ខេត្តស្ទឹងត្រែង ៖ សពបុរសម្នាក់ត្រូវគេប្រទះឃើញអណ្តែតទឹកកាលពីរសៀលថ្ងៃទី២៨ សីហា បន្ទាប់ពីជួបឧប្បត្តិហេតុលិចទូកក្នុងទន្លេ គ្រាទៅនេសាទជាមួយនឹងប្រពន្ធស្ថិតនៅ ទំបន់វ៉ារីអគ្គីសនីសេសានក្រោម២ ស្រុកសេសាន ។
តាមប្រភពព័ត៌មានពីសមត្ថកិច្ចអោយដឹងថា កាលពីថ្ងៃទី២៧ ខែសីហា ឆ្នាំ២០១៩ នៅវេលាម៉ោង១១និង៣០នាទី ប្តី និងប្រពន្ធបានជិះទូកទៅនេសាទត្រីនៅចំណុចភ្នំរឹង តំបន់វ៉ារីអគ្គីសនីសេសានក្រោម២ ស្ថិតក្នុងភូមិក្បាលរមាស ឃុំ ក្បាលរមាស ស្រុកសេសាន ដោយ សារស្ថានភាពទឹករលកខ្លាំងវាយទូកបណ្តាលអោយលិចក្នុងទន្លេ ។
ប្រភពដដែលបន្តថា គ្រាលិចទូកស្ត្រីជាប្រពន្ធបានស្រវេស្រវ៉ាចាប់បានធុងស្នោតោងហែលទឹកមកដល់ត្រើយ ចំណែកប្តីត្រូវទឹកគួចលិចបាត់ស្រមោល។ ជនរងគ្រោះឈ្មោះ សុខ ភី ភេទប្រុស អាយុ៤០ឆ្នាំ រីឯប្រពន្ធឈ្មោះ ឡាំង ផន អាយុ៤៧ឆ្នាំ មានទីលំនៅភូមិកោះស្នែង ឃុំកោះស្នែង ស្រុកបូរីអូរស្វាយសែនជ័យ ខេត្តស្ទឹងត្រែង បានទៅរកនេសាទត្រីហើយជួបឧប្បត្តិហេតុលិចទូកក្នុងទន្លេដោយស្ត្រីជាប្រពន្ធរស់រានមានជីវិតចំណែកប្តីស្លាប់ ។
ក្រោយបាត់មួយថ្ងៃ នៅរសៀលថ្ងៃទី២៨ ខែសីហា ឆ្នាំ២០១៩ ប្រជាពលរដ្ឋបានប្រទះឃើញសពផុសឡើង និងរាយការណ៍ជូនដល់សមត្ថកិច្ច និងផ្តល់ព័ត៌មានដល់គ្រួសារមកទទួលសពទៅធ្វើបុណ្យតាមប្រពៃណីទំនៀមទំលាប់ ។
តាមការវាយតំលៃ និងសន្និដ្ឋានឆ្លងតាមការត្រួតពិនិត្យសព និងស្ដាប់តាមការបំភ្លឺរបស់សាក្សីរបស់នគរបាលព្រហ្មទណ្ឌកម្រិតធ្ងន់លោកគ្រូពេទ្យ ឈឿន មារ៉ាឌី ថាសពជនរងគ្រោះស្លាប់ដោយសារលង់ទឹកប្រាកដមែន និងបានការអនុញ្ញាតពីលោកព្រះ រាជអាជ្ញារង វង្ស សាវ៉ាត បានប្រគល់សពអោយប្រគល់សពជូនក្រុមគ្រួសារធ្វើបុណ្យតាមប្រពៃណី ៕
កែសម្រួលដោយ ៖ សំណាង
ចែករំលែកព័តមាននេះ