រាជធានីភ្នំពេញ ៖ បន្ទាប់ពីធ្វើការសង្គ្រោះជាតិអគ្គិភ័យរួចមក អ្នកនាំពាក្យអគ្គស្នងការដ្ឋាននគរបាលជាតិបានធ្វើការបំភ្លឺអំពីប្រតិបត្តិការពន្លត់ និងសង្គ្រោះជាតិអគ្គិភ័យនៅអគារសិប្បកម្មផលិតពូកដែលឆេះកាលពេលកន្លងមកនេះ ។ យោងតាមសេចក្តីបំភ្លឺរបស់អ្នកនាំពាក្យអគ្គស្នងការដ្ឋាននគបាលជាតិចេញផ្សាយ នៅថ្ងៃទី២៨ សីហា បានឲ្យដឹងថា អ្នកនាំពាក្យនៃអគ្គស្នងការដ្ឋាននគរបាលជាតិ មានកិត្តិយស សូមជម្រាបជូនសាធារណៈជន មេត្តាជ្រាបអំពីប្រតិបត្តិការក្នុងការពន្លត់ និងសង្គ្រោះអគ្គិភ័យ កាលពីថ្ងៃទី២៣ ខែសីហានេះនៅ វេលាម៉ោង១៣និង២០នាទីរសៀល នៅអគារសិប្បកម្មផលិតពូក ស្ថិតនៅក្រុមទី៤ ភូមិចម្រើនផល១ សង្កាត់បឹងទំពុន រាជធានី ភ្នំពេញ ។
មានដូចខាងក្រោម ៖ ហេតុការណ៍អគ្គិភ័យឆេះអគារសិប្បកម្ម៤ផលិតពូកដែលមានទីតាំងដូចបានបញ្ជាក់ជូនខាងលើត្រូវបានអន្តរាគមន៍សង្គ្រោះយ៉ាងសកម្មពីសំណាក់នគរបាលពន្លត់អគ្គិភ័យ ដោយមានកិច្ចសហការគាំទ្រយ៉ាងសស្រាក់សស្រាំពីកងពលតូចលេខ៧០ កងរាជអាវុធហត្ថរាជធានីភ្នំពេញ ដោយប្រើប្រាស់ រថយន្តពន្លត់អគ្គិភ័យចំនួន៥០គ្រឿង ។
សេចក្តីបំភ្លឺបានបន្តថា ជាមួយគ្នានោះដែរ ថ្នាក់ដឹកនាំនៃអាជ្ញាធរដែនដី និងអង្គភាពជំនាញពា ក់ព័ន្ធគ្រប់លំដាប់ថ្នាក់បានយកចិត្តទុកដាក់ដោយបានចុះផ្ទាល់ ដើម្បីពិនិត្យ និងបញ្ជាដឹកនាំការសង្គ្រោះប្រកបដោយស្មារតីទទួលខុសត្រូវខ្ពស់ ។ ក្នុងកិច្ចប្រតិបត្តិការសង្គ្រោះអគារសិប្បកម្មខាងលើ អង្គភាពពន្លត់អគ្គិភ័យប្រឈមទៅនឹងកត្តាអវិជ្ជមានជា សត្យានុម័តចំនួន០៣គឺ ៖ ទី១- ភូមិសាស្ត្រស្មុគស្មាញ ច្រកចូលសង្គ្រោះតូចចង្អៀត មិនអាចចល័តរថយន្តពន្លត់អគ្គិ ភ័យបានទាន់ពេល ទី២- ចំណុចចាប់ផ្តើមនៃអគ្គិភ័យ គឺស្ថិតនៅចំណុចកណ្តាលនៃអត្រារសិប្បកម្មដែលធ្វើឲ្យភ្នាក់ងារពន្លត់អគ្គិភ័យពិបាកនឹងចូលទៅពន្លត់ដល់គោលដៅ និងទី៣- សម្ភារៈដែលឆេះសុទ្ធសឹងតែជាសារធាតុងាយឆេះ មានល្បឿនលឿនខ្លាំង ពិបាកពន្លត់ និងបង្កឲ្យមានផ្សែងដែលជាសារធាតុពុល និងខ្វះអុកស៊ីហ្សែន ដូចជា ផ្លាស្លឹកកាវ សាំងក្រអូប ក្រណាត់ សំឡី គរ..។ល។ តែទោះជាយ៉ាងនេះក្តី ក៏កងកម្លាំងមានសមត្ថកិច្ចពាក់ព័ន្ធទាំងអស់បានទប់ស្កាត់មិនឲ្យឆេះរាលដាល ដល់ផ្ទះប្រជាពលរដ្ឋនៅជុំវិញកន្លែងកើតហេតុបានឡើយ ។
ប្រភពបានបន្ថែមថា ហេតុផលខាងលើបានបញ្ជាក់អំពីវិសាលភាពនៃអគ្គិភ័យនេះដែលមានឥទ្ធិពលពុំអាចគ្រប់គ្រងបាន បើទោះបីជាអង្គភាពពន្លត់អគ្គិភ័យប្រើប្រាស់មធ្យោបាយយ៉ាងច្រើន និងខិតខំប្រឹងប្រែងអស់ពីសមត្ថភាពយ៉ាងណាក្តី ។ សេចក្តីបំភ្លឺបានបញ្ជាក់ថា៖« ក្នុងនាមកងកម្លាំងបង្ការ ពន្លត់អគ្គិភ័យ និងសង្គ្រោះ សូមគោរពថ្លែងអំណរគុណយ៉ាងជ្រាលជ្រៅចំពោះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលមានសុភវិនិច្ឆ័យ ផ្តល់យុត្តិធម៌ និងគាំទ្រលើកទឹកចិត្តដល់កងកម្លាំងពន្លត់អគ្គិភ័យ និងប្តេជ្ញាប្រែក្លាយការគាំទ្រលើកទឹកចិត្តរបស់សម្តេចតេជោឲ្យទៅជាកម្លាំងមុតស្រួចក្នុងការបន្តជួយសង្គ្រោះប្រជាពលរដ្ឋដែលរងគ្រោះដោយអគ្គិភ័យប្រកបដោយភក្តីភាព» ៕ កែសម្រួលដោយ ៖ សុឃាក់
ចែករំលែកព័តមាននេះ