ខេត្តតាកែវ ៖ វិហារអ៊ិស្លាមដែលជាអំណោយរបស់សប្បុរសជននៅប្រទេសម៉ាឡេស៊ី ស្ថិតនៅក្នុងភូមិអង្គគ្រួច ឃុំបុរីជលសា ស្រុកបុរីជលសា ត្រូវបានសម្ពោធដាក់ឱ្យប្រើប្រាស់ជាផ្លូវការកាលពីព្រឹកថ្ងៃទី៤ មីនា ក្រោមអធិបតីភាពលោកឧកញ៉ា អូស្មាន ហាស្សាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងជាតំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ប៊ុន រ៉ានី ហ៊ុន សែន។
នៅក្នុងឱកាសនោះដែរ មានការអញ្ជើញចូលរួមពីលោកឧកញ៉ា សុះ កំរី ចាងហ្វាងគណៈដឹកនាំជាន់ខ្ពស់នៃសាសនាអ៊ិស្លាមកម្ពុជា អស់លោក លោកស្រីជាសមាជិករដ្ឋសភា រដ្ឋលេខាធិការ អនុរដ្ឋលេខាធិការ គណៈអភិបាលខេត្តតាកែវ គណៈអភិបាលស្រុក គណៈអ៊ីម៉ាំខេត្ត លោកគ្រូ អ្នកគ្រូ សិស្សានុសិស្ស ប្រជាពលរដ្ឋ និងសប្បុរសជនមកពីប្រទេសម៉ាឡេស៊ីយ៉ាងច្រើនកុះករ។ លោកស៊ុន ខុន គណៈអភិបាលស្រុកបុរីជលសា បានអានរបាយការណ៍ពីការសាងសង់ឱ្យដឹងថា សមិទ្ធផល និងវិហារដែលត្រូវសម្ពោធនាពេលនេះមានទំហំ១២ម៉ែត្រ គុណ១៨ម៉ែត្រ អាងទឹក១, បន្ទប់អនាម័យ១ ចំណាយអស់ថវិកា៩២.៥០០ដុល្លារអាមេរិក ជាអំណោយរបស់សប្បុរសជនម៉ាឡេស៊ី និងក្នុងតំបន់ដែលបានចាប់ផ្តើមសាងសង់នៅក្នុងឆ្នាំ២០០៨។
លោកឧកញ៉ា អូស្មាន ហាស្សាន់ មានប្រសាសន៍សំណេះសំណាលជាមួយសាសនិកអ៊ិស្លាមកម្ពុជា ដោយពាំនាំនូវការសួរសុខទុក្ខពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ប៊ុន រ៉ានី ហ៊ុន សែន ហើយបានលើកឡើងពីការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការកសាងសមិទ្ធផលទាំងវិស័យពុទ្ធចក្រ និងអាណាចក្រ និងស្នាដៃសម្រេចបានជាច្រើនជូនជាតិមាតុភូមិរបស់គណបក្សប្រជាជនកម្ពុជា ក្រោមការដឹកនាំរបស់សម្តេចអគ្គមហាទាំង៣ ជាប្រមុខតាំងពីបាតដៃទទេរហូតមកដល់មានអ្វីៗទាំងអស់ដូចសព្វថ្ងៃនេះ។
លោកឧកញ៉ា អូស្មាន ហាស្សាន់ បានជម្រាបជូនពីលទ្ធផលមហាសន្និបាតគណៈកម្មាធិការកណ្តាលគណបក្សប្រជាជនកម្ពុជាកន្លងមកនេះដែលបានបញ្ជាក់ជាថ្មី គាំទ្របេក្ខភាពសម្តេចតេជោ ហ៊ុន សែន នាយករដ្ឋមន្ត្រីសម្រាប់អាណត្តិក្រោយៗទៀត។ លោកឧកញ៉ាបានផ្តាំផ្ញើដល់សាសនិកអ៊ិស្លាមកម្ពុជាទាំងអស់ត្រូវរួបរួមសាមគ្គីគ្នា ឯកភាពជាតិ បំផុសស្មារតីសុច្ឆន្ទៈស្នេហាជាតិ ស្រឡាញ់ជាតិមាតុភូមិ ចូលរួមបរិច្ចាគថវិកាគាំទ្រសមរភូមិមុខ ដើម្បីការពារបូរណភាពទឹកដីកុំឱ្យចោរសៀមឈ្លានពានទឹកដីរបស់យើង។ លោកឧកញ៉ា អូស្មាន ហាស្សាន់ បានគូសបញ្ជាក់ថា ប្រជាពលរដ្ឋយើងមានមោទនភាពណាស់ដោយសារមានប្រមុខដឹកនាំប្រកបដោយគតិបណ្ឌិតដ៏ឈ្លាសវៃរបស់សម្តេចតេជោ ហ៊ុន សែន ក្នុងការដឹកនាំជំរុញនាវាកម្ពុជាឈានទៅរកសុខសន្តិភាពពិតប្រាកដ និងការអភិវឌ្ឍលើគ្រប់វិស័យ។ ជាក់ស្តែងដូចថ្ងៃនេះស្រាប់ យើងមានវិហារដ៏ល្អប្រណីតមួយសម្ពោធដាក់ឱ្យប្រើប្រាស់ជាផ្លូវការពីពេលនេះតទៅ ហើយយើងជាប្រជាពលរដ្ឋកម្ពុជាកាន់សាសនាអ៊ិស្លាម មិនមែនអាណិកជនអ៊ិស្លាមទេ ដូច្នេះយើងមានសិទ្ធិក្នុងការចូលរួមអភិវឌ្ឍន៍ប្រទេសជាតិ ជាមួយរាជរដ្ឋាភិបាលកម្ពុជា។
លោកឧកញ៉ា អូស្មាន ហាស្សាន់ បានបំពាក់មេដាយជូនសប្បុរសជនដែលបានចូលរួមកសាងវិហារ និងបាននាំយកអំណោយរបស់សម្តេចតេជោ ហ៊ុន សែន និងលោកជំទាវបណ្ឌិត ឧបត្ថម្ភដល់សិស្ស៥២១នាក់ ម្នាក់ៗទទួលបានសៀវភៅ២ក្បាល ប៊ិច១ដើម, លោកគ្រូ អ្នកគ្រូ២២នាក់ ម្នាក់ៗទទួលបានសារុង១ ក្រមា១ និងថវិកា២ម៉ឺនរៀល និងឧបត្ថម្ភវិហារអ៊ិស្លាមថវិកា២លានរៀល។ ក្នុងឱកាសនោះដែរ លោកនាយឧត្តមសេនីយ៍ មាស សុភា បានឧបត្ថម្ភថវិកា២.០០០ដុល្លារអាមេរិក សម្រាប់ធ្វើផ្លូវទៅវិហារ និងលោកឧត្តមសេនីយ៍ ចៅ តុល ឧបត្ថម្ភថវិកា១.៥០០ដុល្លារអាមេរិក សម្រាប់ទិញគ្រឿងបរិក្ខារបំពាក់នៅក្នុងវិហារផងដែរ៕
ចែករំលែកព័តមាននេះ