រាជធានីភ្នំពេញ ៖ កម្ពុជាបានកំណត់យកទេសចរជនជាតិចិន ជាគោលដៅចម្បងក្នុងការទាក់ទាញមកទស្សនានៅតាមតំបន់រមណីយដ្ឋាននានាក្នុងប្រទេសកម្ពុជា ដូច្នេះហើយទើបថ្នាក់ដឹកនាំប្រទេសកម្ពុជាកំពុងជំរុញការចរចាជាមួយភាគីចិនក្នុងការបើកជើងហោះហើរត្រង់-មក រវាងកម្ពុជានិងចិន ។ ជាពិសេសរាជរដ្ឋាភិបាលក៏បានជំរុញឱ្យក្រុមហ៊ុនអាកាសចរណ៍ក្នុងស្រុកពង្រីកជើងហោះហើរបន្ថែមទៀតទៅកាន់គោលដៅប្រទេស ដើម្បីនាំទេសចរ និងវិនិ យោគិនមកកម្ពុជា ។
ពាក់ព័ន្ធនឹងគម្រោងនៃការពង្រីកឲ្យបានកាន់តែច្រើននូវជើងហោះហើរផ្ទាល់ទៅ-មក រវាងប្រទេសកម្ពុជានិងខេត្ត-ក្រុងសំខាន់ៗរបស់ប្រទេសចិននោះ រដ្ឋមន្ត្រីនៃក្រសួងទេសចរណ៍កម្ពុជា លោក ថោង ខុន បានឲ្យដឹងថាកម្ពុជាក៏កំពុងពង្រឹងកិច្ចសហប្រតិបត្តិការទេសចរណ៍ជាមួយខេត្តហឺណាន ប្រទេសចិន ។ ជាក់ស្តែងកាលពីរសៀលថ្ងៃទី២៣ ខែសីហា ឆ្នាំ២០១៩ កន្លងទៅនេះ រដ្ឋមន្ត្រីក្រសួងទេសចរណ៍ បានអនុញ្ញាតឲ្យលោក Ma Jian អគ្គនាយកនៃតំបន់សេដ្ឋកិច្ចពិសេសព្រលានយន្តហោះក្រុង Zhengzhou (Zhengzhou Airport Economic Zone-ZAEZ) នៃខេត្តហឺណាន ប្រទេសចិន និងសហការី អមជាមួយវត្តមានលោក Zhan Yuhong ស្ថានតំណាងទេសចរណ៍ប្រចាំទីក្រុង Zhengzhou ខេត្តហឺណាន ចូលជួបសំដែងការគួរសម និងពិភាក្សាការងារ សំដៅពង្រឹងចំណងមិត្តភាព កិច្ចសហប្រតិបត្តិការលើវិស័យទេសចរណ៍រវាងខេត្តហឺណាន ប្រទេសចិន និងព្រះរាជាណាចក្រកម្ពុជា។
នៅក្នុងការជួបពិភាក្សានេះ ផ្តោតសំខាន់ទៅលើចំណុចសំខាន់ដូចជា៖ ១/ជំរុញការតភ្ជាប់ជើងហោះហើរពីខេត្តហឺណានមកកម្ពុជា ទាំងផ្នែកដឹកជញ្ជូនអ្នកដំណើរ (passengers) និងទំនិញ(Cargos)។ ២/ អាស្រ័យដោយខេត្តហឺណាន ជាខេត្តដែលមានប្រជាជនច្រើនរហូតប្រមាណ ១០០លាននាក់ អង្គប្រជុំក៏ឯកភាព និងទទួលស្គាល់ភាពចាំបាច់ក្នុងការជំរុញ និងពិនិត្យលទ្ធភាពបង្កើតស្ថានអគ្គកុងស៊ុលខ្មែរប្រចាំនៅខេត្តហឺណាន។ ៣/ ការពិភាក្សាលើកិច្ចសហប្រតិបត្តិការលើវិស័យទេសចរណ៍តាមរយៈការត្រៀមរៀបចំព្រឹត្តិការណ៍ធំៗដើម្បីផ្សព្វផ្សាយទេសចរណ៍រួមគ្នានៃសក្តានុពលទេសចរណ៍រវាងព្រះរាជាណាចក្រកម្ពុជា និងខេត្តហឺណាន ជាពិសេសត្រៀមសហការរៀបចំពិធីបិទព្រឹត្តិការណ៍ឆ្នាំទេសចរណ៍ និងវប្បធម៌ កម្ពុជា-ចិន ផងដែរ។ ៤/ភាគីទាំងពីរក៏បានឯកភាព នៅថ្ងៃអនាគត នឹងជំរុញឲ្យមានការចុះអនុស្សារណៈយោគយល់គ្នាស្តីពីកិច្ចសហប្រតិបត្តិការទេសចរណ៍រវាងកម្ពុជា និងតំបន់សេដ្ឋកិច្ចពិសេសព្រលានយន្តហោះក្រុងZhengzhou (ZAE) របស់ខេត្តហឺណាន។
សូមបញ្ជាក់ថា ខេត្តហឺណាន គឺជាខេត្តមួយរបស់ប្រទេសចិនដែលសំបូរដោយបេតិកភណ្ឌវប្បធម៌ ប្រវត្តិសាស្ត្រ និងធម្មជាតិ ដូចជាវត្តសាវឡិញ Mt. Songshan’s Shaolin Temple ព្រះវិហារ Xiangguo Monastery ជាដើម។ ថ្មីៗនេះផងដែរ លោក ថោង ខុន ក៏បានណែនាំទៅកាន់ថ្នាក់ដឹកនាំក្រុមហ៊ុន អាកាសចរណ៍ជាតិកម្ពុជា អង្គរអ៊ែរ គិតគូរដល់គម្រោងបង្កើតការជើងហោះហើរត្រង់បន្ថែមទៀតទៅកាន់គោលដៅប្រទេសចិន ជាពិសេសទៅតំបន់ណាដែលកម្ពុជា បានដាក់ស្ថានកុលស៊ុលប្រចាំការនៅទីនោះ ដូចជាខេត្តស៊ីអាន ខេតឆុងឈីង សៀងហៃ ក្វាងចូវជាដើម ។ លោកបានបន្តថា ការបើកជើងហោះហើរត្រង់ទៅកាន់ទីនោះ អាចនាំទេសចរចិននិងអ្នកវិនិយោគមកកាន់កម្ពុជា បានកាន់តែច្រើន ដោយសារតែពួកគេងាយស្រួលក្នុងការស្នើសុំទិដ្ឋការមកកាន់ប្រទេសកម្ពុជា សំខាន់ជាងនេះទៅទៀត ទេសចរចិនមានចំនួនច្រើនជាងគេនៅលើពិភពលោក ហើយប្រទេស ណាក៏ចង់បានភ្ញៀវទេសចររបស់ចិនដែរ ដោយសារតែកំនើនសេដ្ឋកិច្ចរបស់ចិន មានការរីកចម្រើនខ្លាំង អញ្ចឹងហើយពលរដ្ឋចិនត្រូវការចំណាយប្រាក់ដើម្បីដើរកម្សាន្ត ។ ម្យ៉ាងទៀតយោងតាមដំណើរទស្សនកិច្ចរបស់ថ្នាក់នាំទាំងពីរប្រទេស កម្ពុជា ចិន អាចបញ្ជាក់ពីទំនាក់ទំនងរវាងគ្នានឹងគ្នាកាន់តែខ្លាំងឡើងថែមទៀត ។
លោកថា៖« ប្រទេសនៅលើពិភពលោក តែងតែមានវត្តមានជនជាតិនៅប្រទេសទាំងនោះ ហើយពួកគេតែងតែបង្កើតគោលនយោបាយទាក់ទាញភ្ញៀវទេសចរទៅលេងនិងទស្សនាក្នុងប្រទេសរបស់គេ ។ បច្ចុប្បន្នចិនជាប្រទេសដែលមានប្រជាជនច្រើនជាងគេមួយនៅលើពិភពលោក ដូច្នេះប្រជាជនចិនក៏ចេញក្រៅប្រទេសច្រើនជាងគេដែរ » ។
បើតាមលោកហូ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជា បានលើកឡើងថា មិនថាតែជនជាតិ ឬជនជាតិអ្វីទេ យើងសូមស្វាគមន៍ នូវអ្នកទាំងទេសចរមកពីគ្រប់ទិសទី ដើម្បីមកទស្សនានៅតំបន់រមណីយដ្ឋាននានា ក្នុងប្រទេសកម្ពុជា ព្រោះ ពេលដែលទេសចរមកកាន់តែច្រើន នឹងនាំប្រាក់ចំណូលបន្ថែមមកប្រទេសជាតិក៏ដូចជាប្រជាពលរដ្ឋកម្ពុជា ដែលរករបរក្នុងវិស័យទេសចរណ៍នេះទាំងមូល ។ យោងតាមរបាយការណ៍របស់ ក្រសួងទេសចរណ៍កម្ពុជា ក្នុងរយៈពេល១ឆមាស កម្ពុជាទទួលបានភ្ញៀវទេសចរអន្តរជាតិប្រមាណ ៣លាន៣សែននាក់ ក្នុងនោះភ្ញៀវទេសចរចិនមានចំនួនប្រមាណ១លាន៣សែននាក់ហើយ រឺស្មើនឹងប្រមាណ ៣៨,៧ភាគរយនៃភ្ញៀវទេសចរសរុប ដែលមានកំណើន ៣៨,៧ភាគរយដូចគ្នា ធៀបនឹងរយៈពេលដូចគ្នាកាលពីឆ្នាំ ២០១៨ កន្លងទៅ ។
ដោយឡែកបើតាមរបាយការណ៍របស់គ្រឹះស្ថានអង្គរ ដែលជាអ្នកទទួលភារៈលក់សំបុត្រជូនភ្ញៀវទេសចរអន្តរជាតិចូលទស្សនារមណីយដ្ឋានអង្គរ ក៏បានអោយដឹងផងដែរថា ក្នុងរយៈពេល៧ខែដើមឆ្នាំ គ្រឹះស្ថានអង្គរលក់សំបុត្រជូនភ្ញៀវទេសចរបានប្រមាណជិត១លាន៤សែននាក់ ដែលរកចំណូលបានប្រមាណ៦២លានដុល្លារអាមេរិក ក្នុងនោះដែរភ្ញៀវទេសចរជនជាតិចិនបានទិញសំបុត្រចូលទស្សនារមណីយដ្ឋានអង្គរក៏មានចំនួនច្រើនជាងគេដែរ ជាក់ស្ដែងក្នុងខែកក្កដាឆ្នាំ ២០១៩កន្លងទៅនេះ ភ្ញៀវទេសចរជនជាតិចិន បានទិញសំបុត្រចូលទស្សនារមណីយដ្ឋានអង្គរមានចំនួន ជាង៥ម៉ឺន៨ពាន់នាក់ ស្មើនឹងប្រមាណ៣៨,៨៦ភាគរយនៃភ្ញៀវទេសចរសរុប ៕ កែសម្រួលដោយ ៖ សុឃាក់
ចែករំលែកព័តមាននេះ