដាក់ពេញអាង។ ខណៈនោះស្រាប់តែឈ្មោះពន្លក ដែលជាកម្មករលាងរថយន្តដូចគ្នាបានចូលមកចាប់អោបនាងពីខាងក្រោយ ភ្លាមៗនោះនាងបានស្រែកហៅឈ្មោះហេម នៅជាមួយគ្នាឲ្យជួយតែមិនមានអ្នកណាម្នាក់ចូលទៅជួយទេ ចំណែករូបនាងទោះបីខំរើបម្រះយ៉ាងណាក្តីមិនរួចដែរ ហើយជននេះបានចាប់នាងរំលោភរហូតដល់បានសំរេច។ មិនតែប៉ុណ្ណោះបានគំរាមនាងមិនឲ្យយករឿងនេះទៅប្រាប់អ្នកណាជាដាច់ខាត បើពុំនោះទេនឹងសំលាប់ចោលទៀតផង។ លុះព្រឹកឡើងថ្ងៃទី២៣ មីនា នាងបានទូរស័ព្ទទៅប្រាប់ឪពុកម្តាយនៅឯស្រុកពញាក្រែកឲ្យប្តឹងមកសមត្ថកិច្ចតាមចាប់ឈ្មោះពន្លក ដែលក្នុងករណីនេះនាងប្តឹងទាមទារសំណងជំងឺចិត្តចំនួន៥.០០០ដុល្លារ និងឲ្យផ្តន្ទាទោសតាមច្បាប់ ។
ជនសង្ស័យឈ្មោះអួ ពន្លក បានឆ្លើយសារភាពថា រយៈពេលជាង១ខែមកហើយ ដែលរូបគេបានចេញពីផ្ទះទៅស៊ីឈ្មួលលាងរថយន្ត និងម៉ូតូនៅផ្ទះរបស់ឈ្មោះស្រី អូន នៅក្នុងឃុំមេមត់ស្រុកមេមត់។ ក្នុងរយៈពេលនោះរូបគេក៏បានមានទំនាក់ទំនងស្រឡាញ់គ្នាជាមួយនាង«ស.គ» ដែលជាកម្មករដូចគ្នា ហើយក៏មានកម្មករស្រី២នាក់ទៀតបានដឹងឮទៀតផងពីរឿងស្នេហារបស់ពួកគេទាំង២នាក់នេះ។ ក្រោយពីបានស្គាល់ចិត្តស្គាល់ថ្លើមគ្នាមក ក៏បានណាត់រួមរ័ក២ទៅ៣យប់ម្តងជាហូរហែមកដោយមិនមានការបង្ខិតបង្ខំទេ ហើយគិតថានឹងយកគ្នាជាប្តីជាប្រពន្ធទៀតផង។ ក្រោយមកទៀតនៅវេលាម៉ោង១១ព្រឹកថ្ងៃទី២១ មីនា ២០១១ នាងបានបបួលរូបគេមកលេងផ្ទះរបស់នាងនៅក្នុងឃុំកោងកាង ស្រុកពញាក្រែក ហើយនាវេលាល្ងាចរូបគេបានអង្គុយនិយាយលេងជាមួយឪពុកម្តាយរបស់នាង លុះដល់ម៉ោងប្រហែលជា៧យប់ ក៏បានចូលទៅដេកនៅលើផ្ទះ ចំណែកឯឪពុកម្តាយនាងសំរាន្តនៅខាងក្រោមផ្ទះ។ ក្នុងយប់នោះរូបគេរួមភេទជាមួយនឹងនាងបានចំនួន២ដងទៀត ដោយមិនមានការចាប់បង្ខំ ឬប្រវាយប្រតប់គ្នាឡើយ។
នៅព្រឹកថ្ងៃទី២២ មីនា ពួកគេទាំង២នាក់ បាននាំគ្នាធ្វើដំណើរទៅស្រុកមេមត់កន្លែងធ្វើការវិញ ហើយនាល្ងាចថ្ងៃដដែលរូបគេ បានប្រាប់នាងថា «នៅព្រឹកថ្ងៃស្អែកនេះ ថ្ងៃទី២៣ មីនា នឹងទៅលេងផ្ទះនៅភូមិវាល ឃុំពាមប្រធ្នោះ ស្រុកកោះសូទិន» លុះជិះរថយន្តមកដល់ថ្នល់ទទឹង ឃុំជប់ ស្រុកត្បូងឃ្មុំ ក៏ត្រូវកម្លាំងសមត្ថកិច្ចមកស្ទាក់រថយន្តដែលគេជិះនោះនាំត្រឡប់ទៅស្រុកមេមត់វិញ ៕
ចែករំលែកព័តមាននេះ