មិនថា អ្នកទើបតែចាប់ផ្តើមមើលចិត្តគ្នាជាមួយនរណាម្នាក់ ឬអ្នកកំពុងតែមានដៃគូស្នេហ៍ជាច្រើនឆ្នាំមកក៏ដោយវាជាពេលដែលអ្នកគួរនិយាយពីលុយហើយ ។
លោក Kevin O’Leary ជាមហាសេដ្ឋីដែលទទួលបានការគាំទ្រពីមនុស្សជាច្រើនបាននិយាយថា វាជារឿងរីករាយមួយពេលដែលអ្នកចាប់ផ្តើមស្រលាញ់មនុស្សម្នាក់ ប៉ុន្តែប្រសិនបើអ្នកសម្រេចចិត្តថា អ្នកចង់ចំណាយពេលមួយជីវិតជាមួយគ្នានោះបញ្ហាលុយ និងការគ្រប់គ្រងលុយនឹងជះឥទ្ធិពលដល់អ្នកទាំងពីរ ។ មិនថា អ្នកស្ថិតក្នុងដំណាក់កាលណានៃសេ្នហាអ្នកទេ លោកបានផ្តល់យោបល់ឲ្យអ្នកចាប់ផ្តើមសួរពីទម្លាប់ចាយវាយ និងសន្សំលុយឲ្យបានកាន់តែឆាប់កាន់តែល្អ ។
លោកទូន្មានថា «ធ្វើឲ្យលុយក្លាយជាប្រធានបទដែលអ្នកទាំងពីរត្រូវគិតគូរជាមួយគ្នា ។ វានឹងក្លាយជាផ្នែកមួយនៃជីវិតរបស់អ្នករហូត ដូច្នេះអ្នកគួរតែនិយាយពីវាឲ្យបានលឿន ។ វាពិតជា សំខាន់ណាស់ ព្រោះអ្នកមិនចង់ឲ្យវាក្លាយទៅជាអ្វីដែលធ្វើឲ្យអ្នកទាំងពីរបែកបាក់ទេ» ។ ការស្រាវជ្រាវបានបង្ហាញមកថា ការឈ្លោះគ្នារឿងលុយ គឺស្ថិតក្នុងចំណោមមូលហេតុដែលបង្កភាពតានតឹងក្នុងទំនាក់ទំនងស្នេហា ។
ដូច្នេះលោក O’Leary ប្រាប់ថា «មុនពេលអ្នកច្បាស់លាស់ជាមួយនរណាម្នាក់ អ្នកគួរតែសួរពួកគេថា តើអ្នកមានគោលដៅអ្វីខ្លះ ? តើក្នុងពេល២០ឆ្នាំទៀត អ្នកនឹងមានស្ថានការយ៉ាងដូចម្តេច? តើអ្នកចង់ក្លាយជានរណា ? តើអ្នកចង់ប្រើលុយយ៉ាងដូចម្តេច ? តើអ្នកចង់សន្សំវា ចាយវាយ ឬខ្ជះខ្ជាយវា ? តើគោលដៅរបស់អ្នកក្នុងផ្នែកហិរញ្ញវត្ថុមានរូបរាងយ៉ាងដូចម្តេច0?» ។ អ្នកគួរតែសួរត្រង់ៗទាក់ទិននឹងបំណុល ឬប្រវត្តិលេងល្បែងជាដើម ។ អ្នកត្រូវចងចាំថា ទម្លាប់ចាយវាយរបស់ដៃគូរបស់អ្នកអាចប៉ះពាល់ដល់អ្នកដោយផ្ទាល់ ។
ជាពិសេសសម្រាប់អ្នកដែលមានគម្រោងរៀបអាពាហ៍ពិពាហ៍ ។ លោក O’Leary បាននិយាយថា ការរៀបអាពាហ៍ពិពាហ៍មិនគ្រាន់តែជារឿងស្នេហាទេ ។ វាប្រៀបបានជាការចាប់ដៃគូសហការបើកអាជីវកម្មជាមួយមនុស្សម្នាក់ទៀតជាដើម វាជាការរៀបចំហិរញ្ញវត្ថុមួយ ហើយអ្នកដែលមិនខ្វល់ខ្វាយពីវាភាគច្រើនជួបនឹងការលែងលះគ្នា ៕ កែសម្រួលដោយ ៖ សុឃាក់
ចែករំលែកព័តមាននេះ