លែងកូនត្រី និងមេពូជត្រីជាង9ម៉ឺនក្បាលក្នុងស្រុកទឹកផុស
- កំពង់ឆ្នាំង
ខេត្តកំពង់ឆ្នាំង ៖ លោក ឈួរ ច័ន្ទឌឿន អភិបាលខេត្តកំពង់ឆ្នាំងបានអំពាវនាវឲ្យប្រជាពលរដ្ឋចូលរួមថែរក្សា បឹងបួរ ត្រពាំង ធម្មជាតិ នៅតាមមូលដ្ឋានភូមិ-ឃុំ…
ខេត្តកំពង់ឆ្នាំង ៖ លោក ឈួរ ច័ន្ទឌឿន អភិបាលខេត្តកំពង់ឆ្នាំងបានអំពាវនាវឲ្យប្រជាពលរដ្ឋចូលរួមថែរក្សា បឹងបួរ ត្រពាំង ធម្មជាតិ នៅតាមមូលដ្ឋានភូមិ-ឃុំ និងចិញ្ចឹមត្រីនៅតាមផ្ទះដើម្បីទ្រទ្រង់ជីវភាពគ្រួសារ ។
មានប្រសាសន៍បែបនេះនៅក្នុងពិធីលែងកូនត្រី និងមេពូជត្រីនៅបឹងខ្សែត ស្ថិតនៅក្នុងភូមិចោងម៉ោង ឃុំចោងម៉ោង ស្រុកទឹកផុស នាព្រឹកថ្ងៃទី29 ខែសីហា ឆ្នាំ2019 ដោយមានប្រជាពលរដ្ឋមន្ត្រីរាជការចូលរួមជាច្រើនរូបទៀត ។
លោកអភិបាលខេត្តបានបន្តថា ការលែងកូនត្រី និងមេពូជត្រី ចូលបឹងធម្មជាតិ គឺជាកម្មវិធីមួយដែលរាជរដ្ឋាភិបាលបានកំណត់សម្រាប់ឱ្យមន្ត្រីរាជការថ្នាក់ខេត្តជាអ្នកអនុវត្តនិងមួយឆ្នាំម្តងគឺប្រារព្ធពិធៅថ្នាក់ជាតិម្ដង ។ ពិធីនេះផងដែរគឺចង់ក្រើនរំលឹកឲ្យប្រជាពលរដ្ឋយកចិត្តទុកដាក់ការចិញ្ចឹមត្រីនៅតាមផ្ទះ តាមសាលារៀន វត្តអារាមនិងតាមអង្គភាពរបស់រដ្ឋនៅតាមមូលដ្ឋាន ។
អភិបាលខេត្តកំពង់ឆ្នាំងបានបញ្ជាក់ដែរថាតាមការស្រាវជ្រាវរបស់អ្នកវិទ្យាសាស្ត្រមនុស្សយើងម្នាក់ៗត្រូវការហូបត្រីក្នុងមួយឆ្នាំចំនួនជាង 52 គីឡូក្រាម គឺបរិភោគត្រីច្រើនជាងសាច់ ។ ហេតុដូច្នេះហើយដើម្បីដោះស្រាយបញ្ហានេះយើងទាំងអស់គ្នាគួរតែចូលរួមការចិញ្ចឹមត្រីនៅតាមផ្ទះនិងសហគមន៍ដើម្បីផ្គត់ផ្គង់ជីវភាពគ្រួសារ ។
ជាចុងក្រោយលោកក៏បានសំណូមពរប្រជាពលរដ្ឋសូមចូលរួមថែរក្សា ពូជមច្ឆាជាតិ ដោយមិនត្រូវនេសាទត្រីក្នុងរដូវហាមឃាត់ពិសេសការប្រើប្រាស់ឧបករណ៍ឆក់ត្រីដែលជាអំពើល្មើសច្បាប់ និងមានទោសព្រហ្មទណ្ឌ ។
យោងរបាយការណ៍របស់លោក ងិន ហ៊ុនប្រធានមន្ទីរកសិកម្ម រុក្ខាប្រមាញ់និងនេសាទខេត្តកំពង់ឆ្នាំង បានអោយដឹងថាពិធី លែងកូនត្រី នៅក្នុងបឹងខ្សែតដែលមានទំហំជាង 14 ហិកតា នៅព្រឹកនេះមានចំនួនជាង 8 ម៉ឺនក្បាល និងត្រីមេពូជចំនួនជាង1 ម៉ឺនក្បាល ក្នុងនោះមានត្រីឆ្ពិន ត្រីអណ្ដែង ត្រីរ៉ស់ ត្រីក្រាញ់ អន្ទង់ កង្កែបខ្យង ជាមួយគ្នានេះក៏មានដាំកូនឈើ ព្រៃលិចទឹក ចំនួន 200 ដើមផងដែរ ៕
កែសម្រួលដោយ ៖ សំណាង
ចែករំលែកព័តមាននេះ