ខេត្តសៀមរាប៖ ក្នុងគោលបំណងលើកកម្ពស់សោភ័ណភាព បង្កើនភាពស្រស់ស្អាត និងទេសភាពបៃតងតាមដងផ្លូវ សំខាន់ៗក្នុងក្រុងសៀមរាបទៅកាន់រមណីយដ្ឋានអង្គរ អាជ្ញាធរជាតិអប្សរា គ្រោងនឹងដាំកូនឈើលម្អផ្លូវចាប់ពីអាកាសយានដ្ឋានអន្ដរជាតិខេត្ត សៀមរាបរហូតដល់មុខប្រាសាទអង្គរវត្ត ។ គម្រោងនេះមិនត្រឹមតែបង្កើនភាពទាក់ទាញបែបលក្ខណៈធម្មជាតិដល់រមណីយដ្ឋានអង្គរប៉ុណ្ណោះទេ…
ខេត្តសៀមរាប៖ ក្នុងគោលបំណងលើកកម្ពស់សោភ័ណភាព បង្កើនភាពស្រស់ស្អាត និងទេសភាពបៃតងតាមដងផ្លូវ សំខាន់ៗក្នុងក្រុងសៀមរាបទៅកាន់រមណីយដ្ឋានអង្គរ អាជ្ញាធរជាតិអប្សរា គ្រោងនឹងដាំកូនឈើលម្អផ្លូវចាប់ពីអាកាសយានដ្ឋានអន្ដរជាតិខេត្ត សៀមរាបរហូតដល់មុខប្រាសាទអង្គរវត្ត ។ គម្រោងនេះមិនត្រឹមតែបង្កើនភាពទាក់ទាញបែបលក្ខណៈធម្មជាតិដល់រមណីយដ្ឋានអង្គរប៉ុណ្ណោះទេ តែក៏បានចូលរួមយ៉ាងសំខាន់ក្នុងការលើកតម្លៃលេចធ្លោជាសាកលនៃរមណីយដ្ឋានអង្គរតាមរយៈការរក្សាបាននូវភាពឆ្លុះបញ្ចាំងគ្នាទៅវិញទៅមករវាងប្រាសាទ ធម្មជាតិ និងសហគមន៍មនុស្ស ។
យោងតាមផេកអាជ្ញាធរជាតិអប្សរា កាលពីថ្ងៃទី២៨ សីហា ២០១៩ ផ្សាយថា កូនឈើដែលនឹងត្រូវដាំលម្អតាមដងផ្លូវនេះមានចំនួនជាង១០០០ដើម ជាកូនឈើធ្នង់ដែលជាប្រភេទឈើប្រណីតដែលមហាជនខ្មែរទូទៅនិយមចូលចិត្ត ។ ការដាំកូនឈើឡើងវិញតាមដងផ្លូវនាពេលនេះក៏ស្របគ្នានឹងអាជ្ញាធរជាតិអប្សរាទើបតែជួសជុល និងកែលម្អផ្លូវនេះជាថ្មីដើម្បីបង្កភាពងាយស្រួលដល់ការធ្វើចរាចររបស់មហាជនទូទៅ ក៏ដូចជាភ្ញៀវទេសចរដែលទៅកម្សាន្តនៅខេត្តសៀមរាប ។
ជាមួយគ្នានេះដើម្បីរៀបចំសណ្តាប់ធ្នាប់សាធារណៈ និងរបៀបរៀបរយក្នុងទីធ្លាមុខប្រាសាទអង្គរវត្ត អាជ្ញាធរជាតិអប្សរាក៏នឹងដាំដើមក្រវាន់ និងដើមឈើប្រភេទផ្សេងមួយចំនួនទៀតនៅតាមដងផ្លូវមុខប្រាសាទអង្គរវត្តដែលជាច្រកចូលចម្បងសម្រាប់ទៅទស្សនាប្រាសាទអង្គរវត្ត ។
គម្រោងដាំដើមឈើទាំងនោះ គឺជាការបន្ថែមទៅលើឈើព្រៃដែលមានស្រាប់អាយុរាប់រយពាន់ឆ្នាំមកហើយនៅតំបន់អង្គរ ៕ (កែសម្រួលដោយ ៖ បុប្ផា)
ចែករំលែកព័តមាននេះ