ប្រទេសជប៉ុន ៖ ប្រមុខរដ្ឋនិងប្រមុខរដ្ឋាភិបាលនៃបណ្ដាប្រទេសអាហ្វ្រិក បានមកចូលរួមក្នុងសន្និសីទអន្តរជាតិក្រុងតូក្យូស្ដីពីការអភិវឌ្ឍន៍អាហ្វ្រិក ហៅកាត់ថាTICADលើកទី៧ដែលប្រព្រឹត្តទៅពីថ្ងៃទី២៨ដល់៣០សីហា។
សន្និសីទនោះរៀបចំធ្វើក្រោមការឧបត្ថម្ភរបស់ជប៉ុន អ.ស.ប UNDP ធនាគារពិភពលោកនិងសហភាពអាហ្វ្រិក ដោយសន្និសីទលើកនេះស្ថិតក្រោមប្រធានបទ ធនធានមនុស្ស បច្ចេកវិទ្យានិងការកែប្រែថ្មី។
ជប៉ុនចាប់បើកឲ្យមានការជួបគ្នាកំពូល ជាមួយអាហ្វ្រិកចាប់ពីឆ្នាំ១៩៩៣មក ខណៈអាហ្វ្រិកទាក់ទាញពួកអ្នកវិនិយោគតិចតួចបំផុត។ ប៉ុន្តែចាប់តាំងពីចិន អាមេរិក អឺរ៉ុបនិងតួកគីសម្រុកលើកគ្នាទៅបោះទុនវិនិយោគនៅទីនោះមក ជប៉ុនក៏ទៅកាន់ទីនោះដណ្ដើមចំណែករបស់ខ្លួនដែរ។
ពេលនេះអាជ្ញាធរជប៉ុន បានលើកទឹកចិត្តដល់សហគ្រាសធំៗរបស់ខ្លួន ឲ្យទៅបោះទុនវិនិយោគនៅទីនោះក្នុងទំហំធំ។ អង្គការពាណិជ្ជកម្មក្រៅប្រទេសជប៉ុនJETRO ពេលនេះមានវត្តមានក្នុងប្រទេសអាហ្វ្រិក១៨៕ (កែសម្រួលដោយ ៖ បុប្ផា)
ចែករំលែកព័តមាននេះ