រាជធានីភ្នំពេញ ៖ ពាក់មួកសុវត្ថិភាពក្នុងទឹកមុខញញឹមស្រស់ ស្ត្រីខ្មែរម្នាក់មានមុខរបរលក់ពងទាតាមរ៉ឺម៉កម៉ូតូដោយមានចងអង្រឹងលើរ៉ឺម៉កឱ្យក្មេងស្រីតូចៗ២នាក់ដេកយ៉ាងរំភើយផង ត្រូវបានគេហៅឱ្យឈប់នៅកណ្តាលផ្លូវក្នុងបុរីមួយ ដើម្បីទិញពងទា ។ ក្រោយពីភ្ញៀវទិញពងទាម្នាក់មួយថង់ចេញផុតទៅ អ្នកស្រីលក់ពងទាបានសំណេះសំណាលជាមួយខ្ញុំដែលបានទិញពងទាមួយថង់ដែរ ។…
រាជធានីភ្នំពេញ ៖ ពាក់មួកសុវត្ថិភាពក្នុងទឹកមុខញញឹមស្រស់ ស្ត្រីខ្មែរម្នាក់មានមុខរបរលក់ពងទាតាមរ៉ឺម៉កម៉ូតូដោយមានចងអង្រឹងលើរ៉ឺម៉កឱ្យក្មេងស្រីតូចៗ២នាក់ដេកយ៉ាងរំភើយផង ត្រូវបានគេហៅឱ្យឈប់នៅកណ្តាលផ្លូវក្នុងបុរីមួយ ដើម្បីទិញពងទា ។
ក្រោយពីភ្ញៀវទិញពងទាម្នាក់មួយថង់ចេញផុតទៅ អ្នកស្រីលក់ពងទាបានសំណេះសំណាលជាមួយខ្ញុំដែលបានទិញពងទាមួយថង់ដែរ ។
អ្នកស្រីដែលមានអាយុជាង៣០ឆ្នាំ សម្បុរសស្រអែម មានសាច់ឈាមទ្រលុកៗបានរៀបរាប់ថា គាត់ទិញពងទាពីខេត្តតាកែវ ជាម៉ូយយូរឆ្នាំហើយ ផ្ញើតាមរថយន្តឈ្នួលមកដល់ផ្ទះគាត់នៅភូមិវាលស្បូវ ។ គាត់ថា ក្នុងមួយថ្ងៃ លក់ដាច់អស់ពី២.០០០ពង ទៅ៣.៥០០ពង ។ គាត់ថា ពងទារបស់គាត់ជាទាដែលអ្នកស្រុកចិញ្ចឹមតាមធម្មជាតិឱ្យស៊ីស្រូវមិនស៊ីចំណីទេ ។ ម្ល៉ោះហើយពងវាមានពណ៌ក្រហមឈ្ងុយឆ្ងាញ់ ។ គាត់ថា បានរកស៊ីលក់ពងទាតាមម៉ូតូរ៉ឺម៉កយូរឆ្នាំហើយ ។ មានម៉ូយច្រើនណាស់តាមខ្នងផ្ទះ តាមបុរី ពេលគាត់មកដល់ម្តងៗ ម៉ូយគាត់នាំគ្នាទិញក្នុងម្នាក់ៗពី២០ទៅ៥០ពង ដែលខ្លះយកទៅធ្វើពងទាប្រៃ ខ្លះគេទិញយកទៅខទុកបានយូរថ្ងៃ ។
គាត់រៀបរាប់ច្រាច់ថា ទិញពីគេមក ពងទាមួយថ្លៃ៣៥០រៀល គាត់លក់ចេញ១គ្រាប់៤០០រៀល។ ក្នុងមួយថ្ងៃរកចំណេញផាត់សោហ៊ុយរួចក៏១០ម៉ឺនរៀលដែរ ។ ខ្ញុំមិនដឹងទៅរកស៊ីអីក្រៅពីដើរលក់ពងទាទេ វាជាមុខរបរ ជាទម្លាប់ប្រចាំថ្ងៃទៅហើយ ។ ចំណែកនៅដេកលើអង្រឹងដែលចងលាតសន្ធឹងលើរ៉ឺម៉កម៉ូតូ មានម្នាក់ជាកូន ឯម្នាក់ទៀតជាក្មួយបង្កើតដែលម៉ែឪផ្ញើឱ្យនៅជាមួយ ។ ទៅណាមកណាតែងតែយកតាមជារៀងរាល់ថ្ងៃ ។ ពេលណាមានភ្លៀងបានចូលច្រកតាមផ្ទះ ។ ពេលជ្រកភ្លៀងម្តងៗ ក៏មានអ្នកនៅទីនោះនាំគ្នាទិញរហូតទីណាក៏មានគេស្គាល់ ជាម៉ូយអស់ទៅហើយ ។
គាត់ថា ពងទាដែលគាត់លក់ជាពងទាថ្មី… ថ្មីចែស… បើមិនជឿយកទៅស្ងោរបកមើលដឹងហើយ ។ គាត់ថា បើហ៊ានលក់ពងទាចាស់ ខ្លាចប៉ះស្អុយ… ដាច់ម៉ូយមិនខាន ៕ (កែសម្រួលដោយ ៖ បុប្ផា)
ចែករំលែកព័តមាននេះ