រាជធានីភ្នំពេញ៖ ដើម្បីលើកកម្ពស់ភាពប្រកួតប្រជែង និងធ្វើពិពិធកម្មនៅក្នុងវិស័យឧស្សាហកម្មក្នុងស្រុកឱ្យប្រសើរថែមទៀត កម្ពុជាចង់ឱ្យបានការបណ្តាក់ទុនវិនិយោគមកពីជប៉ុនលើការផលិតគ្រឿងបង្គុំនិងសម្ភារទោចក្រយានដើម្បីពង្រឹងវិស័យឧស្សាហកម្មកម្មន្តសាលនាពេលបច្ចុប្បន្ននិងអនាគត ខណៈកម្ពុជាគឺជាប្រទេសនាំចេញកង់ធំបំផុតលំដាប់ទី២ ក្នុងពិភពលោក ។ លោក ប៉ាន សូរស័ក្តិ…
រាជធានីភ្នំពេញ៖ ដើម្បីលើកកម្ពស់ភាពប្រកួតប្រជែង និងធ្វើពិពិធកម្មនៅក្នុងវិស័យឧស្សាហកម្មក្នុងស្រុកឱ្យប្រសើរថែមទៀត កម្ពុជាចង់ឱ្យបានការបណ្តាក់ទុនវិនិយោគមកពីជប៉ុនលើការផលិតគ្រឿងបង្គុំនិងសម្ភារទោចក្រយានដើម្បីពង្រឹងវិស័យឧស្សាហកម្មកម្មន្តសាលនាពេលបច្ចុប្បន្ននិងអនាគត ខណៈកម្ពុជាគឺជាប្រទេសនាំចេញកង់ធំបំផុតលំដាប់ទី២ ក្នុងពិភពលោក ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា នៅក្នុងជំនួបពិភាក្សាជាមួយ លោក Horinouchi Hidehisa ឯកអគ្គរាជទូតជប៉ុនកាលពីពេលថ្មីៗនេះ បានស្នើឯកអគ្គរាជទូតវិសាមញ្ញ និងពេញសមត្ថភាពជប៉ុន ប្រចាំនៅកម្ពុជាដែលបានចប់អណ្ណត្តិ ឲ្យជួយកៀងគរ
វិនិយោគិនពីប្រទេសជប៉ុន មកបណ្តាក់ទុនលើការផលិតគ្រឿងបង្គុំ និងសម្ភារទោចក្រយាន ដើម្បីលើកស្ទួយឧស្សាហកម្មកម្មន្តសាល និងពង្រីកការនាំចេញផលិតផលសម្រេចទៅកាន់ទីផ្សារអន្តរជាតិ។
លោករដ្ឋមន្ត្រី បានមានប្រសាសន៍ថា «កម្ពុជា គឺជាប្រទេសនាំចេញកង់ធំបំផុតលំដាប់ទី២ ក្នុងពិភពលោក ទៅកាន់ទីផ្សារអឺរ៉ុប ប៉ុន្តែសម្ភារៈ និងគ្រឿងបង្គុំមួយចំនួន ត្រូវនាំចូលពីប្រទេសក្នុងតំបន់ ដូច្នេះបើសិនមានក្រុមហ៊ុនផលិតកង់ដូចជា Shimano មកវិនិយោគលើឧស្សាហកម្មនេះ គឺពិតជារឿងប្រសើរបំផុត ពីព្រោះយើងកំពុងប្រែក្លាយពីប្រទេសប្រើប្រាស់កម្លាំង ទៅជាប្រើប្រាស់ជំនាញ ដើម្បីជំរុញការធ្វើពិពិធកម្មកំណើនសេដ្ឋកិច្ច ដូចបានកំណត់នៅក្នុងគោលនយោបាយអភិវឌ្ឍន៍ឧស្សាហកម្មកម្ពុជា ឆ្នាំ២០១៥-២០២៥»។
សូមរម្លឹកថា កាលពីឆ្នាំ ២០១៨ កន្លងទៅនេះ ប្រទេសកម្ពុជាបាននាំចេញកង់ចំនួន ១,៥២ លានកង់ទៅកាន់សហភាពអឺរ៉ុបដែលមានតម្លៃសរុបប្រមាណជាង ៣៣១ លានដុល្លារអាមេរិក។ នេះបើយោងតាមរបាយការណ៍របស់ធនាគារពិភពលោកចេញផ្សាយកាលពីខែឧសភាកន្លងទៅ ។ ជាមួយគ្នានោះផងដែរ កាលពីឆ្នាំ ២០១៧ កម្ពុជាបានក្លាយជាអ្នកផ្គត់ផ្គង់កង់ធំជាងគេដល់សហភាពអឺរ៉ុបលេខ ១ ដោយវ៉ាដាច់តៃវ៉ាន់។ ភាគច្រើននៃរោងចក្រផលិតកង់នៅកម្ពុជាគឺមានទីតាំងនៅតំបន់សេដ្ឋកិច្ចពិសេសនៃខេត្តស្វាយរៀង ។
យ៉ាងណាមិញ ក្នុងឱកាសនៃការជួបប្រជុំដែលរដ្ឋមន្ត្រីកម្ពុជាបានស្នើដល់ជប៉ុនវិនិយោគបន្ថែមទៀតលើវិស័យផលិតនូវគ្រឿងបង្គុំកង់នេះ លោក Horinouchi Hidehisa ឯកអគ្គរាជទូតជប៉ុន បានសម្តែងសេចក្តីសោមន្ស ចំពោះវឌ្ឍនភាពទំនាក់ទំនង និងកិច្ចសហប្រតិបត្តិការគ្រប់វិស័យរវាងកម្ពុជា-ជប៉ុន និងបានកោតសរសើរអំពីកំណែទម្រង់មុតស្រួច ដែលបានដាក់ចេញដោយរាជរដ្ឋាភិបាលកម្ពុជា ដើម្បីជួយសម្រួលការធ្វើធុរកិច្ចរបស់វិនិយោគិនជប៉ុន ជាពិសេសការនាំចូលទំនិញនៅតាមមាត់ច្រកព្រំដែន។
បើតាមលោកឯកអគ្គរាជទូតមានសុទិដ្ឋិនិយមខ្ពស់ចំពោះអនាគតរបស់ប្រទេសកម្ពុជា និងបានសន្យាបន្តជួយគាំទ្រការអភិវឌ្ឍសេដ្ឋកិច្ចកម្ពុជា តាមរយៈការជំរុញវិនិយោគិនជប៉ុន ឱ្យចូលមកបណ្តាក់ទុនកាន់ច្រើនថែមទៀត ដើម្បីបង្កើតការងារជូនប្រជាជន និងចូលរួមកាត់បន្ថយភាពក្រីក្រ។
លោក អៀង សុធារ៉ា ប្រធានសមាគមពាណិជ្ជកម្មនិងវិនិយោគកម្ពុជា-ជប៉ុនមានប្រសាសន៍ឱ្យដឹងកាលពីថ្ងៃទី២២ ខែសីហា ម្សិលមិញថា មកដល់បច្ចុប្បន្នអ្នកវិនិយោគិនរបស់ជប៉ុនដែលបានចូលជាសមាជិករបស់សមាគមានប្រមាណ៧ក្រុមហ៊ុនក្នុងចំនួនសមាជិកសរុបចំនួន៣០ ហើយក្រុមហ៊ុនទាំងនោះវិនិយោគលើគ្រប់វិស័យ។ លោកបានលើកឡើងថា និន្នាការបច្ចុប្បន្ន ឃើញថាវិនិយោគិនជប៉ុនចូលមកបណ្តាក់ទុននៅកម្ពុជាមានច្រើនជាងមុនៗ។ក្នុងនោះឃើញមានការវិនិយោគលើវិស័យអចលនទ្រព្យ,សេវាកម្មចំណីអាហារ, វិស័យឧស្សាហកម្ម និងក្នុងវិស័យកសិកម្មវិនិយោគិនជប៉ុនធំៗចាប់ផ្តើមគិតចង់ចូលមកស្រុកខ្មែរ ទាក់ទងនិងពូជ ការកែច្នៃ, ជី និងត្រួតពិនិត្យទៅលើគុណភាពបន្ថែផ្លែឈើជាដើម។
ស្ថិតក្នុងបរិបទបច្ចុប្បន្ន អៀង សុធារ៉ា បានមានប្រសាសន៍ថា «ខ្ញុំមើលឃើញនៅតែល្អ។វិនិយោគិនជប៉ុនចូលមកកាន់កម្ពុជាច្រើន តែមិនជាលក្ខណៈកំហុកទេ។មានន័យថាបើមកចំនួន៣ គាត់បណ្តាក់ទុនទាំង៣ មិនដូចជាវិនិយោគិនប្រទេសផ្សេងបើចូលមក១០អាចទៅវិញអស់៨ក្រុមហ៊ុន។ការបណ្តាក់ទុនរបស់ជប៉ុនមានភាពច្បាស់លាស់។ទៅថ្ងៃខាងមុខខ្ញុំយល់ថាបើកម្ពុជាមានស្ថិរភាព និងសន្តិសុខដូចសព្វថ្ងៃនេះ ពួកគាត់នឹងចូលមកវិនិយោគនៅកម្ពុជាច្រើនទៅៗ»៕ កែសម្រួលដោយ ៖សុឃាក់
ចែករំលែកព័តមាននេះ