រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានទទួលយកសំណើរដោះស្រាយបញ្ហាជំនាស់ដីធ្លី បញ្ហាព្រៃឈើ បញ្ហាបទល្មើជលផល និងបញ្ហាផ្សេងៗទៀតពីសមាជិកឧត្តមក្រុមប្រឹក្សាពិគ្រោះ និងផ្តល់យោបល់ ហើយនឹងចេញស.ជ.ណ ។ យោងតាមបណ្តាញសង្គមរបស់សម្តេចតេជោបានចេញផ្សាយ កាលពីថ្ងៃទី២៨ សីហា នៅកិច្ចប្រជុំជាមួយសមាជិកឧត្តមក្រុមប្រឹក្សាពិគ្រោះ និងផ្តល់យោបល់ ។
សម្តេចបានលើកឡើងថា ក្នុងរយៈពេល១២ខែកន្លងទៅនេះសមាជិកឧត្តមក្រុមប្រឹក្សាពិគ្រោះ និងផ្តល់យោបល់បានបំពេញការងាររបស់ខ្លួន និងបានធ្វើរបាយការណ៍ជូនសម្ដេចតេជោផងដែរ ហើយរយៈពេលកន្លងមកនេះ គឺសមាជិកបានបំពេញបេសកកម្មប្រមូលទិន្នន័យដល់មូល ដ្ឋានផ្ទាល់ គឺមានចំនួន២៩៥លើក ហើយបានដាក់ជូនសម្តេចតេជោចំនួន២៥១លើក ហើយការចុះទៅនោះ គឺដោយខ្លួនឯងគ្មាននរណាបង្គាប់បញ្ជាបានទេ ហើយរបាយការណ៍នោះក៏អត់យកទៅដាក់ទៅស្ថាប័នណាដែរ គឺជារបាយការណ៍ដែលត្រូវដាក់ជូនតែសម្ដេចតេជោនាយករ ដ្ឋមន្ត្រីតែប៉ុណ្ណោះ ។
សម្តេចតេជោលើកឡើងថា មកដល់ពេលនេះសំណុំរឿងភាគច្រើនដែលសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ទទួលបាន គឺទាក់ទងទៅនឹងបញ្ហាទំនាស់ដីធ្លី បញ្ហារំលោភយកដីរដ្ឋ ជាពិសេសរំលោភយកដីគម្របព្រៃឈើ បញ្ហាបទល្មើសព្រៃឈើ បញ្ហាបទល្មើសជលផល បញ្ហាបរិស្ថានផ្សេងទៀត ដូចជា ការរំលោភការចាក់លុបឆ្នេរ បឹង ព្រែក បញ្ហាគ្រឿងញៀន អំពើពុករលួយ រួមទាំងបញ្ហាផ្សេងៗទៀត ។ ហើយបញ្ហាទាំងអស់នេះត្រូវបានសម្ដេចតេជោទទួលយក ហើយនឹងចេញសេចក្តីជូនដំណឹង ( ស.ជ.ណ) ដើម្បីដោះស្រាយតាមរយៈប្រជុំជាមួយក្រសួងដែលពាក់ព័ន្ធក្នុងការចាត់វិធានការ និងរកដំណោះស្រាយ។
សម្ដេចតេជោនាយករដ្ឋមន្ត្រីបានឆ្លើយតបទៅតាមសំណើរ និងសំណូមពរនូវអ្វីដែលជាផលប្រយោជន៍របស់ជាតិ និងប្រជាជនដែលសម្តេចគិតថា ជាធាតុចូលមួយក្នុងការរួមចំណែក និងជាពហុគំនិតដល់ការកំណែទម្រង់របស់រាជរដ្ឋាភិបាល ។ សម្តេចតេជោនាយករដ្ឋមន្ត្រីក៏បានមានប្រសាសន៍ក្នុងកិច្ចប្រជុំនេះផងដែរថា ចាប់ពីពេលនេះតទៅ គឺត្រូវអនុវត្តនូវអភិក្រមទី៥ គឺវះកាត់ ដូច្នេះមន្ត្រីណាដែលប្រព្រឹត្តនូវទង្វើទាក់ទងទៅនឹងបញ្ហាដែលបានលើកឡើងខាងលើនេះ គឺមិនត្រឹមតែដាក់ទោសប៉ុណ្ណោះនោះទេ ថែមទាំងដកតំណែង និងការរឹបអូស ឬបង្កកទ្រព្យសម្បត្តិផងដែរដូចជា ករណីការរំលោភដីធ្លី និងបញ្ហាបទល្មើសព្រៃឈើជាដើម ។
នៅក្នុងកិច្ចប្រជុំនេះផងដែរ សម្ដេចតេជោនាយករដ្ឋមន្ត្រីក៏បានវាយតម្លៃខ្ពស់ចំពោះការខិតខំប្រឹងប្រែងរបស់សមាជិកឧត្តមក្រុមប្រឹក្សាពិគ្រោះ និងយោបល់ដែលបានចូលរួមចំណែកក្នុងការប្រមូលធាតុចូលក៏ដូចជា ការស្រាវជ្រាវរកបញ្ហាដែលបានកើតឡើងនៅតាមមូលដ្ឋាននានា ក្នុងការដាក់ជូនដល់រដ្ឋាភិបាល ដើម្បីធ្វើសេចក្តីសម្រេចចិត្ត និងរកវិធីដោះស្រាយដែលសម្តេចគិតថា យន្តនេះ គឺជាការជួយរាជរដ្ឋាភិបាល និងជាការជួយឲ្យទំនាក់ទំនងរវាងប្រជាពលរដ្ឋនិងរាជរដ្ឋាភិបាលរំកិលទៅកៀកគ្នា ដើម្បីធានាបាននូវប្រព័ន្ធរដ្ឋបាលសាធារណៈអោយមានភាពល្អប្រសើរ ៕ កែសម្រួលដោយ ៖ សុឃាក់
ចែករំលែកព័តមាននេះ