រាជធានីភ្នំពេញ៖ បញ្ហានៃការយកសេវាក្រៅផ្លូវការបានក្លាយជាជំងឺមួយទាមទារឲ្យមានគ្រប់ស្ថាប័នពាក់ព័ន្ធត្រូវចូលរួមសហការលុបបំបាត់ចោល ដើម្បីកុំឲ្យប៉ះពាល់ដល់វិស័យឯកជនដែលបានចូលរួមចំណែកក្នុងការអភិវឌ្ឍន៍សេដ្ឋកិច្ចជាតិនោះ ។ ជាក់ស្តែង លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម…
រាជធានីភ្នំពេញ៖ បញ្ហានៃការយកសេវាក្រៅផ្លូវការបានក្លាយជាជំងឺមួយទាមទារឲ្យមានគ្រប់ស្ថាប័នពាក់ព័ន្ធត្រូវចូលរួមសហការលុបបំបាត់ចោល ដើម្បីកុំឲ្យប៉ះពាល់ដល់វិស័យឯកជនដែលបានចូលរួមចំណែកក្នុងការអភិវឌ្ឍន៍សេដ្ឋកិច្ចជាតិនោះ ។
ជាក់ស្តែង លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម កាលពីពេលថ្មីនេះបានស្នើដល់មន្ត្រីមន្ទីរពាណិជ្ជកម្ម ធ្វើកិច្ចការបួនយ៉ាង ដើម្បីពង្រឹងប្រសិទ្ធភាពការអនុវត្តអភិបាលកិច្ចល្អ ដែលកិច្ចការមួយក្នុងចំណោមកិច្ចការទាំង៤នោះ គឺត្រូវ «បញ្ចៀសដាច់ខាតការយកកម្រៃសេវាក្រៅផ្លូវការពីវិស័យឯកជន» ។
ថ្លែងនៅចំពោះមុខមន្ត្រីក្រសួងពាណិជ្ជកម្មនាឱកាសចុះសំណេះសំណាលជាមួយថ្នាក់ដឹកនាំ និងមន្ត្រីនៃមន្ទីរពាណិជ្ជកម្មរាជធានីភ្នំពេញ កាលពីព្រឹកថ្ងៃសុក្រ ទី២៣ ខែសីហា ឆ្នាំ២០១៩ កន្លងទៅ ដើម្បីតាមដានវឌ្ឍនភាពការងាររបស់មន្ទីរ និងផ្សព្វផ្សាយអំពីសមិទ្ធផលការងារសំខាន់ៗរបស់ក្រសួងពាណិជ្ជកម្ម ក៏ដូចជាកិច្ចការដែលរាជរដ្ឋាភិបាល និងក្រសួងកំពុងបន្តអនុវត្ត សំដៅជំរុញការអភិវឌ្ឍវិស័យពាណិជ្ជកម្មជាតិ លោក ប៉ាន សូរស័ក្តិ ក៏បានស្នើមន្ត្រីធ្វើកិច្ចការសំខាន់ៗមួយចំនួនដើម្បីពង្រឹងប្រសិទ្ធភាពការអនុវត្តអភិបាលកិច្ចល្អ ដែលជាស្នូលនៃយុទ្ធសាស្ត្រចតុកោណដំណាក់កាលទី៤ ដូចជា ៖ (១)ខិតខំពង្រីកចំណេះដឹងទាំងកម្រិតជំនាញ និងភាសាបរទេស (២)សហការជិតស្និទ្ធជាមួយអាជ្ញាធរមូលដ្ឋាន ដើម្បីផ្សព្វផ្សាយកម្មវិធីកែទម្រង់ស៊ីជម្រៅរបស់រាជរដ្ឋាភិបាល និងក្រសួងពាណិជ្ជកម្ម (៣) បញ្ចៀសដាច់ខាតការយកកម្រៃសេវាក្រៅផ្លូវការពីវិស័យឯកជន និង(៤)សហការជាមួយក្រុមការងារចុះពង្រឹងមន្ទីរពាណិជ្ជកម្មរាជធានី-ខេត្ត ដើម្បីដោះស្រាយបញ្ហាប្រឈមនៅក្នុងអង្គភាពរបស់ខ្លួន។
ក្រៅពីសំណើខាងលើ លោករដ្ឋមន្ត្រីក្រសួងពាណិជ្ជកម្ម បានលើកឡើងពីកិច្ចប្រឹងប្រែងរបស់រាជរដ្ឋាភិបាល និងក្រសួងពាណិជ្ជកម្ម ក្នុងការចូលរួមអនុវត្តយុទ្ធសាស្ដ្រកំណែទម្រង់វិមជ្ឈការ និងវិសហមជ្ឈការ ដែលបានអនុម័តកាលពីខែមិថុនា ឆ្នាំ២០០៥ ក្នុងគោលបំណងពង្រឹងកិច្ចសហប្រតិបត្តិការប្រកបដោយបរិយាប័ន (ការចូលរួមពីគ្រប់ភាគី) រវាងស្ថាប័នថ្នាក់ជាតិ និងថ្នាក់ក្រោមជាតិ ដែលជាមូលដ្ឋានគ្រឹះដ៏សំខាន់សម្រាប់ធានាការអភិវឌ្ឍសង្គម និងការធ្វើពិពិធកម្មកំណើនសេដ្ឋកិច្ចប្រកបដោយចីរភាព។
លោករដ្ឋមន្ត្រីក្រសួងពាណិជ្ជកម្ម បានគូសបញ្ជាក់ថា «ក្រសួងបានពង្រឹងការការពារកម្មសិទ្ធិបញ្ញា និងយន្តការត្រួតពិនិត្យ ដើម្បីទប់ស្កាត់ការក្លែងបន្លំ សំដៅការពារសុខមាលភាពប្រជាជនទាំងមូល តាមរយៈច្បាប់ចំនួនបី ដែលនឹងត្រូវដឹកនាំអនុវត្តដោយអគ្គនាយកដ្ឋានកាំកុងត្រូលថ្មីគឺ៖ ច្បាប់ស្ដីពីសុវត្ថិភាពម្ហូបអាហារ, ច្បាប់ស្ដីពីការប្រកួតប្រជែង និងច្បាប់ស្ដីពីកិច្ចការពារអ្នកប្រើប្រាស់ ដែលច្បាប់ទាំងអស់នេះ បានអនុម័តរួចហើយដោយគណៈរដ្ឋមន្ត្រី ហើយបានបញ្ជូនទៅដល់រដ្ឋសភា ដើម្បីធ្វើការអនុម័ត នៅពេលបើកបវេសនកាលឡើងវិញ» ។
បន្ថែមលើនោះទៀត លោក ប៉ាន សូរស័ក្តិ ក៏បានលើកឡើងអំពីសមិទ្ធផលការងារផ្នែកពាណិជ្ជកម្មអន្តរជាតិ ជាពិសេសការចរចាទាញយកអត្ថប្រយោជន៍ផ្សេងៗ ពីកិច្ចព្រមព្រៀងទ្វេភាគី និងពហុភាគី ព្រមទាំងបានបង្ហាញនូវមោទកភាពចំពោះសមិទ្ធផលការងារទាំងឡាយ ដែលកើតចេញពីវប្បធម៌សាមគ្គីភាពរបស់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ ទាំងនៅក្នុងក្រសួង និងនៅតាមមន្ទីរពាណិជ្ជកម្ម ក៏ដូចជាសាខាកាំកុងត្រូលរាជធានី-ខេត្ត៕ កែសម្រួលដោយ ៖ សុឃាក់
ចែករំលែកព័តមាននេះ