ខេត្តស្ទឹងត្រែង ៖ ជារឿងអកុសល់ដែលមិនធ្លាប់កើតមានឡើយ ខណៈឃើញមន្ត្រីនគរបាលស្រុកបានចាប់កូនក្របីមួយក្បាល ដឹកតាមម៉ូតូមករក្សាទុក ក្រោយពីមេវាបានវ័ធបុរសចំណាស់ម្នាក់ស្លាប់នៅនឹងកន្លែង ឯម្នាក់ទៀតរងរបួស ធ្ងន់ ស្ថិតក្នុងស្រុកថាឡាបរិវ៉ាត់ ។…
ខេត្តស្ទឹងត្រែង ៖ ជារឿងអកុសល់ដែលមិនធ្លាប់កើតមានឡើយ ខណៈឃើញមន្ត្រីនគរបាលស្រុកបានចាប់កូនក្របីមួយក្បាល ដឹកតាមម៉ូតូមករក្សាទុក ក្រោយពីមេវាបានវ័ធបុរសចំណាស់ម្នាក់ស្លាប់នៅនឹងកន្លែង ឯម្នាក់ទៀតរងរបួស ធ្ងន់ ស្ថិតក្នុងស្រុកថាឡាបរិវ៉ាត់ ។ ទាក់ទិនហេតុការណ៍នេះ នគរបាលអធិការដ្ឋានស្រុកថាឡាបរិវ៉ាត់ខេត្ត ឱ្យដឹង កាលពីព្រឹកថ្ងៃទី២៨ សីហា ថា ពិតជាបានចាប់កូនក្របីមួយក្បាល ដែលទើបនិងកើតរយៈពេល២ថ្ងៃមិនទាន់ជ្រុះទងផ្ចិតផង ហើយបច្ចុប្បន្នកូនក្របីនោះ សមត្ថកិច្ចបានប្រគល់ទៅឱ្យក្រុមគ្រួសារអ្នកស្លាប់រក្សាទុក តែមិនដឹងថា កូនក្របីនោះអាចរស់ឬងាប់ទេ ព្រោះវាទើបនឹងកើត ។
មន្ត្រីដដែលបន្តថា រហូតមកទល់ថ្ងៃទី២៨ សីហា នេះ នៅមិនទាន់រកឃើញមេក្របី ដែលបានវ័ធមនុស្សស្លាប់នៅឡើយដែរ។ ហើយសមត្ថកិច្ច ក៏កំពុងបន្តស្វែង រកនិងស្រាវជ្រាវរកម្ចាស់ក្របីមកទទួលខុសត្រូវ សម្រាប់គ្រួសារជនរងគ្រោះ ព្រោះការចិញ្ចឹមសត្វមិនមានការគ្រប់គ្រងល្អ ។
បើតាមអ្នកភូមិឱ្យដឹងដែរថា មេក្របីខាងលើមិនដឹងជារបស់អ្នកប្រាកដទេ ដោយធ្លាប់មានមនុស្សផ្សេងទៀត ក៏ត្រូវក្របីនោះដេញវ័ធដែរ តែគេចផុតដោយសាររត់ឡើងលើដើមឈើទាន់ ។ អ្នកភូមិបន្តថា ក្របីមេនោះ គ្មានខ្សែជាប់ច្រមុះឡើយ ហើយវាស្ទើរក្លាយជាក្របីព្រៃទៀត ។
សូមរំលឹកថា កាលពីថ្ងៃទី២៥ សីហា កន្លងមក មេក្របីខាងលើ បានវ័ធបុរសឈ្មោះជួន សី អាយុ៥៨ឆ្នាំ
រស់នៅភូមិអូរត្រែល ឃុំថាឡាបរិវ៉ាត់ រួមនិងកូនប្រុសរបួសធ្ងន់ ខណៈពួកគាត់នាំគ្នាទៅបេះត្រួយបន្លែផ្សែផ្សំអោយកូនស្រីយកទៅលក់នៅផ្សារទីរួមខេត្តដូចសព្វដង ។
តែជាអកុសល ខណៈកំពុងបេះត្រួយបន្លែ ស្រាប់តែត្រូវមេក្របីបោលចេញពីក្នុងព្រៃ សំដៅបុកកូនប្រុសរបស់ខ្លួន បណ្តាលអោយរបួស រួចបន្តរត់ទៅវ័ធបុរសចំណាស់នោះដោយប្រើស្នែងគាស់ជនរងគ្រោះហើបពីដីរួចទម្លាក់មកវិញត្រូវឆ្អឹងជំនីរផ្នែកខាងស្តាំ និងត្រគៀកខាងស្តាំស្លាប់មួយរំពេចតែម្តង ។ (សម្រួលដោយ៖ ស្រីណា)
ចែករំលែកព័តមាននេះ