ខេត្តបន្ទាយមានជ័យ ៖ សេចក្តីរាយការណ៍បឋឋមបានឲ្យដឹងថា លោកតាវ័យ៨១ឆ្នាំម្នាក់ត្រូវបានរថយន្តបុកស្លាប់ភ្លាមៗ ខណៈពេលបើកម៉ូតូឆ្លងផ្លូវ ។ ហេតុការណ៍គួរឲ្យភ្ញាក់ផ្អើលនេះបានកើតឡើង នៅវេលាម៉ោង៤និង០៥នាទីល្ងាច ថ្ងៃទី២៤ ខែសីហានេះ…
ខេត្តបន្ទាយមានជ័យ ៖ សេចក្តីរាយការណ៍បឋឋមបានឲ្យដឹងថា លោកតាវ័យ៨១ឆ្នាំម្នាក់ត្រូវបានរថយន្តបុកស្លាប់ភ្លាមៗ ខណៈពេលបើកម៉ូតូឆ្លងផ្លូវ ។ ហេតុការណ៍គួរឲ្យភ្ញាក់ផ្អើលនេះបានកើតឡើង នៅវេលាម៉ោង៤និង០៥នាទីល្ងាច ថ្ងៃទី២៤ ខែសីហានេះ លើកំណាត់ផ្លូវជាតិលេខ៦ ក្នុងទីប្រជុំជន ត្រង់ចំណុចចន្លោះបង្គោលលេខ០៣០១-០៣០២ ស្ថិតក្នុងភូមិភ្នំជញ្ជាំង ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ ។
លោកវរសេនីយ៍ឯកមាស ប្ញទ្ធី អធិការនគរបាលស្រុកព្រះនេត្រព្រះបានឲ្យដឹងថា ជនរងគ្រោះដែលស្លាប់ឈ្មោះ មិន សាវី ភេទប្រុស អាយុ៨១ឆ្នាំ នៅភូមិជប់ ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ(គ្មានពាក់មួកសុវត្ថិភាព) បើកបរម៉ូតូម៉ាកហុងដាឌ្រីមសេរីចាស់ ធុនសេ១០០ ពណ៌ខ្មៅ ពាក់ស្លាកលេខ ប.មានជ័យ 1G.6751 ។ ចំណែករថយន្តដែលបុកម៉ាកហាយឡិនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ 2W-0241 អ្នកបើកបរមិនត្រូវបានគេស្គាល់អត្តសញ្ញាណ (រត់គេចខ្លួនបាត់)។
លោកអធិការបានបញ្ជាក់ទៀតថា តាមការឲ្យដឹងពីសាក្សីនៅកន្លែងកើតហេតុ មុនពេលកើតហេតុជនរងគ្រោះបានបើកបរម៉ូតូតាមផ្លូវលំក្នុងទិសខាងជើងទៅត្បូងពេលមកដល់កន្លែងកើតហេតុបានឆ្លងផ្លូវជាតិលេខ៦ ស្របពេលនោះមានរថយន្តម៉ាកហាយឡិនឌ័រ១គ្រឿងបានបើកបរក្នុងទិសដៅពីលិចទៅកើតក្នុងល្បឿនលឿនបុកបណ្តាលឲ្យជនរងគ្រោះដួលខ្ទាតបោកក្បាលទៅនឹងថ្នល់ស្លាប់ភ្លាមៗតែម្តង ។
ចំពោះរថយន្ត និងម៉ូតូខូចខាតស្រាល សពជនរងគ្រោះត្រូវបានកម្លាំងនគរបាលជំនាញចរាចរណ៍បានប្រគល់ជូនក្រុមគ្រួសារចាត់ចែងធ្វើបុណ្យក្រោយពីធ្វើការវាស់វែងរួច ចំណែកវត្ថុតាងរថយន្ត និងម៉ូតូយកមករក្សាទុកនៅអធិការដ្ឋាននគរបាលស្រុករង់ចាំធ្វើការដោះស្រាយនៅពេលក្រោយ ៕ កែសម្រួលដោយ ៖ សុឃាក់
ចែករំលែកព័តមាននេះ