ខេត្ដក្រចេះ ៖ ឈើប្រណីតប្រភេទ គ្រញូងចំនួន១០កំណាត់ធំៗ ដែលគេលួចដឹកតាមរថយន្ដ ត្រូវបានសមត្ថកិច្ចជំនាញ រដ្ឋបាលព្រៃឈើធ្វើការបង្ក្រាបព្រមទាំងឃាត់ខ្លួនមនុស្សចំនួន៤នាក់ផងដែរ ។ មន្ដ្រីផ្នែករដ្ឋបាលព្រៃឈើបានឱ្យដឹងថា កាលពីល្ងាចថ្ងៃទី២៨ ឧសភា កំលាំងជំនាញ បានធ្វើការឃាត់ស្ទាក់ចាប់បានរថយន្ដដឹកឈើគ្រញូងលោតឆត្រមួយគ្រឿង នៅលើកំណាត់ ផ្លូវជាតិលេខ៧ត្រង់ចំណុចភូមិចាហប ឃុំក្បាលដំរី ស្រុកសំបូរ ខណៈឈើខុសច្បាប់ ទាំងនេះត្រូវជន៤នាក់ដឹកចេញពីខេត្ដស្ទឹងត្រែងបំរុងយកទៅលក់បន្ដនៅព្រំដែនប្រទេសយួន ។
លោកព្រាប សុទ្ឋារ៉ា នាយផ្នែករដ្ឋបាលព្រៃឈើក្រចេះបានឱ្យដឹងកាលពីថ្ងៃទី២៩ ឧសភាថា អនុវត្ដតាមអនុសាសន៍របស់ប្រមុខរាជរដ្ឋាភិបាល និងបទបញ្ជាពីថ្នាក់លើកន្លងមកមន្ដ្រីផ្នែករដ្ឋបាលព្រៃឈើបានចុះអនុវត្ដនិងបង្ក្រាបនូវបទល្មើសព្រៃឈើ និងការដឹកលាក់ទុកឈើខុសច្បាប់បានជាបន្ដបន្ទាប់ ។ ដោយឡែកនៅក្នុងការឃាត់រថយន្ដដឹកឈើប្រណីតខុសច្បាប់ខាងលើនេះ គឺសមត្ថកិច្ចធ្វើការដកហូតបានឈើប្រណីត ប្រភេទគ្រញូងចំនួន១០កំណាត់ និងដកហូតរថយន្ដ១គ្រឿងម៉ាកកាមរីស៊េរីឆ្នាំ១៩៩១ ពណ៌ទឹកប៊ិច ពាក់ស្លាកលេខ ញ២៧១២ ភព២ ព្រមទាំងឃាត់ខ្លួនមនុស្សចំនួន៤នាក់ ដែលកំពុងជិះក្នុងរថយន្ដនោះ ។
មនុស្សទាំង៤នាក់នោះមាន១-ឈ្មោះវើយ ត្រោ អាយុ២២ឆ្នាំ ជាអ្នកបើកបរមានទីលំនៅភូមិ ឫស្សីចារ ឃុំថ្មគ្រែ ស្រុកចិត្របុរី ២-ឈ្មោះឆុំ អាវី អាយុ២៥ឆ្នាំ ៣-ឈ្មោះឆាន រ៉ាវុធ អាយុ ២១ឆ្នាំ និង៤-ឈ្មោះឆាន ប្រុសទូច អាយុ ១៧ឆ្នាំ ទាំងបីនាក់នេះមានទីលំនៅភូមិ ជ្រោយបន្ទាយ ស្រុកព្រែកប្រសព្វ ។ នៅក្នុងរថយន្ដដឹកឈើរបស់ជនទាំង៤នាក់ខាងលើ គឺសុទ្ធតែដាក់ខោអាវប៉ារ៉ានៅ នឹងកៅអីអង្គុយ ព្រមទាំងមានសំភារយោធា ដូចជាមួក ខោអាវ និងអង្រឹងមួយចំនួនទៀត ហើយត្រូវបានមន្ដ្រីជំនាញដកហូតទាំងអស់ ។ ជនទាំង៤នាក់ ត្រូវបានមន្ដ្រីជំនាញ ផ្នែករដ្ឋបាលព្រៃឈើក្រចេះកសាងសំណុំរឿងរួមទាំងវត្ថុតាងបញ្ជូនទៅកាន់សាលាដំបូងខេត្ដ ។
ចែករំលែកព័តមាននេះ