រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ស្ត្រីជាជនសង្ស័យម្នាក់ត្រូវនគរបាលប្រាប់ថា គឺជាមុខសញ្ញាចាស់ដែលមានជំនាញខ្លាំងណាស់ខាងចូលបន្លំលួចនៅកន្លែងលក់ដូរ និងលូកហោប៉ាវយកលុយនៅតាមទីផ្សារ និងទីប្រជុំជននានា ពេលនេះបានចូលទៅលួចយកកាបូបលុយនៅក្នុងផ្ទះមួយកន្លែងបានសម្រេច រួចក៏គេចខ្លួនបាត់ស្រមោល ខណៈម្ចាស់ជាប់រវល់ចូលបន្ទប់ទឹក លុះពេលចេញមកវិញបន្ទាប់ពីបាត់កាបូបលុយបុរសជាម្ចាស់ផ្ទះបានឆែកមើលកាមេរ៉ាសុវត្ថិភាព ទើបស្គាល់មុខចោរស្រីខាងលើយ៉ាងច្បាស់ និងបានតាមរកដែរ ប៉ុន្តែរកមិនឃើញសោះ។
សេចក្តីរាយការណ៍បន្តថា លុះដល់ម៉ោង៩និង១៥នាទីព្រឹក ថ្ងៃទី២៩ ខែសីហា ឆ្នាំ២០១៩ ក៏ប្រទះឃើញស្ត្រីរូបនោះបម្រុងចូលលួចទ្រព្យសម្បត្តផ្ទះអ្នកភូមិព្រៃទា១ សង្កាត់ចោមចៅ៣ ខណ្ឌពោធិ៍សែនជ័យ ក៏ចាប់ខ្លួនប្រគល់ជូននគេបាលតែម្ដង។
នគរបាលបាលបានឲ្យថា ស្ត្រីខាងលើនេះមានឈ្មោះ កង សុវ៉ារី អាយុ៣៥ឆ្នាំ ជាមុខសញ្ញាចាស់ ស្នាក់នៅផ្ទះជួលក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ និងមានស្រុកកំណើតនៅក្នុងភូមិចំការអង្គ ឃុំគុស ស្រុកត្រាំកក់ ខេត្តតាកែវ ។ ចំណែកបុរសម្ចាស់កាបូបឈ្មោះ ឌុយ រតនា អាយុ៣២ឆ្នាំ មុខរបរលក់ដូរ មានទីលំនៅភូមិ-ឃុំកើតហេតុខាងលើ និងមានស្រុកកំណើត នៅស្រុកអង្គរជ័យ ខេត្តកំពត ហើយនៅក្នុងកាបូបមានលុយទាំងប្រាក់រៀល និងដុល្លារសរុបជាង៣០០ដុល្លារ រួមជាមួយនឹងឯកសារផ្សេងៗមួយចំនួនទៀត។
ប្រភពដដែលបន្តថា មុនកើតហេតុ ស្ត្រីជាសង្ស័យបានធ្វើសកម្មភាពចូលទៅលួចកាបូបជនរងគ្រោះខាងលើកាលពីព្រឹកថ្ងៃទី២៨ ខែសីហាខណៈដែលជនរងគ្រោះកំពុងចូលបន្ទប់ទឹក ជនសង្ស័យក៏ចូលទៅលួចយកកាបូបលុយទៅបាត់។ លុះជនរងគ្រោះចេញមកវិញ ស្រាប់តែបាត់កាបូបតែម្តង បុរសរងគ្រោះក៏បានឆែកមើលកាមេរ៉ាសុវត្ថិភាព ទើបស្គាល់មុខជនសង្ស័យ ហើយបានតាមរកភ្លាមៗដែរ ប៉ុន្តែរកមិនឃើញនោះទេ។
ប្រភពដដែលបន្តទៀតថា លុះដល់ព្រឹកថ្ងៃទី២៩ ខែសីហានេះ ស្រាប់តែប្រទះឃើញជនសង្ស័យដើរចូលផ្ទះលក់ដូរមួយកន្លែងទៀតនៅជាប់ផ្ទះគាត់នោះផងដែរ ទើបចាប់ឃាត់ខ្លួនប្រគល់ឲ្យនគរបាលសាកសួរ និងចាត់ការតាមច្បាប់តែម្ដង។
ក្រោយពេលសួរនាំស្ត្រីសង្ស័យរូបនោះបានសារភាពថា ខ្លួនពិតជាបានលួចយកកាបូបលុយនោះមែន ហើយបានយកលុយទៅសងគេអស់ហើយ៕ (កែសម្រួលដោយ ៖ បុប្ផា)
ចែករំលែកព័តមាននេះ