ខេត្តកំពត ៖ តាមសេចក្តីរាយការណ៍បឋមពីមន្ទីរយុត្តិធម៌កងរាជអាវុធហត្ថខេត្តកំពត បានឲ្យកោះសន្តិភាពដឹងកាលពីព្រឹកថ្ងៃទី១៩ ខែសីហា ឆ្នាំ២០១៩ កន្លងទៅនេះថា កាលពីវេលាម៉ោង២និង៣២នាទីរសៀលថ្ងៃទី១៨ ខែសីហា ឆ្នាំ២០១៩ កំលាំងជំនាញមន្ទីរយុត្តិធម៌កង រាជអាវុធហត្ថខេត្តកំពតបានចុះអនុវត្តដីកាលេខ២៨ អយ ចុះថ្ងៃទី៥ ខែសីហា ឆ្នាំ២០១៩ បញ្ជាឲ្យជនសង្ស័យម្នាក់ចូលខ្លួនមកដោះស្រាយពាក់ព័ន្ធករណីលួចលក់អចលនទ្រព្យដែលមិនមែនជារបស់ខ្លួន ហើយដីកានេះចេញដោយលោក មុត ដារ៉ា ព្រះរាជអាជ្ញារងអមសាលាដំបូងខេត្តកំពត ។
ជនជាប់ចោទខាងលើឈ្មោះ គាង ហាក់ឡុង ភេទប្រុស អាយុ៥៥ឆ្នាំ ទីលំនៅបច្ចុប្បន្ននៅភូមិឈើទាល ឃុំឈូក ស្រុកឈូក ខេត្តកំពត ។ ជនសង្ស័យម្នាក់នេះត្រូវបានតុលាការចោទប្រកាន់ពីបទលួចលក់អចលនទ្រព្យដែលមិនមែនជារបស់ខ្លួន នៅចំណុចឃុំល្បើក ស្រុកឈូក ខេត្តកំពត ហើយបច្ចុប្បន្នជនសង្ស័យខាងលើត្រូវបានមន្ត្រីជំនាញកំពុងចាត់ការតាមនីតិវិធី ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ